રીબડા નજીક પડવલા ફાટક ઉપર જ ટ્રક ચાલકે બ્રેક મારતા રેલતંત્ર મોડી રાત સુધી દોડતુ રહ્યું
રાજકોટ નજીક આવેલા વેરાવળ-પડવલા ફાટક પાસે આજે એક ટ્રક ચાલકની ગંભીર બેદરકારીને કારણે મોટી દુર્ઘટના સર્જાતા રહી ગઈ હતી. ટ્રકમાંથી લોખંડના ભારેખમ ગડરો સીધા રેલવે ટ્રેક પર ખાબકતા રેલવે વ્યવહારમાં મોટા પાયે ખલેલ પહોંચી હતી. આ ઘટનાને પગલે સુરક્ષાના કારણોસર તંત્ર દ્વારા તાત્કાલિક અસરથી રાજકોટ અને રીબડા રેલવે સ્ટેશને ટ્રેનોને થોભાવી દેવાની ફરજ પડી હતી, જેના કારણે હજારો મુસાફરો અટવાયા હતા.
પ્રાપ્ત વિગતો અનુસાર, લોખંડના ભારે ગડરો ભરીને જઈ રહેલી એક ટ્રક જ્યારે ફાટક પાસેથી પસાર થઈ રહી હતી, ત્યારે ચાલકની બેદરકારી અથવા અચાનક બ્રેક મારવાને કારણે ગડરો રસ્તા પર પડવાને બદલે સીધા રેલવે ટ્રેક પર જઈ પડ્યા હતા. સદનસીબે તે સમયે ટ્રેક પર કોઈ ટ્રેન પસાર થઈ રહી નહોતી, અન્યથા મોટી જાનહાનિ થઈ શકી હોત. આ ગડરો એટલા વજનદાર હતા કે તેને સામાન્ય રીતે હટાવવા અશક્ય હતા, જેના કારણે રેલવે કંટ્રોલ રૂૂમને તાત્કાલિક જાણ કરવામાં આવી હતી અને ટ્રેનોના સિગ્નલ લાલ કરી દેવાયા હતા.
ઘટનાની જાણ થતા જ રેલવે વિભાગની ટેકનિકલ ટીમ, એન્જિનિયરો અને ઉચ્ચ અધિકારીઓનો કાફલો ઘટનાસ્થળે દોડી ગયો હતો. ટ્રેક પરથી લોખંડના ભારે અવરોધ દૂર કરવા માટે ક્રેઈન અને મજૂરોની મદદ લેવામાં આવી હતી. અંદાજે કલાકો સુધી ચાલેલી આ કામગીરીને કારણે રેલવેનું શિડ્યુલ સંપૂર્ણપણે ખોરવાઈ ગયું હતું. રાજકોટ અને રીબડા સ્ટેશન પર ટ્રેનો ઉભી રાખી દેવાતા મુસાફરોને ખાવા-પીવા અને સમયસર પહોંચવા બાબતે ભારે હાલાકી ભોગવવી પડી હતી. ખાસ કરીને ઉનાળાની સિઝનમાં મુસાફરોને સ્ટેશનો પર લાંબો સમય રાહ જોવી પડી હતી.
રેલવે સત્તાધીશો દ્વારા આ ગંભીર બેદરકારી બદલ ટ્રક ચાલક સામે રેલવે એક્ટ હેઠળ કાયદેસરની કાર્યવાહી કરવાની તજવીજ હાથ ધરવામાં આવી છે. રેલવે પ્રોટેક્શન ફોર્સ (RPF) અને સ્થાનિક પોલીસે આ મામલે ગુનો નોંધી વધુ તપાસ શરૂૂ કરી છે. લાંબા અંતરની અનેક ટ્રેનો નિર્ધારિત સમય કરતા 2 થી 3 કલાક મોડી પડી હોવાથી મોડી રાત સુધીમાં જ રેલવે વ્યવહાર સંપૂર્ણપણે સામાન્ય થયો હતો.
