યુકેમાં 53મિલિયન યુરો મની લોન્ડરિંગ કરનારા ત્રણ ગુજરાતી સહિત પાંચ લોકોને કોર્ટ દ્વારા કુલ 35 વર્ષની સજા સંભળાવવામાં આવી છે જેમાં જિગર ઘીવાલા, રાજુ પટેલ અને ભાવિક કોટેચા નામના ત્રણ ગુજરાતીઓનો સમાવેશ થાય છે જ્યારે તેમના સિવાય ઈમરાન વઈદ અને સલીમ સિદાત નામના અન્ય બે લોકોને પણ કસૂરવાર ઠેરવવામાં આવ્યા હતા. સુવ્યવસ્થિત રીતે આચરવામાં આવેલા આ કૌભાંડમાં 2019થી 2021ના ગાળામાં ક્રિપ્ટોકરન્સી અને ભાડાંના બેંક અકાઉન્ટ દ્વારા બ્લેક મનીને વ્હાઈટમાં ફેરવવામાં આવ્યા હતા અને તેના માટે લિસ્ટરના પોસ્ટ ઓફિસ નેટવર્કનો ઉપયોગ કરાયો હતો.
આ કાંડને પકડવા માટે યુકેની પોલીસે 2021માં ઓપરેશન કિલો શરૂૂ કર્યું હતું જેમાં ઉંડાણપૂર્વક હાથ ધરવામાં આવેલી તપાસમાં એવું બહાર આવ્યું હતું કે લિસ્ટરમાં લાખો પાઉન્ડની ક્રિમિનલ કેશ એટલે કે બેનંબરી કેશ ટ્રાન્સફર કરાઈ રહી છે અને તેને પોસ્ટ ઓફિસો મારફતે સમગ્ર યુકેની બેન્કિંગ સિસ્ટમમાં ડમ્પ કરાઈ રહી છે. કોર્ટમાં રજૂ કરવામાં આવેલા ડોક્યુમેન્ટ્સ અનુસાર કૌભાંડીઓએ સિસ્ટમેટિક અપ્રોચ અપનાવતા ટોકન સિસ્ટમનો ઉપયોગ કરી કેશ ડિલિવરીને મેનેજ કરી હતી અને અલગ-અલગ લોકો મારફતે ભાડાંના બેન્ક અકાઉન્ટમાં નાની-નાની રકમ જમા કરાવી હતી.
ભેજાબાજોએ એ વાતનું ખાસ ધ્યાન રાખ્યું હતું કે મોટી રકમને એ રીતે સ્મોલ અમાઉન્ટમાં ફેરવવામાં આવે કે પોલીસ અથવા બીજી કોઈ એજન્સીને તેની ગંધ સુદ્ધા ના આવે. જોકે, 2021માં શરૂૂ થયેલી તપાસમાં પોલીસને દસ લોકો વિરૂૂદ્ધ પુરાવા મળી આવતા તેની મની લોન્ડરિંગનું કાવતરૂૂં રચવાના આરોપમાં ધરપકડ કરવામાં આવી હતી.
આ પ્રકરણની તપાસમાં પોલીસે અઢી લાખ પાઉન્ડ કેશ જપ્ત કર્યા હતા અને સાથે જ કૌભાંડીઓ પાસેથી બે લાખ પાઉન્ડના ગોલ્ડ ઉપરાંત ડિઝાઈનર કપડાં, ઘડિયાળો અને જ્વેલરી સહિતની વસ્તુઓ મળી આવી હતી. આ કેસની ટ્રાયલ અઢી મહિના સુધી ચાલી હતી જેમાં રાજુ પટેલ અને ભાવિન કોટેચાને કસૂરવાર ઠેરવવામાં આવ્યા હતા જ્યારે જિગર ઘીવાલાએ પોતાનો ગુનો કબૂલ કરી લીધો હતો. કોર્ટે કસૂરવારો સામે રજૂ કરાયેલા પુરાવા અને તેમણે કરેલા ગુનાની ગંભીરતાને જોતા જિગર ઘીવાલાને 11 વર્ષ અને દસ મહિનાની જેલની સજા કરી છે જ્યારે ભાવિન કોટેચાને સાડા આઠ વર્ષ અને રાજુ પટેલને આઠ વર્ષની જેલની સજા સંભળાવવામાં આવી છે. જેલની સજા સાથે આ ત્રણેયને આગામી 14થી 10 વર્ષ સુધી કોઈ કંપનીમાં ડિરેક્ટર પણ નહીં બની શકે.
