રાજ્ય સરકારી કર્મચારીઓ માટે મોટા સમાચાર સામે આવ્યા છે. નાણા વિભાગ દ્વારા રાજ્ય સરકારના કર્મચારીઓના મોંઘવારી ભથ્થામાં3 ટકાનો વધારો કરવામાં આવ્યો છે.જેમાં 1 જુલાઈ 2024થી 3 ટકાનો વધારો કરી 53 ટકા મોંઘવારી ભથ્થું મંજૂર કરવામાં આવ્યું છે. એટલે હવે 1 જુલાઈ 2024થી મૂળ પગારના 53 ટકા મોંઘવારી ભથ્થું પેન્શનરોને અને કર્મચારીઓને મળશે.

ગુજરાત સરકાર મોંઘવારી ભથ્થામાં વધારો કરવાની જાહેરાત કરી છે, ત્યારે તેમાં હવે રાજ્યના લગભગ 4.45 લાખ કર્મચારી સહિત 4.63 લાખ પેન્શનરોને લાભ મળશે. જેમાં રાજ્ય સરકાર અને પંચાયતના કર્મચારીઓને જુલાઈ 2024થી નવેમ્બર 2024 સુધીના મળવાપાત્ર મોંઘવારી ભથ્થાના પગાર તફાવતની રકમ ડિસેમ્બરના પગાર સાથે (પેઈડ ઈન જાન્યુઆરી 2025) રોકડમાં ચૂકવવાની રહેશે. જેમાં મોંઘવારી ભથ્થામાં 50 પૈસા અને તેના કરતાં વધુ પૈસાની ચૂકવણી આખા રૂપિયા પ્રમાણે થશે અને 50 પૈસા કરતા ઓછી રકમને ગણતરીમાં લેવામાં આવશે નહીં.

કારીગરોને ઘાટ બનાવવા આપેલા સોનામાં ઘટ હોવાનું જાણવા મળતા ચોરીની ઘટના CCTVમાં કેદ: વેપારીએ કારીગરને પકડી પોલીસને સોંપતા ફરિયાદ નોંધાઇ

રાજકોટમાં આવેલી સોની બજારમાં વધુ એક બંગાળી કારીગર સોની વેપારીનુ સોનુ લઇ ફરાર થઇ ગયો છે. આ અંગે એ ડીવીઝન પોલીસે ફરિયાદ નોંધી છે. જેમાં વેપારીએ અલગ – ઓગ દસ જેટલા કારીગરોને સોનાના ઘાટ બનાવવા સોનુ આપ્યું હતું જેમાંથી એક બંગાળી કારીગર 17.50 લાખનુ 240 ગ્રામ સોનુ લઇ ગયાની એ ડીવીઝન પોલીસે ફરિયાદ નોંધી છે. જો કે ફરિયાદીએ આરોપીને પકડી પોલીસને સોંપ્યો હતો.

બનાવની પ્રાપ્ત વિગતો અનુસાર, જાગનાથ પ્લોટમાં શીવ પેલેસ એપાર્ટમેન્ટમાં રહેતા સોની વેપારી નીરજભાઇ ગીરીશભાઇ ધાનક (ઉ.વ. 42) નામના વેપારીએ પોતાની ફરિયાદમાં મુળ બંગાળના અને હાલ રામનાથપરા સાગોર હુસેન મીનરલનુ નામ આપતા તેમની સામે સોનાની ચોરી અંગે ગુનો નોંધવામાં આવ્યો છે. ફરિયાદી નિરજભાઇ એ ફરિયાદમાં જણાવ્યું હતુ કે તેમની પ્રહલાદ મેઇન રોડ પર ગરબી ચોક પાસે ધાનક હાઉસ જી.કે.ડી જવેલર્સ પ્રા. લી નામનુ સોનાનાં દાગીના બનાવવાનુ કારખાનુ આવેલું છે. ત્યા બેસી નીરજભાઇ ધાનક વેપાર કરે છે. તેમના કારખાનામાં 40 જેટલા કારીગર કામ કરે છે.

આ કારખાનામાં દોઢેક વર્ષથી બંગાળનો અને હાલ રામનાથપરામાં રહેતો સાગોર હુસેન મીનરલ પણ કામ કરે છે. તા. 0410 થી 02/12 સુધીના સમયે બંગાળના નવ કારીગરોનેસોનાના દાગીનાના જુદા-જુદા ઘાટ બનાવવા માટે સોનુ આપ્યુ હતુ. જેમાં એસ. કે. મહીદુલને 3540.868 ગ્રામ, સબીર હુસેનને 1210.440 ગ્રામ, એસ. કે. તોફીકને 1701.3340 ગ્રામ, એસ. કે. જામીરઅલી 166.080 ગ્રામ, સાગોર હુસેનને 2640.050 ગ્રામ, શેખ હસુમદીને 1457.110 ગ્રામ, યુસુબ અલીને 1837.0460, અરૂણભાઇને 852.790 ગ્રામ અને સંદીપનને 468.430 ગ્રામ જેટલુ સોનાના જુદા – જુદા ઘાટ બનાવવા માટે સોનુ આપ્યુ હતું.

ગઇ તા. 1/12ના રોજ સવારે કારીગર દિપકનો કોલ આવ્યો હતો અને તેમણે જણાવ્યું હતુ કે, યુસુબ અલીને કામ આપ્યુ તેમાંથી અઢી ગ્રામ સોનુ ઘટે છે અને કોઇએ ચોરી કરી છે ત્યારબાદ સીસીટીવી ચેક કરતા ત્યા કામ કરતો સાગોર હુસેન છેલ્લા બે મહિનાથી ચોરી કરતો હતો તેમણે રૂા. 17.50 લાખનુ 240 ગ્રામ સોનુ ચોરી કર્યાની કબુલાત આપતા તેમને પકડી પોલીસ મથકે લાવી પોલીસને સોંપ્યો હતો. આ મામલે એ ડીવીઝન પોલીસનાં પીએસઆઇ એચ. એન. જેઠવા અને સ્ટાફે તપાસ શરૂ કરી આરોપીને ઝડપી લીધો છે.

અત્રે ઉલ્લેખનીય છે કે સોની બજારમાં દુકાન ધરાવતા ઉકીન નામના વેપારીનુ 91 ગ્રામ રૂ. 6.80 લાખનુ સોનુ લઇ તેનો કારીગર વતનમાં જતો રહયો હતો આ બારામાં વેપારીએ પોલીસ કમિશનરને તા. 7/10 ના રોજ અરજી કરી હતી આ મામલે એ ડીવીઝન પોલીસે કોઇ ફરિયાદ નહી નોંધી હોવાનુ જાણવા મળી રહયુ છે.

કારીગરોનું પોલીસ મથકમાં રજિસ્ટ્રેશન કરાવવા અપીલ
સોની બજારમાં વેપારીઓનુ સોનુ લઇ કારીગરો ફરાર થતા હોવાની અનેક ફરિયાદો પોલીસમાં નોંધાઇ છે આ મામલે એ ડીવીઝન પોલીસના પી આઇ બારોટે જણાવ્યુ હતુ કે બંગાળી કારીગરોનુ પોલીસ મથકમાં રજીસ્ટરેશન કરાવવા અપીલ કરવામાં આવી છે.

બાપા સીતારામ ચોક નજીક 5000 ચો.મી. સરકારી જમીન પરના 5 ગેરેજ-દુકાન સહિત 10 ઓરડીનું પોલીસનો બંદોબસ્ત વચ્ચે ડિમોલિશન

સરકારી જમીન પર થયેલા ધાર્મિક સહીતના દબાણો હટાવવા માટેની કાર્યવાહી કરવા સુપ્રિમના આદેશ બાદ રાજકોટ જિલ્લામાં ડિમોલીશનની કામગીરી કરવામાં આવી રહી છે. રાજકોટ જિલ્લામાં અંદાજે 2000 થી વધુ દબાણો સરકારી જમીન પર ખડકી દેવામાં આવેલા છે. તેની યાદી મુજબ દુર કરવાની કામગીરી કલેકટર તંત્ર દ્વારા કરવામાં આવી રહી છે. આજે કલેકટરની સુચના મુજબ પશ્ચિમ મામલતદાર દ્વારા રૈયા રોડ નજીક બાપા સીતારામ ચોક પાસે 50 કરોડની સરકારી જમીન ખુલ્લી કરાવાઇ હતી.

રાજકોટ શહેરના રૈયા રોડ પર આવેલ બાપા સીતારામ ચોક નજીક પશ્ચિમ મામલતદાર દ્વારા રૈયા ગામની યુએલસી ફાજલ પ્લોટ સર્વે નંબર 156 પૈકીની પાંચ હજારના ચોરસ મીટર જમીન ખુલ્લી કરવામાં આવી હતી. જેમની બજાર કિંમત 50 કરોડથી પણ વધુ થવા જાય છે. પશ્ચિમ મામલતદાર દ્વારા અગાઉ બે થી ત્રણ વખત નોટિસ આપવા છતાં પણ દબાણ દૂર ન કરતા આજે પશ્ચિમ મામલતદાર દ્વારા દબાણ દૂર કરવાની કામગીરી હાથ કરવામાં આવી હતી.

મળતી વિગતો અનુસાર આજે વહેલી સવારે જ બાપા સીતારામ ચોક નજીક વર્ષોથી અડ્ડો જમાવી બેઠેલા રૈયા ગામ સર્વે નંબર 156 પ્લોટમાં છેલ્લા કેટલાય વર્ષોથી પાંચ ગેરેજો, એક પાનની દુકાન, 10 જેટલી ઓરડિયો સહિતના દબાણો પશ્ચિમ મામલતદાર એ.એમ જોશી, નાયબ મામલતદાર મહિરાજસિંહ પી ઝાલા, સર્કલ ઓફિસર ડી એલ પાદરીયા તલાટી શૈલેન્દ્રસિંહ રાણા, પુનમબેન કોરાટ, સ્નેહલબેન ગઢવી, રોહિણીબેન લાડવા તથા ગુંજનબેન ત્રિવેદી તેમજ ગાંધીગ્રામ પોલીસના બંદોબસ્ત સાથે 50 કરોડથી વધુ કિંમતની જમીન ખુલ્લી કરવામાં આવી હતી.

પશ્ચિમ મામલતદાર એ.એમ જોષી એ જણાવ્યું હતું કે રૈયા ગામ વિસ્તારમાં ટી.પી ફાઈનલ પ્લોટ સર્વે નંબર 156 જુદા જુદા વાણિજ્ય પ્રકારના 16 જેટલા દબાણ કરવામાં આવ્યા હતા. યુ.એલ.સી પ્લોટનું દબાણ આજે ખુલ્લું કરાવવામાં આવ્યું હતું. વર્ષોથી સરકારી જમીન પર દબાણ કરેલા દબાણો પર બુલડોઝર ફરી વળ્યું હતું. સરકારની કરોડોની જમીન ખુલ્લી કરવામાં આવી હતી.વર્ષોથી પાંચ ગેરેજો, એક પાનની દુકાન અને 10 જેટલી ઓરડિયોનું બાંધકામ કરીને ભાડે આપી દેવામાં આવી હતી. ત્રણ જેટલી નોટિસ આપ્યા છતાં પણ દબાણ દૂર ન કરતા આજે પાંચ હજાર ચોરસ મીટર પ્લોટની જમીન ખુલ્લી કરવામાં આવી હતી. જેમની અંદાજી બજાર કિંમત 50 કરોડથી પણ વધુ થવા જાય છે.