શહેરમાં ભગવતીપરા વિસ્તારમાં રહેતી પરિણીતા દેવપરા નજીક આવેલી મહેશ્વરી સોસાયટીમાં રહેતા દિયરના ઝઘડામાં સમજાવવા માટે ગઈ હતી ત્યારે સાસુ અને જેઠ સહિતનાએ ઝઘડો કરી ઢીકા પાટુનો માર માર્યો હતો. પરિણીતાને ઇજા પહોંચતા તાત્કાલિક સારવાર માટે રાજકોટ સિવિલ હોસ્પિટલમાં દાખલ કરવામાં આવી હતી.
આ બનાવ અંગે પોલીસમાંથી જાણવા મળતી વિગત મુજબ ભગવતીપરા વિસ્તારમાં રહેતી મીરાબેન મયુરગીરી ગોસ્વામી નામની 44 વર્ષની મહિલા દેવપરા નજીક આવેલી મહેશ્વરી સોસાયટીમાં પોતાના દિયર અને સાસુના ઘરે હતી ત્યારે સાસુ શકુંતલાબેન, જેઠ સુનિલ, વિશ્વાસ અને ગિરીશ સહિતના શખ્સોએ ઝઘડો કરી મીરાબેન ગોસ્વામીને ઢીકા-પાટુનો માર માર્યો હતો. પરિણીતાને ઇજા પહોંચતા સારવાર માટે સિવિલ હોસ્પિટલમાં દાખલ કરવામાં આવી હતી. પ્રાથમિક પૂછપરછમાં મીરાબેન ગોસ્વામીના દીયર જયપાલગીરીને તેની માતા સંકુતલાબેન સહિતના પરિવાર સાથે ઝઘડો ચાલતો હતો જે ઝઘડામાં મીરાબેન ગોસ્વામી દિયર અને સાસુ સહિતના પરિવારને સમજાવવા માટે ગઈ હતી ત્યારે સાસુ અને જેઠ સહિતનાએ મીરાબેન ગોસ્વામીને માર માર્યો હોવાનું જાણવા મળ્યું છે.

આ ઉપરાંત બીજા બનાવમાં ગંજીવાડામાં આવેલા મહાકાળી ચોકમાં રહેતા હરજી ઉર્ફે નિર્મલ વિનુભાઈ ગોહિલ નામનો 35 વર્ષનો યુવાન પોતાના ઘર પાસે હતો ત્યારે રાત્રિના બારેક વાગ્યાના અરસામાં સુનીલ ધીરુ અને ધીરુ ચના સહિતના શખ્સોએ ઝઘડો કરી છરી અને ધોકા વડે હુમલો કર્યો હતો. હુમલામાં ઘવાયેલા યુવકને તાત્કાલિક સારવાર માટે સિવિલ હોસ્પિટલમાં દાખલ કરવામાં આવ્યો હતો. ઉપરોક્ત બંને બનાવ અંગે પોલીસે નોંધ કરી વધુ તપાસ હાથ ધરી છે.

આજના આધુનિક યુગમાં પણ હજુ દહેજ પ્રથાના કારણે અનેક પરિણીતાઓ પર ત્રાસ અપાતા હોય છે જેમાં સુરત પરણાવેલી ધોરાજીની મેમણ યુતીને ‘તું વાંઝણી છો, તારે આ ઘરમાં રહેવું હોય તો માવતરેથી દહેજ લઈ આવ તેમ કહી સાસરીયાઓ કાઢી મુકી હતી જ્યારે પતિએ ચારિત્ર્ય પર શંકા કરી મારકુટ કરતો હોવાની પોલીસમાં ફરિયાદ નોંધાવી છે.

આ ઘટના અંગેની પોલીસ સુત્રોમાંથી જાણવા મળતી માહિતી મુજબ ધોરાજી મેઈન બજારમાં રહેતી નસરીનબેન રશીદભાઈ પોઠીયાવાળા (ઉ.37) મેમણ યુવતીએ ધોરાજી પોલીસમાં નોંધાવેલ ફરિયાદમાં આરોપી તરીકે સુરત ઉધના રહેતા વેપારી પતિ રશીદ રજાકભાઈ પોઠીયાવાલા, સસરા રજાકભાઈ હબીબભાઈ પોઠીયાવાલા, સાસુ જીન્નતબેન રજાકભાઈ પોઠીયાવાલાના નામ આપ્યા છે.

પોલીસ ફરિયાદમાં જણાવ્યા પ્રમાણે ફરિયાદી યુવતીના તા.1-7-2017ના જ્ઞાતિના રિવાજ મુજબ સુરત રહેતા રશીદ પોઠીયાવાલા સાથે લગ્ન થયા બાદ એક વર્ષ સુધી સારી રીતે રાખી હતી. બાદમાં પતિ ચારિત્ર્ય પર શંકા કરી તારે તારા બનેીલ સાથે અનૈતિક સંબંધ છે તેમ કહી અવાર નવાર મારકુટ કરતો હતો પરંતુ યુવતીને ઘર સંસાર ચલાવો હોય મુંગા મોઢે ત્રાસ સહન કરતી હતી. લગ્નને સાત વર્ષ વિતી જવા છતાં યુવતીને સંતાન સુખની પ્રાપ્ત ન થતાં તું વાંઝણી છે, તેમ કહી સાસુ સસરા મેણાટોણા મારતા હતા અને અહિં રહેવું હોય તો માવતરેથી પાંચ લાખ લઈ આવ તેમ કહી આઠ મહિના પહેલા ધક્કા મારી યુવતીને ઘરની બહાર કાઢી મુકતા પરણીતા પોતાના માવાતરે રિસામણે બેઠી હતી.

આઠ માસ સુધી સમાધાન માટે પ્રયાસ કરતાં હતાં પરંતુ પતિ સહિતના સાસરીયાઓ યુવતીને રાખવા માંગતા ન હોય અંતે પોલીસમાં દહેજ પ્રશ્ર્ને મારકુટ કરી ત્રાસ આપી કાઢી મુકયાની ફરિયાદ નોંધાલતાં પોલીસે વિશેષ તપાસ હાથ ધરી છે.

બે ગેંગ વચ્ચે ચાલતી માથાકૂટમાં ચોથી હત્યા, રવની ગામે પિતા-પુત્ર વાડીએથી ઘરે આવતાં હતાં ત્યારે સાત શખ્સોએ ફાયરિંગ કરી મોતને ઘાટ ઉતાર્યા

સોરઠમાં વધુ એક વખત ગેંગ વોરમાં લોહી રેડાયું છે જેમાં બેવડી હત્યાની ઘટના બની છે. ખૂન કા બદલા ખૂનમાં વંથલીના રવની ગામે કુખ્યાત રફીક સાંઘ અને તેના પુત્ર જીહાલની સાત જેટલા શખ્સોએ ગોળી મારી હત્યા કરી નાખી હતી. મૃતક જીહાલે 1 વર્ષ પૂર્વે થયેલી હત્યામ બાતમી આપી હોય તેનો બદલો લેવા આ ખૂની ખેલ ખેલાયો હતો. બે મુસ્લિમ જૂથ વચ્ચે ચાલતી આ ખૂની લડાઈમાં આ ચોથી હત્યા થઇ છે.બનાવીની જાણ થતા જુનાગઢ જિલ્લા પોલીસ વડા તેમજ વંથલીના પી.એસ.આઈ વાય.બી.જાડેજા અને તેમની ટીમ ઘટના સ્થળે દોડી ગઈ હતી. આ બનાવમાં 7 શખ્સો સામે હત્યાનો ગુનો નોંધાયો છે.

જુનાગઢ જિલ્લાના વંથલી તાલુકાના રવની ગામે વાડીએથી ઘરે પરત જતા રફીકભાઈ આમદભાઈ સાંધ અને તેનો પુત્ર જિહાલ સાંધ ઉપર સાત શખ્સોએ બે થી ત્રણ રાઉન્ડ ફાયરીંગ કરી હત્યા કરી હતી. બનાવની જાણ પોલીસ થતા ઉચ્ચકક્ષાના પોલીસ અધિકારીઓ ઘટના સ્થળે દોડી આવ્યા હતા.પોલીસે બંન્નેના મૃતદેહનો કબજો લીધો હતો અને પીએમ અર્થે સરકારી હોસ્પિટલમાં ખસેડયો હતો. વંથલીના રવની ગામે છેલ્લા ઘણા વર્ષથી ગેંગ વોર ચાલે છે. જેમાં કુખ્યાત જુસબ અલ્લારખા અને રફીકભાઈ આમદભાઈ સાંધ ગેંગ વચ્ચે ચાલતી ગેગ વોરમાં આ ચોથી લોથ ઢળી છે.

હત્યા સિલસિલો 13 વર્ષ પૂર્વે શરુ થયો હતો જેમાં જુસબ અલ્લારખા ગેંગ દ્વારા લતીફના પિતાની અબ્દુલ ઉર્ફે અબડોની હત્યા કરી હોય આ હત્યાનો બદલો લેવા લતીફ અલ્દુલ સાંધ અને તેનો મિત્ર મુસ્તાફ હનીફે 1 વર્ષ પૂર્વે ધૂળેટીની રાતે સલીમ સાંધની હત્યા કરી હતી. લતીફે પિતાની હત્યાનો બદલો લેવા ખુલ્લા પગે ચાલવાની માનતા રાખી હતી. જે ઉતારવા માટે સલીમની હત્યા કરી નાખી. સલીમ પર ધડાધડ ગોળીઓનો વરસાદ કરીને આરોપીઓ તે મર્યો નહીં ત્યાં સુધી ઊભા રહ્યા હતા. સલીમની હત્યા વખતે તેની બાતમી જેહાલ રફીક સાંઘે આપી હતી. જેનો બદલો લેવા માટે રફીકભાઈ આમદભાઈ સાંધ અને તેનો પુત્ર જિહાલ સાંધની બેવડી હત્યા કરવામાં આવી હોવાનું જાણવા મળ્યું છે.

ચકચારી ભાડેર હત્યા કેસમાં સલીમ સાંધની સંડોવણી હતી
ધોરાજી તાલુકાના પાટણવાવ પોલીસ મથકના તાબેના ભાડેર ગામમાં જમીનના ડખ્ખામાં 4 જૂલાઈ 2018ના રોજ જીવણભાઈ સાંગાણીનું અપહરણ કરી ગોળી મારીને હત્યા કરાઈ હતી. ભાડેર ગામમાં રહેતા જીવનભાઈ છગનભાઈ સાંગાણીની હત્યા પછી ભાડેર ગામમાંભારેલા અગ્નિ જેવી સ્થિતિ થઈ હતી. આ હત્યા કેસમાં કુખ્યાત જૂસૂબ તેમજ અમીન ઈસ્માઈલ, રહીમ ઉર્ફે ખુરી ઈસા, રઘુવીરસિંહ ઉર્ફે રઘુભા જસવંતસિંહને પોલીસે ઝડપી લીધા હતા. આ ભાડેર કેસ મામલે એટીએસની ટીમે જેની હત્યા થઇ તે રવની ગામના સલીમ સાંઘ અને આમદ હાસમભાઈ સાંઘને રવની ગામની સીમમાંથી પકડી લીધા હતા. સલીમ સાંઘ આ હત્યા કેસમાં પેરોલ મેળવી ફરાર થઇ ગયો હતો અને થોડા દિવસો પૂર્વે જ રાજકોટ ગ્રામ્ય એલસીબીએ તેને પકડી પાડ્યો હતો.