માતાની નજર સામે જ બાળકીને ઉઠાવી ગઇ, આદમખોર સિંહણને પાંજરે પૂરાઇ

અમરેલી જિલ્લાના ગ્રામ્ય વિસ્તારમાં સિંહ અને દીપડાઓના હુમલાની ઘટના દિવસેને દિવસે વધી રહી છે. જાફરાબાદ તાલુકાના ખાલસા કંથારીયા ગામમાં સિંહણે 7 વર્ષની બાળકીનો શિકાર કરતાં ગ્રામજનોમાં રોષ સાથે ફફડાટ ફેલાયો હતો. ખાલસા કંથારીયા ગામમાં રહેતી મહિલા પોતાની બાળકી કીર્તિ ધાપા (ઉં.વ. 7)ને લઈને વાડીથી પરત ફરી રહી હતી.આ સમયે અચાનક સિંહણે બાળકી પર હુમલો કર્યો હતો. માતાની નજર સામે જ સિંહણ બાળકીને ઉપાડીને ખેતરમાં ખેંચી ગઈ હતી. વાડી વિસ્તારમાં બાળકી માતા સાથે ખેતી કામ કર્યા બાદ ઘરે પરત આવી રહી હતી. ત્યારે બાળકી પર સિંહણે હુમલો કર્યો હતો. ઘટનાની જાણ થતાં ખાલસા કથારીયા સહિત આસપાસ ગ્રામજનો મોટી સંખ્યામા દોડી આવ્યા હતા અને ધારાસભ્ય હીરા સોલંકીને બનાવની જાણ થતા ઘટના સ્થળે પહોંચ્યા હતા.

આ મામલે સ્થાનિક લોકોએ ધારાસભ્યને રજૂઆત કરી હતી. બાદમાં વન વિભાગની ટીમ સાથે ધારાસભ્ય અને ગામના લોકોએ બાળકીની શોધખોળ શરૂૂ કરી હતી. તપાસ દરમિયાન બાળકીના શરીરના કેટલાક અંગો મળી આવ્યા હતા અને બાદમાં સિંહણને શોધવા માટે મેગા ઓપરેશન શરૂૂ કરવામાં આવ્યું હતું.

વન વિભાગ દ્ધારા ડ્રોન મારફતે સિંહણનું લોકેશન શોધવાની કામગીરી હાથ ધરાઇ હતી.જો કે મધરાત સુધી સિંહણ પાંજરે ન પુરાતા ધારાસભ્ય હીરા સોલંકીએ લોકો સાથે ખેતરમાં ધામા નાખ્યા હતા. અંતે માનવભક્ષી સિંહણને વહેલી સવારે પાંજરે પુરવામાં વન વિભાગને સફળતા મળી હતી. બાદમાં વન વિભાગના ડી.સી.એફ અને રાજુલા જાફરાબાદના ધારાસભ્ય હીરા સોલંકીએ મૃતક બાળકીના પરિવાર સાથે મુલાકાત કરી હતી વન વિભાગે વહેલી તકે બાળકીના પરિવારને સહાય ચુકવવામાં માટેની કાર્યવાહી હાથ ધરવામાં આવી હતી. પ્રથમવાર આ રેસ્ક્યુ ઓપરેશનમાં વન વિભાગે થર્મલ ડ્રોન કેમેરાની મદદથી સિંહણનું લોકેશન મેળવ્યું હતું અને ત્યારબાદ અંદાજે ચારથી પાંચ કલાકની મહેનત બાદ સિંહણને શોધવામાં વન વિભાગને સફળતા મળી છે.

જિલ્લામાં આવેલ ખાંભાના મોટા બારમણ ગામે એક ભયંકર અકસ્માત સર્જાયો છે. જેમાં આ અકસ્માતમાં એક 2 વર્ષના બાળકનું મોત નિપજ્યું છે. જેના કારણે તેના પરિવાર પર જાણે કે આભ તૂટી પડ્યું હોય તેવી સ્થિતિ સર્જાઈ છે અને પરિવારમાં શોકનો માહોલ ફેલાઈ ગયો છે. માતા-પિતા ન તો કોઈને કહી શકે કે ન તો સહી શકે તેવી તેમની સ્થિતિ થઈ ગઈ છે.

મોટા બારમણ ગામે ખેડૂતની વાડીમાં મગફળી કાઢવાનું કામ ચાલતું હતું. તે સમયે ટ્રેક્ટરને રિવર્સમાં લેવામાં આવ્યું. જોકે બાળક ત્યાં ટ્રેક્ટરના ટાયર પાસે જ ઉભો હતો. જેમાં તે ટ્રેક્ટરના ટાયર નીચે આવી જતા તેનું કરુણ મોત નિપજ્યું હતું. જે સમયે આ બનાવ બન્યો તે સમયે ખેતરમાં હાજર સૌ કોઈ લોકોની આંખો પહોળી થઈ ગઈ હતી. બીજી તરફ બાળકના માતા-પિતા પણ આઘાતમાં સરી ગયા હતા.

ઘટના સ્થળે જ બાળકનું કરુણ મોત નિપજ્યું હતું. જેથી બાળકના મૃતદેહને પીએમ અર્થે ખાંભાની સરકારી હોસ્પિટલમાં ખસેડવામાં આવ્યો હતો. સમગ્ર મામલે ખાંભા પોલીસને જાણ થતા પોલીસ પણ દોડીને પહોંચી હતી અને તેણે ટ્રેક્ટર ચાલક દેવશી ભાણા બારૈયા સામે ગુનો નોંધીને કાયદેસરની કાર્યવાહી હાથ ધરી છે. જોકે આ ઘટના હાલ આસપાસના વિસ્તારમાં ચર્ચાનું કેન્દ્ર બની ગઈ છે. ઉલ્લેખનીય છે કે મૃતક બાળકનું નામ કર્તક કૈલાસભાઈ હોવાનું સામે આવ્યું છે. બાળકના મોતને લઈને તેના પરિવારમાં હાલ શોકનો માહોલ ફેલાઈ ગયો છે.

જેટી પર વાહન લાંગરવા મામલે થયું હતું ઘર્ષણ, ધારાસભ્યના જમાઇ ચેતન શિયાળે રિવોલ્વરમાંથી ફાયરિંગ કરતા એકને ઇજા

અમરેલીના જાફરાબાદમાં વહાણ લાંગરવાને લઈને બબાલ થયા બાદ ધારાસભ્ય હીરા સોલંકીના જમાઈ ચેતન શિયાળ પર હુમલો થતાં તેમને માથાના ભાગે ગંભીર ઇજા પહોંચી છે. તેમને તત્કાળ સારવાર માટે ભાવનગર ખાતે ખસેડવામાં આવ્યા છે.

સુત્રોમાંથી મળતી માહિતી મુજબ, અમરેલી જિલ્લાના જાફરાબાદ ના દરિયા કાંઠે ધારાસભ્ય હીરા સોંલકીના વેવાઈ ને તેમની જ્ઞાતિના યુવક સાથે બોટ લાંગરવાની જેટી પર બોટ રાખવા બાબતે ચકમક ઝરી હતી જે અંગે ધારાસભ્યના વેવાઈ દ્વારા પોતાના દીકરા ચેતન શિયાળ જે ધારાસભ્ય હીરા સોલંકીના જમાઈ છે અને અમરેલી જિલ્લા યુવા ભાજપના પ્રમુખ છે તે જાફરાબાદ બંદર ચોક પાસે આવેલ જેટી એ પહોચ્યા હતા ને સામે જૂથના યુવાન સામે રિવોલ્વર કાઢી હતી ત્યારે સામે જૂથના યુવક દ્વારા ચેતન શિયાળને માથાના ભાગે મચ્છી કાપવાની કુહાડી મારી દીધી હોવાની પ્રાથમિક માહિતીઓ પ્રાપ્ત થઈ રહી છે. બોટ કિનારે રાખવા બાબતે રાત્રે ઘટેલી ઘટના થી પોલીસ તંત્રમાં દોડધામ મચી ગઇ હતી. સામે જૂથના યશવંત નામના યુવાન ને હાથના ભાગે આંગળી નજીક રિવોલ્વર માંથી છૂટેલી ગોળી વાગી હોવાની વિગતો મળી રહી છે. અમરેલી જિલ્લા યુવા ભાજપના પ્રમુખ અને ધારાસભ્ય હીરા સોલંકીના જમાઈ ચેતન શિયાળને માથાના ભાગે ગંભીર ઈજા થતાં પ્રથમ રાજુલા બાદ તાત્કાલિક ભાવનગર સારવારમાં ખસેડાયા હોવાની વિગતો મળી રહી છે.

પ્રાપ્ત માહિતી મુજબ જાફરાબાદ જેટી પર વહાણ લાંગરવાને લઈને બે જૂથ વચ્ચે ઘર્ષણ થયું હતું જેમાં ધારાસભ્ય હીરા સોલંકીના જમાઈ ચેતન શિયાળે રિવોલ્વર કાઢી હતી. ચેતન શિયાળનો રિવોલ્વર સાથેનો વીડિયો પણ સામે આવ્યો છે. ચેતન શિયાળે રિવોલ્વર કાઢતા સામે પક્ષેથી હુમલો થયો હતો. યશવંત નામના માછીમારે ચેતન શિયાળ પર કુહાડીથી હુમલો કરતાં ચેતન શિયાળને માથાના ભાગે ગંભીર ઈજા પહોંચી હતી અને માછીમાર યશવંતને પણ આંગળીના ભાગે ગોળી વાગી હતી. ચેતન શિયાળને તત્કાળ સારવાર માટે ભાવનગર લઈ જવાયા છે. ઉલ્લેખનિય છે કે ચેતન શિયાળ અમરેલી જિલ્લા યુવા ભાજપ પ્રમુખ પણ છે . જેટી પર વહાણ રાખવાને લઈને બંને પક્ષે માથાકૂટ થયા બાદ આ બનાવ બન્યો હતો.