16 દિવસમાં સિંહના હુમલાની ત્રીજી ઘટના

અમરેલી જિલ્લામાં સિંહે એક યુવક પર હુમલો કર્યો હોવાનું સામે આવ્યું છે. અમરેલી જિલ્લામાં ફરી એકવાર સિંહે હુમલો કર્યો છે. મળતી જાણકારી પ્રમાણે ખાંભાના ગીદરડી ગામે માલધારી યુવક પર સિંહનો હુમલો કર્યો છે. અહીં સિકે 19 વર્ષીય માલધારી યુવક નવશાદ પઠાણ પર હુમલો કર્યો છે. સિંહે હુમલો કરતા અત્યારે યુવકને હોસ્પિટલમાં સારવાર માટે દાખલ કરવામાં આવ્યો છે.

મળતી વિગતો પ્રમાણે માલઢોર ચરાવતી વખતે વાછરડા પર સિંહે હુમલો કર્યો હતો. જેથી વાછરડાને બચાવવા જતા સિંહે હુમલો કરી દીધો હતો. નોંધનીય છે કે, યુવક વાછરડાને બચાવવા માટે ગયો હતો પરંતુ સિંહે સામેથી યુવક પર હુમલો કરી દીધો હતો. સિંહે હુમલો કરતા માલધારી યુવકને થાપા અને હાથના ભાગે ઈજા થઈ છે. અત્યારે ઈજાગ્રસ્ત માલધારી યુવકને ખાંભા બાદ અમરેલીમાં વધારે સારવાર માટે ખસેડવામાં આવ્યો છે.
નોંધનીય છે કે, 16 દિવસમાં અમરેલી જિલ્લામાં સિંહના હુમલાની આ ત્રીજી ઘટના બની છે. આ પહેલા પણ બે વખત સિંહે હુમલો કર્યો હોવાનું સામે આવ્યું હતું. અત્યારે એક માલધારી યુવક પર હુમલો કર્યો હોવાનું સામે આવ્યું છે.

માતાની નજર સામે જ બાળકીને ઉઠાવી ગઇ, આદમખોર સિંહણને પાંજરે પૂરાઇ

અમરેલી જિલ્લાના ગ્રામ્ય વિસ્તારમાં સિંહ અને દીપડાઓના હુમલાની ઘટના દિવસેને દિવસે વધી રહી છે. જાફરાબાદ તાલુકાના ખાલસા કંથારીયા ગામમાં સિંહણે 7 વર્ષની બાળકીનો શિકાર કરતાં ગ્રામજનોમાં રોષ સાથે ફફડાટ ફેલાયો હતો. ખાલસા કંથારીયા ગામમાં રહેતી મહિલા પોતાની બાળકી કીર્તિ ધાપા (ઉં.વ. 7)ને લઈને વાડીથી પરત ફરી રહી હતી.આ સમયે અચાનક સિંહણે બાળકી પર હુમલો કર્યો હતો. માતાની નજર સામે જ સિંહણ બાળકીને ઉપાડીને ખેતરમાં ખેંચી ગઈ હતી. વાડી વિસ્તારમાં બાળકી માતા સાથે ખેતી કામ કર્યા બાદ ઘરે પરત આવી રહી હતી. ત્યારે બાળકી પર સિંહણે હુમલો કર્યો હતો. ઘટનાની જાણ થતાં ખાલસા કથારીયા સહિત આસપાસ ગ્રામજનો મોટી સંખ્યામા દોડી આવ્યા હતા અને ધારાસભ્ય હીરા સોલંકીને બનાવની જાણ થતા ઘટના સ્થળે પહોંચ્યા હતા.

આ મામલે સ્થાનિક લોકોએ ધારાસભ્યને રજૂઆત કરી હતી. બાદમાં વન વિભાગની ટીમ સાથે ધારાસભ્ય અને ગામના લોકોએ બાળકીની શોધખોળ શરૂૂ કરી હતી. તપાસ દરમિયાન બાળકીના શરીરના કેટલાક અંગો મળી આવ્યા હતા અને બાદમાં સિંહણને શોધવા માટે મેગા ઓપરેશન શરૂૂ કરવામાં આવ્યું હતું.

વન વિભાગ દ્ધારા ડ્રોન મારફતે સિંહણનું લોકેશન શોધવાની કામગીરી હાથ ધરાઇ હતી.જો કે મધરાત સુધી સિંહણ પાંજરે ન પુરાતા ધારાસભ્ય હીરા સોલંકીએ લોકો સાથે ખેતરમાં ધામા નાખ્યા હતા. અંતે માનવભક્ષી સિંહણને વહેલી સવારે પાંજરે પુરવામાં વન વિભાગને સફળતા મળી હતી. બાદમાં વન વિભાગના ડી.સી.એફ અને રાજુલા જાફરાબાદના ધારાસભ્ય હીરા સોલંકીએ મૃતક બાળકીના પરિવાર સાથે મુલાકાત કરી હતી વન વિભાગે વહેલી તકે બાળકીના પરિવારને સહાય ચુકવવામાં માટેની કાર્યવાહી હાથ ધરવામાં આવી હતી. પ્રથમવાર આ રેસ્ક્યુ ઓપરેશનમાં વન વિભાગે થર્મલ ડ્રોન કેમેરાની મદદથી સિંહણનું લોકેશન મેળવ્યું હતું અને ત્યારબાદ અંદાજે ચારથી પાંચ કલાકની મહેનત બાદ સિંહણને શોધવામાં વન વિભાગને સફળતા મળી છે.

જેટી પર વાહન લાંગરવા મામલે થયું હતું ઘર્ષણ, ધારાસભ્યના જમાઇ ચેતન શિયાળે રિવોલ્વરમાંથી ફાયરિંગ કરતા એકને ઇજા

અમરેલીના જાફરાબાદમાં વહાણ લાંગરવાને લઈને બબાલ થયા બાદ ધારાસભ્ય હીરા સોલંકીના જમાઈ ચેતન શિયાળ પર હુમલો થતાં તેમને માથાના ભાગે ગંભીર ઇજા પહોંચી છે. તેમને તત્કાળ સારવાર માટે ભાવનગર ખાતે ખસેડવામાં આવ્યા છે.

સુત્રોમાંથી મળતી માહિતી મુજબ, અમરેલી જિલ્લાના જાફરાબાદ ના દરિયા કાંઠે ધારાસભ્ય હીરા સોંલકીના વેવાઈ ને તેમની જ્ઞાતિના યુવક સાથે બોટ લાંગરવાની જેટી પર બોટ રાખવા બાબતે ચકમક ઝરી હતી જે અંગે ધારાસભ્યના વેવાઈ દ્વારા પોતાના દીકરા ચેતન શિયાળ જે ધારાસભ્ય હીરા સોલંકીના જમાઈ છે અને અમરેલી જિલ્લા યુવા ભાજપના પ્રમુખ છે તે જાફરાબાદ બંદર ચોક પાસે આવેલ જેટી એ પહોચ્યા હતા ને સામે જૂથના યુવાન સામે રિવોલ્વર કાઢી હતી ત્યારે સામે જૂથના યુવક દ્વારા ચેતન શિયાળને માથાના ભાગે મચ્છી કાપવાની કુહાડી મારી દીધી હોવાની પ્રાથમિક માહિતીઓ પ્રાપ્ત થઈ રહી છે. બોટ કિનારે રાખવા બાબતે રાત્રે ઘટેલી ઘટના થી પોલીસ તંત્રમાં દોડધામ મચી ગઇ હતી. સામે જૂથના યશવંત નામના યુવાન ને હાથના ભાગે આંગળી નજીક રિવોલ્વર માંથી છૂટેલી ગોળી વાગી હોવાની વિગતો મળી રહી છે. અમરેલી જિલ્લા યુવા ભાજપના પ્રમુખ અને ધારાસભ્ય હીરા સોલંકીના જમાઈ ચેતન શિયાળને માથાના ભાગે ગંભીર ઈજા થતાં પ્રથમ રાજુલા બાદ તાત્કાલિક ભાવનગર સારવારમાં ખસેડાયા હોવાની વિગતો મળી રહી છે.

પ્રાપ્ત માહિતી મુજબ જાફરાબાદ જેટી પર વહાણ લાંગરવાને લઈને બે જૂથ વચ્ચે ઘર્ષણ થયું હતું જેમાં ધારાસભ્ય હીરા સોલંકીના જમાઈ ચેતન શિયાળે રિવોલ્વર કાઢી હતી. ચેતન શિયાળનો રિવોલ્વર સાથેનો વીડિયો પણ સામે આવ્યો છે. ચેતન શિયાળે રિવોલ્વર કાઢતા સામે પક્ષેથી હુમલો થયો હતો. યશવંત નામના માછીમારે ચેતન શિયાળ પર કુહાડીથી હુમલો કરતાં ચેતન શિયાળને માથાના ભાગે ગંભીર ઈજા પહોંચી હતી અને માછીમાર યશવંતને પણ આંગળીના ભાગે ગોળી વાગી હતી. ચેતન શિયાળને તત્કાળ સારવાર માટે ભાવનગર લઈ જવાયા છે. ઉલ્લેખનિય છે કે ચેતન શિયાળ અમરેલી જિલ્લા યુવા ભાજપ પ્રમુખ પણ છે . જેટી પર વહાણ રાખવાને લઈને બંને પક્ષે માથાકૂટ થયા બાદ આ બનાવ બન્યો હતો.