પીકઅપ અને કાર વચ્ચેની જોરદાર ટક્કરમાં કાર 70 ફૂટ દૂર ફંગોળાઈ
મઘરીખડા પાસે સર્જાયેલ ત્રિપલ અકસ્માતમાં બે ગંભીર, બે ના ઘટના સ્થળે મોત
ચોટીલા-અમદાવાદ હાઈવે પર આજે સવારના સમયે મઘરીખડા ગામ નજીક એક કમકમાટીભર્યો અકસ્માત સર્જાયો હતો. પૂરપાટ ઝડપે જતી ખાનગી કાર અને પીકઅપ વાન વચ્ચે થયેલી આ ભયાનક અથડામણમાં બે વ્યક્તિઓના ઘટનાસ્થળે જ કમકમાટીભર્યા મોત નિપજ્યા છે, જ્યારે એક બાળક સહિત બે વ્યક્તિઓની હાલત અત્યંત નાજુક હોવાનું જાણવા મળ્યું છે.
70 ફૂટ સુધી ફંગોળાઈ કાર પ્રાપ્ત વિગતો અનુસાર, અમદાવાદ પાસિંગની એક ખાનગી કાર ચોટીલા હાઈવે પરથી પસાર થઈ રહી હતી ત્યારે મઘરીખડા પાસે અચાનક પીકઅપ વાન સાથે તેની જોરદાર ટક્કર થઈ હતી. અકસ્માત એટલો ભયંકર હતો કે કાર હાઈવે પરથી અંદાજે 70 ફૂટ જેટલી દૂર ફંગોળાઈ હતી અને રોડ સાઈડમાં આવેલી હોટલના ગ્રાઉન્ડમાં પડેલા અન્ય એક ટ્રક સાથે જઈને અથડાઈ હતી. આમ, આ ઘટનામાં ત્રિપલ વાહન અકસ્માત સર્જાયો હતો.
હતાહત અને ઇજાગ્રસ્તો આ દુર્ઘટનામાં કારમાં સવાર અમદાવાદના પરિવારના એક પુરુષ અને એક મહિલાના સ્થળ પર જ મોત નિપજ્યા છે. જ્યારે અન્ય બે ઇજાગ્રસ્તોમાં એક માસૂમ બાળક અને કારના ચાલકનો સમાવેશ થાય છે. બંનેની સ્થિતિ ગંભીર જણાતા તેઓને પ્રાથમિક સારવાર બાદ તાત્કાલિક વધુ સારવાર અર્થે રાજકોટ ખાતે ખસેડવામાં આવ્યા છે.
ખુલ્લું ડિવાઈડર બન્યું ’મોતનું કારણ’?
પ્રાથમિક અનુમાન મુજબ, હાઈવે પર રાખવામાં આવેલું ખુલ્લું ડિવાઈડર આ અકસ્માતનું મુખ્ય કારણ હોવાનું મનાય છે. પીકઅપ વાન જ્યારે આ ખુલ્લા ડિવાઈડર પરથી રોડ ક્રોસ કરી ટર્ન લઈ રહી હતી, તે જ સમયે પુરપાટ ઝડપે આવતી કાર તેની સાથે અથડાઈ હતી.
પોલીસ કાર્યવાહી
ઘટનાની જાણ થતા જ ચોટીલા પોલીસનો કાફલો તાત્કાલિક ઘટનાસ્થળે દોડી ગયો હતો. પોલીસે ત્વરિત કાર્યવાહી કરી ઇજાગ્રસ્તોને હોસ્પિટલ પહોંચાડ્યા હતા અને મૃતકોના દેહને પીએમ માટે ચોટીલા હોસ્પિટલ ખસેડ્યા હતા. અકસ્માત બાદ ખોરવાયેલા વાહન વ્યવહારને પોલીસે પૂર્વવત કરાવ્યો છે અને મૃતકોના પરિવારજનોનો સંપર્ક કરવા માટે વધુ તપાસ હાથ ધરી છે.