જામનગર જીલ્લાના લાલપુર તાલુકાના સણોસરી ગામના પાટિયા પાસે ગત રાત્રીના સર્જાયેલ ગમખ્વાર અકસ્માતમાં ત્રણ યુવાનોના ઘટના સ્થળે જ કમકમાટી ભર્યા મૃત્યુ નીપજ્યા છે જયારે અન્ય એક યુવાનને ગંભીર ઈજાઓ પહોચતા તાત્કાલિક જામનગર ખસેડવામાં આવ્યો છે. ઘવાયેલ યુવાનની હાલત પણ ગંભીર ગણાવાઈ રહી છે. બોલેરોમાં પંચર પડતા યુવાનો ગાડી સાઈડમાં કરી ટાયર કાઢતા હતા ત્યારે પુરપાટ ઝડપે આવેલ અન્ય એક બોલેરોએ જોરદાર ઠોકર મારી અકસ્માત સર્જ્યો હોવાની પ્રાથમિક વિગતો સામે આવી છે.
બનાવની વિગત એવી છે કે, જામનગર જીલ્લાના લાલપુર તાલુકાના સણોસરી ગામના પાટીયા પાસે ગઈ રાત્રીના પસાર થતા એક બોલેરો ગાડીમાં પંચર પડી ગયું હતું. જેને લઈને બોલેરોમાં સવાર યુવાનોએ ગાડી સાઈડમાં કરી ટાયર બદલવા સહિતની કામગીરી શરુ કરી હતી. દરમિયાન પાછળથી પુરપાટ ઝડપે એક બોલેરો આવી ચડી હતી અને બગડેલ ગાડીને જોરદાર ઠોકર મારી અકસ્માત નીપ્જાવ્યો હતો.
જેને લઈને સુમસામ રાત્રી અંધકારનો માહોલ મરણચીસોથી ગુંજી ઉઠ્યો હતો. જોરદાર ઠોકર લાગતા ટાયર બદલી રહેલ ખાયડી ગામના પ્રદીપભાઈ દિનેશભાઈ ગોજીયા, કમલેશભાઈ નારણભાઈ ગાગિયા અને ગોપડી ગામના ભરતભાઈ લખમણભાઈ ડાંગરને ઈજાઓ પહોચતા ત્રણેયના ઘટના સ્થળે જ મૃત્યુ નીપજ્યું હતું. જયારે શ્યામ અશોકભાઈ ગાગિયા નામના યુવાનને ગંભીર ઈજાઓ પહોચી હતી. અકસ્માતને પગલે અન્ય વાહનોના ચાલકોએ વાહન થંભાવી તેમજ અન્ય આવી ગયેલ લોકોએ ઘવાયેલ અને મૃતક યુવાનના દેહોને બહાર કાઢ્યા હતા. આ બનાવના પગલે લાલપુર પોલીસે ઘટના સ્થળે પહોચી આગળની કાર્યવાહી હાથ ધરી હતી.
બીજી તરફ ગંભીર રીતે ઘવાયેલ શ્યામને તાત્કાલિક જામનગર હોસ્પિટલ ખસેડવામાં આવ્યા હતા. આ બનાવના પગલે હતભાગી પરિવારને જાણ થતા પરિવારોમાં શોકનું મોજું ફરી વળ્યું હતું.
