પશ્ચિમ કચ્છમાં ગેરકાયદેસર પ્રવૃત્તિઓ પર એક જ દિવસમાં જુદા-જુદા બે સ્થળે સ્ટેટ મોનિટારિંગ સેલે ધોંસ બોલાવી હતી. મુંદરા તાલુકાના પ્રાગપર પોલીસ સ્ટેશન વિસ્તારમાં ત્રાટકેલી એસ.એમ.સી.ની ટીમે એક ખૂબ જ મોટો ઓપરેશન પાર પાડીને આંતરરાજ્ય તેલ ચોરીના મસમોટા કૌભાંડનો પર્દાફાશ કર્યો હતો અને લાખો લિટર ચોરીના ઓઇલ સાથે રૂૂા. 4,34,52,635થી વધુનો મુદ્દામાલ કબજે કરવા સાથે 11 આરોપીની ધરપકડ કરી હતી, જ્યારે મુખ્ય સૂત્રધાર એવા પાંચ આરોપીને વોન્ટેડ જાહેર કરાયા હતા. પોલીસે આપેલી વિગતો મુજબ, એસએમસીના પોલીસ ઇન્સ્પેક્ટર એસ. એમ. જાડેજા અને તેમની ટીમને મળેલી ચોક્કસ બાતમીના આધારે મુંદરા તાલુકાના રતાડિયા (ગણેશવાળા) સીમના ખેતી વિષયક ખુલ્લા મેદાનમાં મોડી રાત્રે દરોડો પડાયો હતો. મોખા ટોલ પ્લાઝાથી મુંદરા તરફ જતા હાઇવે પર શિવમ હોટેલની બાજુમાં જ્યાં 66 કેવી પત્રી-મુંદરા લાઇન પસાર થાય છે, ત્યાં ખુલ્લા ખેતરમાં ક્ધટેનર મારફતે આ આખું નેટવર્ક ચલાવવામાં આવી રહ્યું હતું. આ દરોડા સમયે કંડલા અને મુંદરા વચ્ચે ચાલતા મોટા ઓઇલ ટેન્કરોમાંથી ગેરકાયદેસર રીતે કિંમતી તેલ ચોરી કરીને બેરલ અને કાર્બોયમાં ભરવાનું મોટું કૌભાંડ ચાલી રહ્યું હતું.
એસએમસીની ટીમે ઘટનાસ્થળેથી 11 જેટલા આરોપીને ઝડપી લીધા હતા, જેમાં ક્ધટેનરમાં રહીને મજૂરી કરતા ઉત્તર પ્રદેશ, ઝારખંડ, અને રાજસ્થાનના શ્રમિકો તેમજ તેલની હેરાફેરી કરતા ટેન્કરોના ડ્રાઈવર અને ક્લીનર સામેલ છે. રાજેશકુમાર રામવીરાસિંહ રાજપૂત (યુ.પી.), અવનીશ રામશંકર કશ્યપ (રાજપૂત) (યુ.પી.), ચંદ્રિકા ભોલાડા પાંડે (ઝારખંડ), વિક્રમાસિંહ ભવરાસિંહ ભટ્ટી (રાજસ્થાન), વિકાસકુમાર જયનારાયણ મહેતા (ઝારખંડ), શિવકુમાર રાજારામ પાસવાન (ઝારખંડ), શક્તિભાઈ મશાભાઈ મુંધવા (રાપર), અરુણ મુના ઉરાં (ઝારખંડ), શનિકુમાર બંગાળી પ્રસાદ મહેતા (ઝારખંડ), આકાશકુમાર રાજારામ યાદવ (ઉત્તરપ્રદેશ) અને પ્રભાત ભૂષણાસિંહ સભાપતિ સિંહ (બિહાર)નો સમાવેશ થાય છે, જેમને આગળની તપાસ માટે પ્રાગપર પોલીસને સોંપવામાં આવ્યા છે. જો કે, આ કૌભાંડના માસ્ટરમાઇન્ડ અબ્દુલ ગફુરભાઈ અહેમદ હાલેપોત્રા (રહે. આદિપુર, કચ્છ) – જેના માટે આ મજૂરો કામ કરતા હતા. પંકજભાઈ (રહે. અંજાર), ધ્રુવરાજાસિંહ પ્રદ્યુમનાસિંહ જેઠવા (રહે. અંજાર), ગોપાલભાઈ લાખાભાઈ ગઢવી (રહે. વવાર, તા. મુંદરા) અને હરભમભાઈ રબારી (રહે. ભીમાસર) હજુ પણ પોલીસ પકડથી દૂર છે, જેમને પકડવા ચક્રો ગતિમાન કર્યા છે.
પકડાયેલા મુદ્દામાલમાં રૂૂા. 1,50,00,000ની કિંમતના છ મોટા ટેન્કર, જેમાં 2,05,170 કિલો ઓઈલ ભરેલું હતું, જેની કિં. રૂૂા. 2,81,50,245, 1,465 કિલો ચોરી કરાયેલું તેલ, જેની કિં. રૂૂા. 1,78,090, 60,000ની કિંમતના 10 મોબાઈલ તથા 35,000ની કિંમતની એક બાઈક જપ્ત કરાયા હતા. તે ઉપરાંત 50 પ્લાસ્ટિક બેરલ, મેટલ બેરલ, 72 જેટલા કાર્બોય, ઇલેક્ટ્રિક મોટર, વજન માપવાનું મશીન અને ઓઇલ લિકેજ સ્ટોપર્સ સહિત કુલ રૂૂા. 4,34,52,635થી વધુનો મુદ્દામાલ કબજે કરાયો હતો. આ સમગ્ર મામલે પ્રાગપર પોલીસ સ્ટેશનમાં ભારતીય ન્યાય સંહિતા (બીએનએસ)-2023ની 303(2), 306, 316(3) (વિશ્વાસઘાત અને ચોરી) તથા સંગઠિત ગુનાખોરી અને કાવતરાને લગતી કલમ 61(2) અને 111(2) હેઠળની ગંભીર કલમો તળે ગુનો નોંધી વધુ તપાસ હાથ ધરી છે.
