રાજકોટના બેડલા ગામમાં પ્રેમ પ્રકરણને કારણે એક ઘટના સામે આવી છે, જેમાં વ્યક્તિગત અદાવતને લીધે વાહનને આગ ચાંપી દેવામાં આવી હતી. આ ઘટના ગત તા. 13 જુલાઈ 2026ના રોજ બની હતી, જેમાં બેડલા ગામથી બારવણ ચોકડી તરફ જતા હજામના ઢોરે મેલડીમાના મંદિર નજીકના કાચા રસ્તે એક યુવાનનું સ્કૂટર સળગાવી દેવામાં આવ્યું હતું.
આ મામલે રાજકોટના એરપોર્ટ પોલીસ સ્ટેશનમાં ફરિયાદ નોંધવામાં આવી છે. ફરિયાદી દયાબેન સોરાણીએ પોલીસ ફરિયાદમાં જણાવ્યું છે કે તેમના પતિ વિશાલ સોરાણીનું સ્કૂટર પેટ્રોલ છાંટીને સળગાવી દેવામાં આવ્યું હતું, જેનાથી આશરે 60,000 રૂૂપિયાનું આર્થિક નુકસાન થયું છે. આ ઘટના બાદ ગામમાં ભારે ચકચાર મચી જવા પામી છે.
આ સમગ્ર ઘટના પાછળનું મુખ્ય કારણ પ્રેમ સંબંધ હોવાનું બહાર આવ્યું છે. ફરિયાદી દયાબેન સોરાણીના જણાવ્યા અનુસાર, તેમના પતિ વિશાલ સોરાણીના ગામમાં જ રહેતા વિશાલ પત્ની સાથે પ્રેમ સંબંધો હતા. આ સંબંધની જાણ વિશાલને થતાં તે અત્યંત રોષે ભરાયો હતો. પરિણામે, તેણે વિશાલ સોરાણી સાથે ઝઘડો કર્યો હતો. આ ઝઘડા દરમિયાન ગભરાયેલા વિશાલ સોરાણી જીવ બચાવવા માટે સ્થળ પરથી ભાગી છૂટ્યા હતા, જેના પગલે ગુસ્સામાં આવેલા આરોપી વિશાલએ તેમનું સ્કૂટર સળગાવી નાખ્યું હતું. માત્ર એટલું જ નહીં, આ બનાવના બીજા દિવસે જ્યારે ફરિયાદીના સાસુ લાભુબેન ગામમાં નીકળ્યા હતા, ત્યારે આરોપીએ તેમની સાથે પણ દુર્વ્યવહાર કરીને અપશબ્દો બોલ્યા હતા. આ બનાવ બાદ સમાધાનના પ્રયાસો નિષ્ફળ જતા, અંતે ફરિયાદી દયાબેન સોરાણીએ તેમના પરિવારજનો સાથે મળીને એરપોર્ટ પોલીસ સ્ટેશનનો સંપર્ક કર્યો હતો.
પોલીસે ફરિયાદના આધારે આરોપી વિશાલ વિરુદ્ધ ગુનો નોંધીને તપાસ હાથ ધરી છે. આરોપીએ કરેલી તોડફોડ અને ધમકીના કારણે ફરિયાદી પક્ષે ભયનું વાતાવરણ જોવા મળી રહ્યું છે. પોલીસ હવે આ કેસમાં વધુ તપાસ કરી રહી છે