રશિયા પાસેથી ઓઇલ ખરીદતા દેશોને નિશાન બનાવતા બિલને વ્હાઇટ હાઉસની મંજૂરી
આગામી દિવસોમાં ભારત અને અમેરિકા વચ્ચેના સંબંધોમાં કડવાશ આવી શકે છે. અમેરિકા તેની સંસદમાં એક એવું બિલ રજૂ કરવા જઈ રહ્યું છે, જે જો પસાર થઈ જશે તો ભારત માટે રશિયા પાસેથી તેલ ખરીદવું ખૂબ જ મોંઘું સાબિત થઈ શકે છે. આ બિલ હેઠળ ભારત પર 500% સુધીનો જંગી ટેરિફ લાગી શકે છે. અમેરિકાનું આ પગલું રશિયા-યુક્રેન યુદ્ધને સમાપ્ત કરવાના દબાણના ભાગરૂૂપે લેવાઈ રહ્યું છે.
અમેરિકામાં રશિયા વિરુદ્ધ “રશિયા પર પ્રતિબંધ લગાવવાનો અધિનિયમ 2025” નામનો એક નવો અને કડક પ્રતિબંધ કાયદો તૈયાર થઈ રહ્યો છે. આ દ્વિપક્ષીય બિલ રિપબ્લિકન સેનેટર લિન્ડસે ગ્રેહામ અને ડેમોક્રેટિક સેનેટર રિચર્ડ બ્લુમેન્ટલ દ્વારા રાષ્ટ્રપતિ ડોનાલ્ડ ટ્રમ્પ સાથેની બેઠક બાદ સંયુક્ત રીતે તૈયાર કરવામાં આવ્યું છે અને તેને વ્હાઇટ હાઉસની મંજૂરી પણ મળી ગઈ છે.
આ કાયદા હેઠળ, જો રશિયા શાંતિ વાર્તામાં સહયોગ નહીં કરે અથવા કોઈ સમજૂતીનું ઉલ્લંઘન કરશે, તો અમેરિકાને એવા દેશો પર ભારે ટેરિફ લગાવવાનો અધિકાર મળશે જે રશિયા પાસેથી ઉર્જા ઉત્પાદનો ખરીદે છે.
આ બિલની સૌથી કડક જોગવાઈ અનુસાર, રશિયા પાસેથી તેલ, ગેસ, યુરેનિયમ કે અન્ય ઉર્જા ઉત્પાદનો ખરીદનારા દેશોના અમેરિકી આયાત પર 500% સુધીનો ટેરિફ લગાવી શકાય છે. આ સ્થિતિમાં ભારત ખાસ નિશાના પર છે, કારણ કે યુક્રેન યુદ્ધ શરૂૂ થયા બાદ ભારતે પોતાની ઉર્જા જરૂૂરિયાતોને પહોંચી વળવા માટે રશિયા પાસેથી મોટા પ્રમાણમાં સસ્તું ક્રૂડ ઓઈલ ખરીદ્યું છે.
જો આ નવું બિલ લાગુ થશે, તો ભારતને અમેરિકી ટેરિફનો સામનો કરવો પડી શકે છે, જેનાથી ભારત-અમેરિકાના વેપાર સંબંધો પર નકારાત્મક અસર પડવાની પૂરી આશંકા છે. રાષ્ટ્રપતિ ડોનાલ્ડ ટ્રમ્પે પણ અગાઉ સંકેત આપ્યા હતા કે જો ભારત રશિયા પાસેથી તેલ ખરીદવાનું ચાલુ રાખશે, તો અમેરિકા ટેરિફ વધારી શકે છે.
બિલથી આંતરરાષ્ટ્રીય સંબંધો બદલાશે
વિશ્ર્લેષકોનું માનવું છે કે આ પગલું રશિયાને આર્થિક રીતે નબળું પાડશે, પરંતુ તેનાથી વૈશ્વિક ઉર્જા બજારમાં અસ્થિરતા અને મિત્ર દેશો વચ્ચે તણાવ પણ વધી શકે છે. હવે અમેરિકી સેનેટમાં આ બિલ પર આવતા અઠવાડિયે મતદાન થવાનું છે, જે આંતરરાષ્ટ્રીય સંબંધોની નવી દિશા નક્કી કરશે.
