ગુજરાત
ગેનીબેન ઠાકોરની જીત….પુરુષાર્થ, દ્રઢ મનોબળ, બુલંદ આત્મવિશ્વાસની જીત
![](https://gujaratmirror.in/wp-content/uploads/2024/06/udan-2.png)
1995માં પ્રથમ વાર અબાસણા તાલુકા પંચાયતની ચૂંટણીમાં જીત મેળવીને રાજકારણમાં પ્રથમ પગલું માંડ્યું
જીત મેળવીને દિલ્હી દરબારમાં પહોંચેલ ગેનીબેને ખાસ ઉડાન માટે કરેલ વાતચીત અને લાગણી પ્રસ્તુત છે
તાજેતરના ચૂંટણી પરિણામોમાં ગુજરાતની એક બેઠકની જીત દ્વારા જીવનના અનેક પાઠ લોકોને શીખવા મળે છે. અહીંની બેઠકના કારણે અપ સેટ સર્જાયો છે.વિરોધ પક્ષો પણ આ બેઠકના ઉમેદવારની જીતને બિરદાવે છે. અશક્યને શક્ય કરનાર તેમજ કાંટાળી કેડીમાં પોતાની મઘમઘતી જીતનો માર્ગ કંડારનારા આ ઉમેદવાર છે ગેનીબેન ઠાકોર.જ્યારે સહુ કોઈ આ બેઠકથી દૂર ભાગતા હતા ત્યારે ગેનીબેને સામેથી પક્ષ પાસે આ બેઠકની માગણી કરીને જીતી બતાવવાનો આત્મવિશ્વાસ વ્યકત કર્યો હતો એટલું જ નહીં તેઓએ ખરેખર જીતીને લોકોના મોં પર જડબાતોડ જવાબ આપ્યો છે. આ જીત છે પુરુષાર્થની, આ જીત છે નારી શક્તિની, આ જીત છે બુલંદ આત્મવિશ્વાસની,આ જીત છે દ્રઢ મનોબળની.જીત મેળવીને ગેનીબેન દિલ્હી દરબારમાં પહોંચ્યા છે ત્યારે ઉડાન માટે દિલ્હીથી તેઓએ કરેલ વાતચીત અને તેમની લાગણી પ્રસ્તુત છે.
ગેનીબેનનો જન્મ બનાસકાંઠાના ભાભર તાલુકાના અબાસણા ગામમાં થયો હતો. ગેનીબેનના પિતા નગાજી ઠાકોર અને માતા મશુબેન ઠાકોર.પાંચ સંતાનોમાં દીકરી ગેનીબેન ભણવામાં તેજસ્વી અને બહિર્મુખી હતા. એ સમયે ગામમાં દીકરીને શાળાએ મોકલવાનું કોઈ ચલણ નહોતું છતાં માતા પિતાએ ગામ લોકોના વિરોધ વચ્ચે ગેનીબેનને ભણાવ્યા અને આગળ વધવા પ્રોત્સાહન આપ્યું.
પોતાની રાજકીય કારકિર્દીના પ્રારંભ વિશે વાત કરતાં ગેનીબેન ઠાકોર જણાવ્યું હતું કે,‘પિતા નગાજી ઠાકોર વર્ષ 1977માં પ્રથમ વાર તાલુકા પંચાયતના સભ્ય બન્યા હતા. મેં 1995માં પ્રથમ વાર અબાસણા તાલુકા પંચાયતની સુથારની નેસડી સીટ પરથી ચૂંટણી લડીને જીત મેળવી એ મારું રાજકારણમાં પ્રથમ પગલું હતું. પ્રથમ વાર સભ્ય તરીકે ચૂંટાઇને તાલુકા પંચાયતના પ્રમુખ બનવાનો મોકો મળ્યો.પિતાજીની ઇચ્છા હતી કે તેમનો રાજકારણનો વારસો હું આગળ ધપાવું એટલે તેમની સાથે દરેક નેતાને મળવા સાથે લઈ જતા’.
પોતાની જીત બાબત ગેનીબેને જણાવ્યું હતું કે, ‘બનાસકાંઠાની જે જનતા આઝાદી ઇચ્છતી હતી, સાચી લોકશાહીના દર્શન કરવા માગતી હતી એ પ્રજા સ્વયંભૂ મતદાન માટે આગળ આવી છે.જીત પાર્ટી માટે, લોકો માટે છે’. જે વાયદા લોકોને કર્યા છે એ વાયદા તંત્રના માધ્યમથી પૂરા કરવા માટે મહેનત કરીશ અને લોકોને ન્યાય અપાવવાનો પ્રયાસ કરીશ.
પોતાની જીતના કારણો જણાવતા કહ્યું કે,‘મારી કામગીરી લોકો ઘણા વર્ષોથી જાણે છે. નાનામાં નાના લોકોના પ્રશ્નોને લઈને પણ અહીં કામગીરી થઈ છે ખાસ કરીને બહેનો આગળ આવે શિક્ષિત બને અને પગભર બને તેવી મારી ઈચ્છા છે. ચૂંટણીના સમયે લોકોને ઠાલા વચનો નહીં પરંતુ ઠોસ કામગીરી કરીને વિશ્વાસ જીતી શકાય છે. જ્યારે તમે લોકોના હૃદય સુધી પહોંચીને પ્રચાર કરો છો ત્યારે હંમેશા તે લોકોને સ્પર્શે છે. ચૂંટણી સમયે મેં જે નોટ અને વોટ માટે હાકલ કરી હતી તે લોકોના હૃદય સુધી પહોંચી અને બદલામાં તેઓએ વોટના ઢગલા કરી મને જીતાડી હતી. લોકોને આપેલા તમારા વચનો અમૂલ્ય હોય છે પરંતુ તેનો અમલ પણ થવો જરૂૂરી છે. મતદારોને અને પક્ષને મારા પર ભરોસો હતો કે અન્યાય સામે લડશે તેમજ લોકોના પ્રશ્નો માટે અવાજ ઉઠાવશે આમ તેમની તમામ અપેક્ષાઓ સંતોષાતા લોકોએ મત આપી પોતાની લાગણી વ્યક્ત કરી આ માટે હું દરેકનો દિલથી આભાર માનું છું’.
સમગ્ર ગુજરાતમાં કોંગ્રેસની ફક્ત એક બેઠક જીતીને ગેનીબેને અનેક લોકોના દિલ જીતી લીધા છે. ભારતીય જનતા પાર્ટીને પણ બોધપાઠ લેવા મજબૂર કરી છે ત્યારે ગેનીબેનનું સ્થાન પક્ષમાં પણ મહત્ત્વનું બન્યું છે. સોનિયા ગાંધી અને રાહુલ ગાંધી સાથેની મુલાકાત વચ્ચે તેઓએ ઉડાન માટે મુલાકાત આપી હતી.ભવિષ્યમાં લોકોના કામ કરી,લોકોની સેવા કરી, લોકોના હૃદયમાં પોતાનું સ્થાન મેળવવાનું સ્વપ્ન જોતા ગેનીબેન ઠાકોરને ખૂબ ખૂબ શુભેચ્છાઓ…..
પરિશ્રમથી જ પારસમણિ જેવી સફળતા મળે છે
મહિલાઓને સંદેશ આપતા ગેનીબેને જણાવ્યું હતું કે પુરુષાર્થનો કોઈ વિકલ્પ નથી.પરિશ્રમથી જ પારસમણિ જેવી સફળતા મળે છે.ક્યારેય મહેનત કરવાથી ભાગો નહીં.મહિલાઓ શિક્ષિત બને, આત્મનિર્ભર બને તે જરૂરી છે.જીવનમાં ક્યારેય સંઘર્ષથી ડરો નહીં તેનો હિંમતપૂર્વક સામનો કરો.
રસપ્રદ રાજકીય કારકિર્દી
ગેનીબેન 1995થી રાજકારણમાં સક્રિય રહ્યા છે. પોતાના અંગત વિચારો નીડરતાપૂર્વક વ્યક્ત કરવામાં ગેનીબેને ક્યારેય પાછી પાની કરી નથી. વર્ષ 1995થી 2000 સુધી દિયોદર તાલુકા પંચાયતના પ્રમુખ તરીકે સેવા આપી હતી. 2003થી 2007 સુધી ભાભર તાલુકા પંચાયતના પ્રમુખ તરીકે સેવા આપી હતી. વર્ષ 2008 થી 2013 સુધી બનાસકાંઠા જિલ્લા પંચાયતમાં હેલ્થ કમિટી અને સિંચાઇ કમિટીના ચેરમેન તરીકે સેવા આપી હતી. વર્ષ 2013થી 2017 સુધી ભાભર તાલુકા પંચાયતના સભ્ય તરીકે સેવા આપી. વર્ષ 2017થી વર્ષ 2022ની વિધાનસભા ચૂંટણીમાં વાવ બેઠક પરથી જીત મેળવી હતી.આ બધા વચ્ચે 2024ની જીત જાણે રાજકીય કારકિર્દીમાં માઈલ સ્ટોન સાબિત થઈ શકે છે.
ગુજરાત
પૂર્વ TPO સાગઠિયાની ઓફિસમાંથી 5 કરોડની રોકડ અને 15 કિલો સોનું મળ્યું
![](https://gujaratmirror.in/wp-content/uploads/2024/07/content_image_29899dbe-f7a6-476b-bbf9-a8793ba8a36c-1.jpeg)
જેલમાંથી એમ.ડી.સાગઠિયાનો કબજો લીધા બાદ રાજકોટ અને સુરેન્દ્રનગર એસબીની ટીમનું ટ્વિન ટાવરમાં સર્ચ ઓપરેશન
રાજકોટનાં ટીઆરપી ગેમઝોન અગ્નિકાંડમાં સસ્પેન્ડ થયેલા મહાનગરપાલિકાના પૂર્વ ટાઉન પ્લાનીંગ ઓફિસર મનસુખ ધનાભાઈ સાગઠીયા વિરૂધ્ધ લાંચ, રૂશ્વત વિરોધી બ્યુરો દ્વારા અપ્રમાણસર મિલકત અંગેની તપાસ કરી દસ્તાવેજી પુરાવા બાદ તેના સામે અપ્રમાણસર મિલ્કતનો ગુનો નોંધવામાં આવ્યો હોય જેમાં સાગઠીયા પાસે 10 કરોડથી વધુની અપ્રમાણસર મિલ્કત હોવાનું બહાર આવ્યું હતું. ક્રાઈમ બ્રાંચની પુછપરછ બાદ જેલ હવાલે થયેલા એમ.ડી.સાગઠીયાનો એસીબીએ કબજો લઈ તપાસ શરૂ કરી હતી અને આજે તેની ટવીન ટાવર ખાતે આવેલી ઓફિસમાં કરેલું સીલ ખોલ્યા બાદ સર્ચ ઓપરેશન કરતાં તિજોરીમાંથી પાંચ કરોડ રોકડા અને 15 કિલો સોનુ મળી આવ્યું હતું. આ અંગે એસીબીએ સાગઠીયાની વિશેષ પુછપરછ શરૂ કરી છે.
રાજકોટના પૂર્વ ટાઉન પ્લાનીંગ ઓફિસર વર્ગ-1ના અધિકારી એમ.ડી.સાગઠીયાની મિલકતો અંગે અને દસ્તાવેજ માહિતીના આધારે તેની પાસે 10 કરોડથી વધુની અપ્રમાણસર મિલકત હોવાનું એસીબીની તપાસમાં બહાર આવ્યું હતું. આવક કરતાં 410.37 ટકાથી વધુ અપ્રમાણસર મિલકત બાબતે રાજકોટ એસીબી પોલીસ સ્ટેશનમાં સાગઠીયા વિરૂધ્ધ ભ્રષ્ટાચાર નિવારણ અધિનિયમ હેઠળ ગુનો દાખલ કરવામાં આવ્યો હતો. આ અંગેની તપાસ સુરેન્દ્રનગર એસીબીના પીઆઈ લાલીવાલા અને તેમની ટીમ કરી રહી છે. સાગઠીયા પાસે પેટ્રોલ પંપ, ગોડાઉન, હોટલ તેમજ ફાર્મહાઉસ, ખેતીની જમીન, વાહનો અને વિદેશમાં કરેલી ટુર અંગેની માહિતી એસીબીને મળ્યા બાદ અપ્રમાણસર મિલકતનો ગુનો નોંધાયો હતો. બીજી તરફ બરતરફ કરાયેલા એમ.ડી.સાગઠીયાએ મહાનગરપાલિકાની મિનીટસબુકમાં છેડછાડ કરી હોય જે બદલ ક્રાઈમ બ્રાંચે જેલમાંથી તેનો કબજો લીધો હતો અને ફરી રિમાન્ડ મેળવી પુછપરછ કરી જેલ હવાલે કર્યો હતો.
અપ્રમાણસર મિલકત અંગેની તપાસ કરતી એસીબીની ટીમે જે તે વખતે મહાનગરપાલિકાને સાથે રાખી કાલાવડ રોડ પર આવેલ ટવીન ટાવર બિલ્ડીંગમાં પૂર્વ ટાઉન પ્લાનીંગ અધિકારીની ઓફિસને સીલ કરી હતી. આ મામલે એસીબીએ વધુ તપાસ માટે સાગઠીયાની ઓફિસનું સીલ ખોલી ઓફિસમાં સર્ચ ઓપરેશન હાથ ધરતાં ત્યાંથી એક તિજોરીમાં રાખેલા પાંચ કરોડની રોકડ અને 15 કિલો સોનુ મળી આવ્યું હતું. અપ્રમાણસર મિલકતના ગુનામાં સાગઠીયા વિરૂધ્ધ તપાસ કરી રહેલી એસીબીએ આ તમામ મુદ્દામાલ કબજે કર્યો છે અને આ બાબતે આગળની તપાસ શરૂ કરાઈ છે. જેલમાંથી મનસુખ સાગઠીયાનો કબજો લઈ તેને સાથે રાખી તેની જ સીલ કરાયેલી ઓફિસમાં સર્ચ ઓપરેશન કરવામાં આવ્યું હતું. જેમાં રોકડ અને સોનુ મળી આવ્યું હોય તેમજ હજુ પણ તેના અન્ય બેંક લોકરો અને ઓફિસમાં સર્ચ ઓપરેશન હાથ ધરવામાં આવશે.
સાગઠિયાની ઓફિસમાંથી થોકબંધ દસ્તાવેજો મળ્યા: કાળાકારોબારનો થશે પર્દાફાશ
સસ્પેન્ડ કરાયેલા પૂર્વ ટાઉન પ્લાનીંગ ઓફિસ મનસુખ સાગઠીયાની ઓફિસમાં એસીબીએ હાથ ધરેલા સર્ચ ઓપરેશન દરમિયાન થોકબંધ દસ્તાવેજો મળી આવ્યા છે. રાજકોટમાં અનેક નામાંકીત બિલ્ડરો સાથે આર્થિક વહીવટ કરનાર પૂર્વ ટાઉન પ્લાનીંગ ઓફિસરને ત્યાંથી મળેલા આ થોકબંધ દસ્તાવેજો તેના કાળાકારોબારનો પર્દાફાશ કરશે. સાગઠીયાના ભ્રષ્ટાચારની ચર્ચાઓ છડે ચોક થઈ રહી છે ત્યારે આ મામલે એસીબી તપાસ કરશે તો રાજકોટના બિલ્ડરો સાથેની તેની સાંઠગાંઠના પુરાવા એસીબીને મળી શકે છે. હાલ જેલમાંથી એસીબીએ સાગઠીયાનો કબજો લઈ તેની પુછપરછ શરૂ કરી છે ત્યારે આ પ્રકરણમાં હજુ પણ ચોંકાવનારી વિગતો સામે આવી શકે છે.
ગુજરાત
લીંબડીમાં બે મકાનમાંથી 17 તોલા સોનું અઢી કિલો ચાંદીના દાગીનાની ચોરી
![](https://gujaratmirror.in/wp-content/uploads/2024/07/content_image_0a101930-f866-4023-98e0-51729e312a49.jpeg)
લીંબડી હાઈવે નજીક આવેલી સોસાયટીઓના 2 બંધ મકાનમાં તસ્કરો ત્રાટક્યા હતા. બન્ને મકાનોમાં તાળા તોડી તસ્કરો 17 તોલા સોના અને અઢી કિલો ચાંદીના દાગીના તથા રોકડ રકમની ચોરી કરી ફરાર થઈ ગયા હતા.
ભોગ બનનાર મકાન માલિકોએ 10 લાખથી વધુની મતાની ચોરીની ફરિયાદ નોંધાવતાં ચકચાર સાથે પોલીસ અને હોમગાર્ડની કામગીરી સામે અનેક સવાલો ભભા થયા છે. લીંબડી હાઈવે નજીક આવેલી ચામુંડા પાર્ક સોસાયટીમાં રહેતા નિવૃત્ત હરેશભાઈ ગોવિંદભાઈ દલવાડી શુક્રવારે મકાનને તાળાં મારી પરિવાર સાથે આણંદ શ્રીમંત પ્રસંગમાં ગયા હતા.
શનિવારે પ્રસંગ પૂર્ણ કરી હરેશભાઈ પરિવાર સાથે લીંબડી પરત ફર્યા ત્યારે તેમને જોયું તો મકાનનું તાળુ અને રૂૂમના દરવાજાના નકૂચા તૂટેલા હતા.ઘરવખરી વેર વિખેર હાલતમાં પડી હતી. તિજોરીમાં રાખેલ મંગળસૂત્ર, હાર, કંઠી, વિંટી, કડલી સહિત 11 તોલાથી વધુના સોનાના દાગીના તથા કડા, ઝાંઝરી, પાયલ સહિત 1 કિલો 400 ગ્રામ ચાંદીના દાગીનાની ચોરી થઈ ગઈ હતી. તેવી જ રીતે હાઈવે પાસે આવેલી ઉમૈયા પાર્ક સોસાયટીમાં રહેતા રમણીકભાઈ પોપટભાઈ દલવાડી શુક્રવારે પરિવાર સાથે ગાંધીનગર ગયા હતા.
શનિવારે તેમના પુત્ર યોગેશભાઈએ પિતાને ફોન કરીને જાણ કરી હતી કે મકાનના તાળાં તૂટેલા છે અને ચોરી થઈ હોય એવું લાગે છે.રમણીકભાઈ પરિવાર સાથે લીંબડી પરત ફર્યા ત્યારે તેમને તિજોરીમાં રાખેલ પેંડલ સાથેના 4 ચેઈન, બુટ્ટી સહિત સાડા છ તોલાથી વધુના સોનાના દાગીના અને છડા, ફુલ્લ, સિક્કા સહિત 1 કિલો 300 ગ્રામ ચાંદીના દાગીના તથા 50,000 રોકડ રકમની ચોરી થઈ હોવાનું સામે આવ્યું હતું. હરેશભાઈ દલવાડીના મકાનમાંથી 4,90,000 રૂૂ.ના સોના, ચાંદીના દાગીના અને રમણીકભાઈ દલવાડીના ઘરમાંથી સોના, ચાંદીનાના દાગીના, રોકડ રકમ મળીને 5,73,500 રૂૂ.ની ચોરી થયાની ફરિયાદ નોંધાતાં ચકચાર સાથે પોલીસ અને હોમગાર્ડની કામગીરી સામે અનેક સવાલો ઊભા થયા છે.
ગુજરાત
જૂનાગઢ જિલ્લામાં 7થી 14.5 ઈંચ વરસાદથી પૂર જેવી સ્થિતિ
![](https://gujaratmirror.in/wp-content/uploads/2024/07/146.jpg)
અનેક ગામડાંઓનો સંપર્ક કપાયો, બચાવ-રાહત કાર્ય શરૂ કરાયું, સરકારી કર્મચારીઓને હેડકવાર્ટર નહીં છોડવા આદેશ
જૂનાગઢ જિલ્લાને છેલ્લા 48 કલાકમાં મેઘરાજાએ તરબતર કરી દીધો છે. ગઈકાલે મેંદરડામાં 8.5, વંથલીમાં 6, મેંદરડામાં પાંચ અને જૂનાગઢમાં સવાચાર ઈંચ વરસાદ પડયા બાદ આજે સવારે પુરા થતા 24 કલાક દરમિયાન વધુ 7 થી 14.5 ઈંચ સુધી વરસાદ ખાબકતા જૂનાગઢ, વંથલી, માણાવદર-કેશોદ સહિતના પંથક જળમગ્ન થઈ ગયા છે. અનેક ગામોનો અને હજારો લોકોનો સંપર્ક કપાઈ ગયો છે.
આજે સવાર સુધીમાં વંથલીમાં 14.5, વિસાવદરમાં 9.5, જૂનાગઢમાં 12, કેશોદમાં 10, માણાવદરમાં 9 અને મેંદરડામાં 7.5 ઈંચ, ભેસાણમાં 7 ઈંચ વરસાદ નોંધાયો છે. જેના કારણે નદીઓમાં ઘોડાપુર ઉમટતા અને રસ્તાઓ ઠેર ઠેર ધોવાઈ જતાં વાહન વ્યવહાર ઠપ્પ થઈ ગયો છે અનેક વિસ્તારોમાં પુર જેવી સ્થિતિ સર્જાતા બચાવ રાહત કામ શરૂ કરાયું છે.
ભારેથી અતિભારે વરસાદના કારણે જૂનાગઢ જિલ્લાના તમામ સરકારી કર્મચારીઓને હેડકવાર્ટર નહીં છોડવા આદેશ અપાયા છે જ્યારે એનડીઆરએફની ટીમ બચાવ રાહતના કામે લગાડાઈ છે. સંપર્ક વગરના ગામડાઓનો સંપર્ક સાધવા પ્રયાસો શરૂ કરાયા છ.
જૂનાગઢમાં મેઘરાજા મન મુકીને વરસ્યા છે. જૂનાગઢના ગીરનાર પર્વત પર 8થી 10 ઈંચ વરસાદ પડ્યો છે. ગીરનાર પર્વત પર ભારે વરસાદને કારણે ભવનાથ વિસ્તારમાં પાણીની નદીઓ વહી હતી. જુનાગઢથી ભવનાથના રસ્તા ઉપર પાણી ભરાયા હતા. ભારે વરસાદને કારણે શહેરનો વિલીંગ્ડન ડેમ અને દામોદર કુંડ ઓવરફ્લો થયો છે.
જૂનાગઢ જિલ્લામાં ભારે વરસાદથી શાળાઓમાં આજે રજા જાહેર કરવામાં આવી છે. માધ્યમિક અને ઉચ્ચ માધ્યમિક શાળાઓમાં આવતીકાલે રજા જાહેર કરાઈ છે. ભારે વરસાદથી તંત્રએ નિર્ણય લીધો છે. શાળાના તમામ સ્ટાફને હેડ ક્વાર્ટર પર હાજર રહેવા સૂચના આપવામાં આવી છે.
ગિરનાર પર્વત પર ભારે વરસાદ થતા ડેમ ઓવરફ્લો થયો છે. શહેરને પાણી પુરૂૂ પાડતા 3 જળાશયો માંથી બે ઓવરફ્લો થયા છે. આણંદપુર વીયર અને વિલિંગ્ડન ડેમ ઓવરફલો થયા છે. જ્યારે સૌથી મોટા ડેમ હસ્નાપુરમાં પાણીની જંગી આવક થઇ છે.જૂનાગઢમાં બામણાસા અને મટીયાણા પાસે ઓઝત નદીનો પાળો તૂટ્યો છે. જેના પગલે બાલાગામ, ઝાલાવાડ ગામોમાં નદીના પાણી ઘૂસ્યા છે. ધસમસતા પ્રવાહમાં ગામો બેટમાં ફેરવાયા છે. ઉપરવાસમાં આવેલ વરસાદે ઓઝત નદીમાં પૂર આવ્યા છે.
શાળાઓમાં રજા જાહેર, દૂધધારા પરિક્રમા પણ રદ કરવામાં આવી
જૂનાગઢમાં બારે મેઘ ખાંગા થયા છે. જિલ્લામાં ભારે વરસાદના કારણે અત્ર-તત્ર-સર્વત્ર પાણી જ પાણી જોવા મળે છે. જેના પરિણામે અનેક ગામો પણ સંપર્ક વિહોણા થયા છે. ત્યારે હજુ ભારે વરસાદ પડશે તેવી આગાહી હવામાન વિભાગ દ્વારા કરવામાં આવી છે. ભારે વરસાદની આગાહીને પગલે આજથી શરુ થનારી દૂધધારા પરિક્રમ રદ કરવામાં આવી છે. ગિરનાર જંગલના 36 કિમી રૂૂટ સુધી યોજાતી આ પરંપરાગત પરિક્રમા પ્રથમ વખત રદ કરવામાં આવી છે. આ ઉપરાંત આજે પ્રાથમિક તથા માધ્યમિક શાળાઓમાં પણ આજે રજા જાહેર કરવામાં આવી છે.
-
ગુજરાત7 months ago
વધુ એક યુવકને હૃદય-રોગનો હુમલો ભરખી ગયો, ગોધરામાં 45 વર્ષીય યુવકનું હાર્ટ એટેકથી મોત
-
ગુજરાત2 months ago
હનુમાનમઢી પાસે ગોડાઉનમાંથી થયેલી ચોરીનો ભેદ ઉકેલાયો, એક પકડાયો: બેની શોધખોળ
-
ગુજરાત2 months ago
સર્વર ઠપ્પ, રાજકોટ સહિત રાજ્યભરની RTO સેવા બે દિવસ બંધ
-
ક્રાઇમ6 months ago
ભાણવડ પંથકમાં દેશી દારૂની ધમધમતી ભઠ્ઠીઓ પર પોલીસના દરોડા ; બૂટલેગરો ફરાર
-
પોરબંદર7 months ago
ભાવનગર-જેતલસર ટ્રેનને પોરબંદર સુધી લંબાવતુ તંત્ર
-
પોરબંદર6 months ago
સ્પર્ધાત્મક પરીક્ષામાં નિષ્ફળતા મળતાં ભાણવડ પંથકની યુવતીનો આપઘાત
-
પોરબંદર6 months ago
ભાણવડ પંથકમાંથી દારૂની 202 બોટલ ભરેલી કાર સાથે એક પકડાયો
-
પોરબંદર7 months ago
પોરબંદરમાં ગેરેજમાં અચાનક ભભૂકેલી આગમાં દાઝી ગયેલા વૃદ્ધનું મોત