જામનગરની આરટીઓ કચેરીએ આજે હેલ્મેટ નિયમનું પાલન કરાવવા માટે એક નોંધપાત્ર પગલું ભર્યું છે. કચેરીના પ્રવેશદ્વાર પર હાથ ધરવામાં આવેલી આ વિશેષ ડ્રાઈવમાં હેલ્મેટ વગર આવતા સરકારી કર્મચારીઓ અને સામાન્ય નાગરિકો સામે કડક કાર્યવાહી કરવામાં આવી હતી. આરટીઓ ઇન્સ્પેક્ટર એચ.કે. પ્રજાપતિ અને કે. કે. ઉપાધ્યાયની ટીમે આ ઝુંબેશનું સફળ સંચાલન કર્યું હતું. આ ડ્રાઈવ દરમિયાન સાત સરકારી કર્મચારીઓ અને પંદર નાગરિકો સહિત કુલ 22 લોકોને હેલ્મેટ ન પહેરવા બદલ દંડવામાં આવ્યા હતા.

આ દંડની રકમ કુલ રૂૂ. 67,000 હતી. આ કાર્યવાહી ગુજરાત હાઇકોર્ટ અને રાજ્ય સરકારના પરિપત્રના આદેશ અનુસાર કરવામાં આવી હતી. આરટીઓ અધિકારીઓએ જણાવ્યું હતું કે, આરટીઓ કચેરી અને જામનગર ટ્રાફિક પોલીસ હેલ્મેટ નિયમનું પાલન કરાવવા માટે સતત પ્રયત્નશીલ રહેશે અને આવી ઝુંબેશો આગામી દિવસોમાં પણ ચાલુ રાખવામાં આવશે.

આ ઝુંબેશ દ્વારા જામનગર આરટીઓ કચેરીએ સડક સલામતી અંગેનો સંદેશો આપ્યો છે અને હેલ્મેટ પહેરવાની મહત્વતા પર ભાર મૂક્યો છે. આશા છે કે, આવી કાર્યવાહીથી લોકોમાં હેલ્મેટ પહેરવાની જાગૃતિ વધશે અને સડક દુર્ઘટનાઓમાં ઘટાડો થશે.

જામનગર શહેર અને જિલ્લામાં દિપાવલીના તહેવારો શાંતિપૂર્ણ માહોલમાં ઉજવાય અને કાયદો અને વ્યવસ્થા જળવાય તે અંગે જામનગર જીલ્લા પોલીસ અધિક્ષક પ્રેમસુખ ડેલુંના માર્ગદર્શન હેઠળ જામનગર શહેર વિભાગના નાયબ પોલીસ અધિક્ષક જયવીરસિંહ ઝાલા તથા જામનગર ગ્રામ્ય વિભાગના નાયબ પોલીસ અધિક્ષક રાજેન્દ્ર દેવધાની સુચનાથી ચાંપતો પોલીસ બંદોબસ્ત ગોઠવાયો છે.જામનગર શહેરમાં દીવાળીના તહેવારો શાંતિ રીતે ઉજવાય તેના ભાગરૂૂપે શાંતિ સમિતિની બેઠકો તેમજ બેંક, આંગડીયા પેઢી અને જવેલર્સ સંચાલકો સાથે તકેદારીના ભાગરૂૂપે બેઠકો તેમજ જિલ્લાની બોર્ડર ઉપર સજ્જડ બંદોબસ્ત સહિત ફુટ પેટ્રોલીંગ અને અધિકારીઓના બંદોબસ્ત અંગે પૂરજોશમાં તૈયારીઓ હાથ ધરી છે. દરમિયાન આજરોજ જામનગરના સિટી-એ ડિવિઝન પોલીસ સ્ટેશન ના પીઆઇ નિકુંજસિંહ ચાવડા સહિત સ્ટાફ દ્વારા શહેરની મુખ્ય બઝાર ગણાતી બર્ધન ચોક માર્કેટ, માંડવી ટાવર રોડ, સેન્ટ્રલ બેંક રોડ વિસ્તાર, ચાંદી બઝાર વિસ્તારમાં આવેલ સોની માર્કેટ સહિત દરબારગઢ વિસ્તારમાં ફુટ પેટ્રોલિંગ હાથ ધર્યું હતું. જેમાં સીટી એ. ડિવિઝનના જુદા જુદા પોલીસ ચોકીના પી.એસ.આઇ તથા અન્ય પોલીસ સ્ટાફ વગેરે જોડાયા હતા.

જામનગરના જે.એમ.સી. ગ્રાઉન્ડ, મહાવીર પાર્ક, ઓસવાળ-3 ખાતે ગુજરાત સરકાર દ્વારા રાજ્ય કક્ષાના સરસ મેળાનું આયોજન કરાયું છે. જ્યાં સમગ્ર રાજ્યના 33 જિલ્લાના 100 થી વધુ કારીગર બહેનો વિવિધ 50 સ્ટોલ્સના માધ્યમથી પોતાના ઉત્પાદનોનું વેંચાણ કરી રહ્યા છે.આ સરસ મેળામાં જામનગર તથા આસપાસના વિસ્તારોના નાગરિકો બહોળી સંખ્યમાં દિવાળીની ખરીદી કરી વડાપ્રધાન નરેન્દ્રભાઈ મોદીના વોકલ ફોર લોકલના મંત્રને ચરિતાર્થ કરવાની સાથે આ પ્રકારના ઉમદા આયોજન બદલ રાજ્ય સરકારનો આભાર પણ વ્યક્ત કરી રહ્યા છે.
આગામી તા.28 ઓક્ટોબર સુધી ચાલનારા આ સરસ મેળામાં સમગ્ર રાજ્યના સખી મંડળના બહેનો દ્વારા હેન્ડલુમ, હેન્ડીક્રાફટ, ફુડ પ્રોડક્ટ, ગૃહ સુશોભન, વણાટ કામની વસ્તુઓ, ઝૂલા, ડ્રેસ મટીરીયલ, સાડી, બાંધણીના દુપટ્ટા, નાઈટ લેમ્પ, દોરીવર્કની બનાવટ, સિઝનેબલ મસાલા અને અથાણા, ઓર્ગેનીક સરબતો જેવી વિવિધ ચીજ વસ્તુઓનું સીધુ જ વેચાણ કરવામાં આવી રહ્યું છે. દિવાળીની ખરીદી કરવા આવેલ જામનગર જિલ્લાના વસઈ ગામના રહેવાસી જેસલબેન રબારી આ અંગે પોતાની પ્રતિક્રિયા આપતા જણાવે છે કે આજે મેં જામનગર ખાતે રાજ્ય સરકાર દ્વારા આયોજિત સરસ મેળાની મુલાકાત લીધી હતી.

જ્યાં વિવિધ સ્ટોલના માધ્યમથી દિવાળી તથા સુશોભનને લગતી અવનવી તમામ વસ્તુઓ ખૂબ જ વ્યાજબી ભાવે એક જ સ્થળેથી ખરીદવાનો અમને અવસર મળ્યો છે.હેન્ડક્રાફ્ટના ખૂબ જ કલાત્મક ઉત્પાદનો અહીં જોવા મળે છે કે જે ખરીદવા હોય તો ખૂબ જ દૂર સુધી જવું પડે.રાજ્ય સરકારે એક જ પ્લેટફોર્મ પર આખા રાજ્યના ઉત્પાદનો લાવી સ્થાનિક કારીગરો બહેનો અને ખરીદી કરનાર નાગરિકો માટે કડીરૂૂપ બનવાનું મહત્વનું કાર્ય કર્યું છે. રાજ્યના 33 જિલ્લાઓની સુવિખ્યાત વસ્તુઓ અહીં આપણે એક જ સ્થળેથી ખરીદી શકીએ છીએ તેમ જણાવી જામનગર તથા આજુબાજુના જિલ્લાના સૌ નાગરિકોને એકવાર આ સરસ મેળાની મુલાકાત લેવા તેમજ અચૂક અહીંથી ખરીદી કરવા જેસલબેન રબારીએ અપીલ કરી છે.