અમરેલી જિલ્લા ના છેવાડા ના તાલુકા એવા વડિયા ની ભાગોળે આવેલા સાકરોડા ગામના દલિત યુવક વડિયા બસસ્ટેન્ડ માં પોતાનું મોટરસાયકલ મૂકીને ત્યાંથી મજૂરી કામે ગયા હોય સાંજના સમયે તે પરત ફરી મોટર સાયકલ લેવા ગયા ત્યારે એક બિસ્કિટ નુ પેકેટ લઇ ને એક ગાયને તેમાંથી બિસ્કિટ નાખતા તે ગાય પાસે જતા ઉભેલા શખ્સો એ ગાય સાથે ખરાબ કૃત્ય કરે છે તેવુ કહી ઢીંકા પાટુના માર મારીને જાતિ પ્રત્યે અપમાન જનક શબ્દો બોલીને તેને હડધૂત કરી વિડિઓ વાઇરલ કરેલ હતા જે બાબતે તારીખ 28/11/2024 થી આ બનાવ બાબતે સમગ્ર ગામમાં ચર્ચાઓ અને વિડિઓ વાઇરલ થતા જોવા મળ્યા હતા.આ બાબતે દલિત સમાજના યુવા આગેવાનો એ ફરિયાદ દાખલ કરાવવા આગળ ની તજવીજ હાથ ધરતા તારીખ 02/12/2024 ના રોજ ભોગ બનેલા દલિત યુવાન પર થયેલા અત્યાચાર બાબતે વડિયા ના ડો.આંબેડકર ચોક થી મોટી સંખ્યા માં રેલી સ્વરૂૂપે દલિત સમાજના લોકો એકત્રિત થઈ પોલીસ સ્ટેશન ભોગ બનનાર દલિત યુવક ની ફરિયાદ નોંધાવવા માટે ગયા હતા.

આ બાબતે બે દિવસ થી લોકમુખે થતી ચર્ચા કે કોના સામે ગુનો દાખલ થશે, ઓરીજનલ વિડિઓ ના આધારે થશે કે પછી અમુક લોકો સામે જ ગુનો દાખલ થશે તેનો અંત આવ્યો હતો. ગુનો દાખલ થયાના દિવસે એક સોશ્યલ મીડિયા ન્યૂઝ ના બ્રેકીંગ પોસ્ટર માં જે નામો લખવામાં આવ્યા હતા તે નામ ફરિયાદ માં નથી ત્યારે તે પોસ્ટર પણ ચર્ચાનો વિષય બન્યો હતુ જોકે સમગ્ર પ્રકરણ માં પોલીસ આ ઘટનાના તમામ વિડિઓ આગેવાનો અને સોશ્યલ મીડિયામાંથી એકત્ર કરી આગળની તપાસ કરે તો વિડિઓ ના આધારે હજુ અનેક નમો ખુલી શકે તેવુ લોકમુખે ચર્ચાઈ રહ્યું છે.હાલ તો ભોગ બનનાર ફરિયાદી ની ફરિયાદ ના આધારે વડિયા પોલીસમાં બીએનએસ કલમ 115 (2),352, 354 એનએસ અને અનુ. જાતિ ને અનુ. જન જાતિ પ્રતિબંધ અધિનિયમ 3(1)(e), 3(1)(r), 3(1)(s), 3(2)(va)ns મુજબ ત્રણ શખ્સો વિરુદ્ધ ગુનો નોંધી વધુ તપાસ આગળ ધરવામા આવી છે.

મુખ્યમંત્રી ભૂપેન્દ્ર પટેલે અમરેલી જિલ્લાની ધારી ગ્રામ પંચાયતને નગરપાલિકાનો દરજ્જો આપવાના નિર્ણયને અનુમતિ આપી છે. ધારી ગ્રામ પંચાયતમાં ધારીની આસપાસના પ્રેમપરા, હરિપરા, વેકરીયાપરા, નવાપરા-લાઈનપરા જૂથ ગ્રામપંચાયત ભેળવી દઈને આ ધારી નગરપાલિકાની રચના કરવામાં આવશે.

અમરેલી જિલ્લાનું ધારી આંબરડી સફારી પાર્ક તથા પ્રાચીન ગળધરા ખોડીયાર માતા મંદિરથી 6 કિલોમીટરના અંતરે વસેલું છે. એટલું જ નહિં, ધારીમાં ગીર પૂર્વ અભયારણ્ય અને જંગલ વિસ્તાર આવેલા હોઈ મોટી સંખ્યામાં વર્ષ દરમ્યાન પ્રવાસીઓ આવતા રહે છે.

આ આંબરડી સફારી પાર્ક અને ગીર પૂર્વ અભયારણ્ય વિસ્તારમાં આવનારા પ્રવાસીઓને વધુ સુવિધાઓ મળી રહે તેમજ સ્થાનિક રોજગારી સાથે આર્થિક-સામાજિક જીવનમાં પણ ઉન્નતિ થાય તેવા પ્રવાસન વિકાસના ધ્યેય સાથે ધારીને નગરપાલિકાનો દરજ્જો આપવાનો મુખ્યમંત્રીએ નિર્ણય કર્યો છે.એટલું જ નહિં, ધારી તાલુકાના 25 જેટલા ગામો જંગલ વિસ્તારના હોવાથી ક્યારેક જંગલની આગના બનાવો બને તેવા સમયે ફાયર ફાઈટર અને અગ્નિશમન સેવાઓ પણ આ નગરપાલિકા દ્વારા સરળતાએ સમયસર મળે તેવો આશય પણ નગરપાલિકાની રચનામાં રહેલો છે.

ધારીને નગરપાલિકાનો દરજ્જો મળતા આ વિસ્તારનો સર્વગ્રાહી વિકાસ થશે અને પ્રવાસનને વેગ મળશે તેમજ નગરપાલિકાની નાગરિક લક્ષી સુવિધા મળવાથી લોકોના ઈઝ ઓફ લિવિંગમાં પણ વૃદ્ધિ થશે.આ ધારી નગરપાલિકા રાજ્યની 160મી નગરપાલિકા બનશે. અત્યારે નઅથ વર્ગની 22, નબથ વર્ગની 30, નકથ વર્ગની 60 અને નડથ વર્ગની 42 મળી કુલ 159 નગરપાલિકાઓ કાર્યરત છે.હવે તેમાં આ નવી પડથ વર્ગની નગરપાલિકા ધારી નગરપાલિકાનો ઉમેરો થશે.

મુખ્યમંત્રી ભૂપેન્દ્ર પટેલે આ ઉપરાંત અન્ય એક નિર્ણય લઈને સાબરકાંઠાની ઈડર નગરપાલિકામાં જવાનપુરા-સદાતપુરા ગામ અને સોસાયટી વિસ્તારનો પણ સમાવેશ કરવાની દરખાસ્તને અનુમતિ આપી છે.

ચિતલના જશવંતગઢપરામા આજે એક વિપ્ર પ્રૌઢા પોતાના ઘરે એકલા હતા ત્યારે કોઇ અજાણ્યા શખ્સોએ તેમના ગળા પર તિક્ષણ હથિયારના ઘા મારી ઘાતકી હત્યા કરી નાખી હતી. ઘરમાથી લુંટ કે ચોરી થઇ ન હોય અને પરિવારને કોઇ સાથે વિખવાદ ન હોય હત્યાના કારણ અંગે ઘેરૂૂ રહસ્ય સર્જાયુ છે.

હત્યાની આ ઘટના અમરેલી તાલુકાના ચિતલ ખાતે જશવંતગઢપરામા લીમડાવાળી શેરીમા રાજગોર ફળીમા બની હતી. જયાં પ્રભાબેન ભાનુશંકર તેરૈયા (ઉ.વ.55) નામના પ્રૌઢની કોઇ અજાણ્યા હત્યારાઓએ નિર્મમ હત્યા કરી નાખી હતી. તેમના પતિ ભાનુશંકર ભીમજીભાઇ તેરૈયા નિવૃત શિક્ષક છે અને આજે સવારે તેઓ પોતાની વાડીએ હતા. અને પ્રભાબેન ઘરે એકલા હતા ત્યારે આ ઘટના બની હતી.

હત્યારાએ પ્રભાબેન પર કોઇ તિક્ષણ હથિયારનો ગળાના પાછળના ભાગે એટલો જોરદાર પ્રહાર કર્યો હતો કે અડધુ ગળુ કપાઇ ગયુ હતુ. તેમની શેરીમા મોટાભાગના મકાન બંધ હાલતમા છે. અને શેરીમા પ્રભાબેન એકલા જ પોતાના ઘરે હતા. તેમણે શરીર પર પહેરેલા સોનાના દાગીના અને ઘરમા પડેલી રોકડ સહિતની માલમતા પણ અકબંધ હતી. વળી તેમના પરિવારને કોઇ સાથે અણબનાવ કે દુશ્મની ન હોય આ હત્યા કોણે કરી તે સ્પષ્ટ થઇ શકયુ ન હતુ. બનાવની જાણ થતા અમરેલી તાલુકા પોલીસ ઘટના સ્થળે દોડી ગઇ હતી. એલસીબી, એફએસએલ અને ડોગ સ્કવોડ પણ તપાસમા જોડાયા બાદ હજુ સુધી હત્યારા અંગે કોઇ કડી મળી ન હતી.

પ્રભાબેનના પુત્ર રાજુભાઇ તેરૈયા અમરેલીમા નાયબ મામલતદાર છે અને પુરવઠા ઇન્સ્પેકટર તરીકે કામ કરે છે. તેમને ત્યાં પુત્રીનો જન્મ થયો હોય પ્રભાબેન હાલમા તેમને ત્યાં જ રહેતા હતા અને છેલ્લા આઠ દિવસથી જ ચિતલ ગયા હતા. ઘટના સ્થળ આસપાસ કોઇ સીસીટીવી કેમેરા પણ ન હતા. થોડે આગળ બજારમા સીસીટીવી કેમેરા હોય તેની તપાસ કરાતા હત્યાના સમયગાળામા થોડા લોકો અને બાઇક ચાલકોની અવરજવર દેખાઇ હતી. જે પૈકી એક બાઇક ચાલક મોઢુ ન દેખાય તે રીતે હેલ્મેટ પહેરેલો હોય પોલીસે તેના પર તપાસ કેન્દ્રિત કરી છે. તસવીર: ભરત અમરેલીયા