શહેરના રામાપીર ચોકડી પાસે આવેલા બીઆરટીએસ બસ સ્ટેન્ડની અંદરથી કોઇ તસ્કર લેપટોપ, ચાર્જર, ટુલકીટ અને બસ સ્ટેન્ડની અંદાજીત 40 જેટલી ચાવીઓ સહિત 61 હજારની મતા કોઇ તસ્કર ચોરી ગયાની પોલીસમાં ફરિયાદ નોંધાવતા પોલીસે તપાસ શરૂ કરી છે.

વધુ માહિતી મુજબ માંડા ડુંગર પાસે મહાકાળી માતાજીના મંદિર પાસે રહેતા સંજયભાઇ હુકાભાઇ ઓળકીયાએ પોતાની ફરિયાદમાં જણાવ્યું હતુ કે, તેઓ એમનેક્સ કંપનીમાં સાઇટ ઇન્જેનર તરીકે નોકરી કરે છે. ગઇ તા.12ના રોજ તેમની સાથે સાથી કર્મચારી ફેઝલભાઇ શેખ (રહે. સુભાષનગર શેરી નં.3) પાસેથી તેમણે લેપટોપ વાપરવા લીધો હતો. જેમની કિમત 51 હજાર રૂપિયા થયા છે.

તા.12ના રોજ સાંજના સમયે આઠેક વાગ્યે સંજયભાઇ અને તેમની સાથે કામ કરતા મીતભાઇ રાદડીયા રામાપીર ચોકડી પાસે આવેલા બીઆરટીએસ બસ સ્ટેન્ડ ખાતે ટીવીનું રીપેરીંગ કરવા ગયા હતા. ત્યાં તેમનું કામ પુરુ થયુ ત્યારે તેમનું બેગ જોતા ત્યાં લેપટોપ, ચાર્જર, ટુલકીટ અને 40 જેટલી ચાવીઓ ભરેલું બેગ ત્યાં જોવામાં ન આવતા પોલીસમાં ફરિયાદ નોંધાવી હતી. આ મામલે ગાંધીગ્રામ પોલીસ મથકના પીએસઆઇ પી.બી.વારોતરીયા અને સ્ટાફે વધુ તપાસ હાથ ધરી છે.

ખંભાળિયા પંથકમાંથી તાજેતરમાં એક આસામીનો વિવો કંપનીનો મોબાઈલ ફોન ચોરાયો હોવાની ફરિયાદ અહીંના પોલીસ મથકમાં નોંધાવવામાં આવી હતી. જેને અનુલક્ષીને અહીંના પી.આઈ. બી.જે. સરવૈયાની ટીમ દ્વારા હાથ ધરવામાં આવેલી કાર્યવાહીમાં પી.એસ.આઈ. આર.આર. ઝરૂૂ તથા સ્ટાફ દ્વારા કરવામાં આવેલી તપાસમાં ગોંડલના ભગવતી પરાના મૂળ રહીશ અને હાલ રાજકોટ ખાતે રહેતા તથા કડિયા કામ કરતા ભરત દામજીભાઈ મારુ (ઉ.વ. 53) નામના શખ્સને મુદ્દામાલ સાથે ઝડપી લઇ, ધોરણસર કાર્યવાહી કરી હતી.

શહેરનાં ટાગોર રોડ પર આવેલા એલઆઇસી સોસાયટીમાં નવા બની રહેલા વેપારીના મકાનમાંથી દિવાળીના રોજ 80 હજારના વાયરીંગના બંડલની ચોરી થયાની ગઇકાલે માલવીયાનગર પોલીસ મથકમાં ફરીયાદ નોંધાઇ હતી. આ ગુનાનો ભેદ એ ડિવીઝન પોલીસે ઉકેલી લઇ 3 મહિલાને પકડી તમામ મુદામાલ જપ્ત કર્યો છે.મળતી વિગતો મુજબ એલઆઇસી સોસાયટીમાં રહેતા પિયુષભાઇ જયંતિભાઇ ડોબરીયા જેઓ તેમના પિતરાઇ ભાઇ ધર્મેશભાઇ સાથે કોઠારીયા રીંગ રોડ પાસે જયંત ફુડ પ્રોડકટ નામે વેપાર કરે છે.

તેમના એલઆઇસી સોસાયટીમાં નવા બની રહેલા મકાનમાં કામ ચાલુ હોય તેમાંથી 80 હજારના વાયરીંગના બંડલની ચોરી થતા તેમણે પોલીસમાં ફરીયાદ નોંધાવી હતી. આ મામલે એ ડિવીઝન પોલીસ મથકના પીઆઇ બારોટની રાહબરીમાં પીએસઆઇ રાણા અને સ્ટાફે બાતમીના આધારે રામનાથપરામાં રહેતા લક્ષ્મીબેન વિજયભાઇ સોલંકી, કુબલીયાપરામાં રહેતા સોનલબેન રાયધનભાઇ બાવાજી અને પુજાબેન રાજુભાઇ ટોપલીયાની ધરપકડ કરી હતી. આ ઘટનામાં ત્રણેયની પુછપરછ દરમિયાન જાણવા મળ્યુ હતુ કે ત્રણેય આરોપીઓએ દિવાળીના દિવસે વાયરીંગના બંડલની ચોરી કર્યા બાદ સળગાવી નાખ્યા હતા અને તેમાંથી કોપર કાઢી સારા પૈસા મળશે તેવી લાલચે ભંગારના ડેલે વેચવા નિકળ્યા હતા ત્યારે પોલીસે પકડી લીધા હતા. આરોપી લક્ષ્મીબેન અગાઉ પણ ચોરીના ગુનામાં પકડાઇ ચુકયા છે.