શહેરના નાનામવા રોડ પર દેવનગરમાં રહેતો પરિવાર દિવાળીની રજાઓમાં રાજસ્થાન ફરવા જતા પાછળથી તેમના બંધ મકાનને નિશાન બનાવી અહીંથી રોકડ રકમ અને સોના ચાંદીના-દાગીના સહિત 1.13 લાખની મત્તા ચોરી કરી લીધી હતી.

મળતી વિગતો મુજબ,નાનામવા મેઈન રોડ પર વાત્સલ્ય હોસ્પિટલ પાસે દેવનગર શેરી નંબર છ માં રહેતા રાહુલ રમેશભાઈ દાફડા(ઉ.વ 26) નામના યુવાને માલવિયાનગર પોલીસ સ્ટેશનમાં નોંધાવેલી ફરિયાદમાં જણાવ્યું હતું કે, ગત તા.4/11 ના બપોરના સમયે તે તથા તેમના પિતા તેમના માતા અને પત્ની સહિતનાઓ મીની બસમાં રાજસ્થાન ફરવા માટે ગયા હતા.દરમિયાન 7/11 ના તેઓ જેસલમેર હતા.ત્યારે સવારે પાડોશી અને સંબંધી અનિલભાઈ વાઘેલાનો ફોન આવ્યો હતો અને કહ્યું હતું કે, તારા ઘરમાં તાળા તૂટેલા છે અને ચોરી થઈ હોય તેવું લાગે છે. જેથી આ બાબતે યુવાને તેના ભાઈ લલિત દાફડા તથા મામા આદિત્ય પરમારને ફોન કરી જાણ કરી હતી. જેથી બંને પોલીસ સ્ટેશન ગયા હતા અને યુવાન તથા તેનો પરિવાર રાજકોટ આવવા માટે નીકળી ગયો હતો.

ગઈકાલે રાત્રિના અઢી વાગ્યે તેઓ ઘરે પરત આવ્યા બાદ અહીં આવી જોતા ઘરનો દરવાજો ખુલ્લો હોય હોલમાં પડેલ ફરિયાદીના માતાની પતરાની તિજોરી તથા રૂૂમમાં રહેલી તિજોરી તૂટેલી હાલતમાં હતી જેથી તપાસ કરતા માલુમ પડ્યું હતું કે, ફરીયાદીના પત્ની કોમલબેનએ તિજોરીમાં રાખેલ સોનાની વીંટી, ચાંદીનો કંદોરો તથા ગલ્લામાં રાખેલ રૂૂપિયા 40 હજાર રોકડ તેમજ તેમના માતાએ તિજોરીમાં તપાસ કરતા સોનાના જુના પાટલા તથા વીંટી અને ચાંદીની જૂની ઝાંઝરી જોવા મળી ન હતી. આમ કુલ રૂૂપિયા 1.13 લાખની મત્તાની ચોરી થઈ હોવાનું માલુમ પડ્યું હતું.

ત્યારબાદ પાડોશીના ઘરમાં લગાવેલા સીસીટીવી કેમેરા ચેક કરતા એક શખ્સ મોઢે રૂૂમાલ બાંધી અહીં ઘર પાસે પસાર થતો હોવાનું દેખાયું હતું અને તે રાજનગર ચોક તરફ ગયાનું માલુમ પડ્યું હતું. જેથી આ મામલે યુવાને ફરિયાદ નોંધાવતા માલવીયાનગર પોલીસે ગુનો નોંધી તપાસ શરૂૂ કરી છે.

શહેરના રૈયા ગામમાં બહેન સાથે દુષ્કર્મ કર્યાના આક્ષેપ સાથે યુવતિના બે ભાઈઓએ જેના સામે દુષ્કર્મનો આક્ષેપ થયો હોય તેના ઘર ઉપર હુમલો કરી તેના માતા-પિતાને માર મારી ઘરમાં તોડફોડ કરતા સમગ્ર મામલે યુનિવર્સિટી પોલીસ મથકમાં ફરિયાદ નોંધાતા પોલીસે ગુનો નોંધ્યો છે. અને આ અંગે તોડફોડ કરનાર બન્ને શખ્સોની ધરપકડ કરવા તપાસ શરૂ કરી છે. મળતી વિગતો મુજબ રૈયા ગામમાં જે.કે. ચોક પાસે રહેતા અને ઘરકામ કરતા રંભાબેન ભીખાભાઈ અઘારિયાએ નોંધાવેલ પોલીસ ફરિયાદમાં આરોપી તરીકે રૈયા ગામમાં તેના ઘર નજીક જ રહેતા વાલજી ઉર્ફે પતાળિયો લાલજીભાઈ સાડમિયા અને વનરાજ ઉર્ફે પોઠિયો લાલજીભાઈ સાડમિયાનું નામ આપ્યું છે.

રંભાબેને ફરિયાદમાં જણાવ્યા મુજબ તેઓ પોતાના ઘરે હતા ત્યારે પાડોશમાં રહેતા મહિલાએ ઘરની બહાર બે શખ્સો ગાળો બોલતા હોવાનું જણાવતા રંભાબેન બહાર નિકળ્યા હતા. ત્યારે વાલજી અને તેનો ભાઈ વનરાજ ત્યાં ઉભા હતાં રંભાબેન અને તેમના પતિ ભીખાભાઈએ ગાળો બોલવાની ના પાડતા બન્ને ભાઈઓએ રંભાબેનને કહેતા તમારા પુત્ર અર્જુને મારી બહેન સાથે દુષ્કર્મ કર્યુ હોય અને હાલ ગર્ભવતી હોય અને હવે લગ્ન કરવાની ના પાડે છે. તેમ કહીને માથાકુટ કરી હતી.

વાલજી અને વનરાજ બન્નેએ લોખંડના સળિયા લઈને ઘરમાં ઘુસ્યા હતા એન રંભાબેન અને ભીખાભાઈ ઉપર હુમલો કર્યો હતો. તેમજ દરવાજામાં તથા ઘરમાં પડેલા ટીવી, ફ્રીજ અને રસોડામાં પડેલા તેલના ડબા તોડફોડ કરી તેલ ઢોળી નાખ્યુ હતું. બન્ને ભાઈઓએ કરેલા હુમલામાં રંભાબેન અને ભીખાભાઈને ઈજા થતાં બન્નેને સારવાર માટે સિવિલ હોસ્પિટલમાં ખસેડવામાં આવ્યા છે. આ મામલે યુનિવર્સિટી પોલીસ મથકમાં ફરિયાદ નોંધાવી છે. રંભાબેને પોલીસને જણાવ્યું કે, પોતાનો પુત્ર અર્જુન કે જે હાલ રાજકોટમાં ન હોય તેને વાલજીની બહેન સાથે સબંધ હોય બન્ને વચ્ચે શરીર સબંધ બંધાયો હોય અને જેથી તેની બહેન ગર્ભવતી બની હોય અર્જુને લગ્ન કરવાની ના પાડતા બન્ને ભાઈઓએ હુમલો કર્યો હતો.

ગુમ થયેલી પત્નીની માહિતી માટે ઘરે બોલાવી મિત્રએ મિત્રને રહેંસી નાખ્યો

ચંદ્રેશનગરમાં બનેલા હત્યાના બનાવમાં સંડોવાયેલ બે શખ્સોની ધરપકડ

ગુમ થયલી ગયેલી પત્નીની માહિતી બાબતે ચંદ્રેશનગરમાં મિત્રને ઘરે બોલાવી મહિલાના પતિ અને તેના મિત્રે ચામુંડાનગરમાં રહેતા કમલેશ વિનોદભાઈ રાઠોડ (ઉ.વ.24) ઉપર હુમલો કરી ભાગી ગયા હતા.મિત્રના ઘરેથી ઈજાગ્રસ્ત મળેલા યુવાનનું સારવાર મળે તે પહેલા જ મોત થતા આ બાદ બનાવ હત્યામાં પલટાયો હતો. આ મામલે પોલીસે તપાસ કરી હત્યામાં સંડોવાયેલ બે શખ્સોને માલવિયાનગર પોલીસે સકંજામાં લઈ વધુ તપાસ હાથ ધરી છે.સપ્તાહ પુર્વે બન્ને મિત્રો વચ્ચે થયેલી માથાકૂટમાં જો પોલીસ ફરિયાદ કરી હોત તો કમલેશનો જીવ બચી ગયો હોત.આ ઘટનામાં ચામુંડાનગરમાં યોગી ફરસાણ પાસે રહેતા અને પારકા ઘરમાં સફાઈ અને વાસણનું કામ કરતા પારૂૂલબેન વિનોદભાઈ રાઠોડની ફરિયાદને આઘારે માલવિયાનગર પોલીસે નીલેશ વાઘેલા અને આશિષ ઉર્ફે પુંગા સામે હત્યાનો ગુનો નોંધ્યો છે. ફરિયાદમાં પારુલબેને જણાવ્યું કે, તે પારકા કામ કરે છે.

પતિ બૂટ-ચંપલ શીવવાનું કામ કરે છે. સંતાનમાં બે પુત્ર છે જેમાં મોટો કમલેશ હતો તે ખાનગી સિક્યુરીટીમાં નોકરી કરતો હતો. પારૂૂલબેન સવારે પારકા કામ કરવા માટે નીકળી ગઈ હતી તે પહેલા પુત્ર કમલેશ સવારે સાત વાગે ઘેરથી ચા-નાસ્તો કરીને નીકળી ગયો હતો. બપોરે 3 વાગ્યા સુધી કમલેશ ઘરે ન આવતા પરુલ્બેને પતિ વિનોદભાઈને ફોન કર્યો હતો પણ વિનોદભાઈએ ફોન ઉપાડયો ન હતો. બપોરે ઘરે જમીને પારૂૂલબેન લક્ષ્મીનગર સોસાયટીમાં ઘરકામ કરવા માટે ગયા ત્યારે થોડીવાર પછી દેરાણી મીનાબેને ફોન કમલેશ ઈજાગ્રસ્ત હાલતમાં મળ્યો હોય તેમ જણાવતા પારૂૂલબેન ઘરે ગયા બાદ દેરાણી અને પાડોશી સાથે રિક્ષામાં સિવિલ હોસ્પીટલે પહોંચ્યા હતા. પરતું કમલેશને સારવાર મળે તે પૂર્વે જ તેનું મોત થયું હતું. કમલેશને જમણા હાથના અંગુઠા પાસે અને ડાબા હાથે કોણી પાસે છરી જેવા હથિયારથી ઇજા થયેલી હતી.

પારૂૂલબેને તપાસ કરતા પાડોશીઓ પાસેથી તેને જાણવા મળ્યું હતું કે, કમલેશ આજ સવારથી ચંદ્રેશનગરમાં રામ મંદિરવાળી શેરીમાં રહેતા નિલેશ વાઘેલા અને તેના મિત્ર આશિષ સાથે તેના ઘરે હતો. બપોરે તેઓ વચ્ચે ઝઘડો અને બોલાચાલી થઈ હતી. દેકારો થતા પાડોશીઓ નિલેશના ઘરમાં ગયા હતા જ્યાં કમલેશ લોહી લુહાણ હાલતમાં મળી આવ્યો હતો. બનાવ બાદ નિલેશ અને આશિષ ભાગી ગયા હતા. નિલેશ જીલુભાઈ વાઘેલા અને તેના મિત્ર આશિષે ઝઘડો કરી કમલેશ ઉપર હુમલો કર્યાનું ખુલ્યું હતું. ઢોર મારને કારણે કમલેશ બેભાન થઈ ગયા બાદ તેનું મોત થયું હોય આ બનાવ હત્યામાં પલટાયો હતો. સિવિલ હોસ્પિટલ પોલીસ દ્વારા માલવિયાનગર પોલીસને જાણ કરતા પીઆઇ દેસાઈ તેમજ એલસીબી,ક્રાઈમ બ્રાંચની ટીમ પણ હોસ્પીટલ અને ઘટના સ્થળે દોડી ગઈ હતી. બનાવ બાદ પોલીસે ગણતરીના કલાકોમાં જ નીલેશ અને આશિષને સકંજામાં લીધા હતા.

પોલીસની પ્રાથમિક તપાસમાં જણવા મળ્યું કે,હત્યાનો ભોગ બનેલો કમલેશ અને નિલેશ બન્ને મિત્રો હતા. નીલેશની પત્ની કવિતા છેલ્લા પાંચેક માસથી પતિ અને બાળકોને મુકી ઘર છોડીને જતી રહી હતી. જેથી નિલેશને એવી શંકા હતી કે ગુમ થયેલી તેની પત્ની કવિતાને મિત્ર કમલેશ સાથે પ્રેમસંબંધ છે અને કવિતા કમલેશના ઘરે છે અથવા કમલેશને ખબર છે કે કવિતા ક્યાં છે. આ કારણસર બંને મિત્રો વચ્ચે સપ્તાહ પૂર્વે પણ બોલાચાલી થઈ હતી. બનાવના દિવસે નીલેશે મિત્ર કમલેશને ઘરે બોલાવ્યા પત્ની કવિતા બાબતે પૂછતા બન્ને વચ્ચે ઝઘડો થતાં નીલેશે તેના મિત્ર આશિષ સાથે મળી કમલેશ ઉપર છરીથી હુમલો કરી બન્ને ભાગી ગયા હતા.

મૃતક કમલેશ અપરણિત હતો અને ખાનગી સિક્યુરીટીમાં નોકરી કરતો હતો તે બે ભાઈમાં મોટો હતો. કમલેશના નાના ભાઈ કેતન ઉર્ફે કલ્પેશ ઉર્ફે બચ્ચનનું છ માસ પૂર્વે અકસ્માતમાં મોત થયું હતું. કમલેશના પિતા વિનુભાઈમોચીકામ કરે છે અને તેમને પણ બે દિવસ પૂર્વે હાર્ટએટેક આવ્યો હોય સિવિલ હોસ્પીટલમાં દાખલ ક્યાં હતા.સપ્તાહ પૂર્વે બન્ને મિત્રો વચ્ચે થયેલી માથાકૂટમાં પોલીસ ફરિયાદ કરવામાં આવી ન હતી જો પોલીસ ફરિયાદ કરી હોત તો કમલેશને જીવ ગુમાવવાનો વારો આવ્યો ન હોત.