જેતપુર રણુજા મંદિરના મહંતનો કૂવામાં પડી આપઘાત

ગંભીર બીમારીથી કંટાળી આત્યંતિક પગલું ભર્યાની સ્યુસાઇડ નોટ મળી

રાજકોટ સહિત સમગ્ર પંથકમાં ભારે અરેરાટી અને આઘાત ફેલાવી દેનારા એક દુ:ખદ સમાચાર સામે આવ્યા છે. જેતપુર-બગસરા રોડ પર આવેલા સુપ્રસિદ્ધ રણુંજા મંદિરના મહંત કરશનદાસ બાપુનો મૃતદેહ એક વાડીના કૂવામાંથી મળી આવતા સમગ્ર પંથકમાં ચકચાર મચી ગઈ છે. બોરડી સમઢીયાળા અને ખારચિયા ગામની નજીક કરશનદાસ બાપુના અકાળ અવસાનના સમાચાર વાયુવેગે પ્રસરતા જ તેમના અસંખ્ય સેવકો, શ્રદ્ધાળુઓ અને સ્થાનિક ગ્રામજનોમાં ભારે શોકનું મોજું ફરી વળ્યું છે. આશ્રમમાં દીર્ઘકાળ સુધી નિ:સ્વાર્થ સેવા આપનારા સંતના આવા રહસ્યમય સંજોગોમાં વિદાયથી સમગ્ર ધાર્મિક જગત સ્તબ્ધ થઈ ગયું છે. પ્રાથમિક વિગતો મુજબ, મહંત છેલ્લા કેટલાક સમયથી અત્યંત ગંભીર બીમારીથી પીડાતા હતા અને તે બીમારીની અસહ્ય પીડાથી કંટાળીને તેમણે આ આખરી પગલું ભર્યું હોવાની આશંકા સેવાઈ રહી છે.

આ હૃદયદ્રાવક ઘટનાની જાણ થતાં જ મોટી સંખ્યામાં ભક્તો, સેવકો અને આસપાસના ગ્રામજનોના ટોળેટોળાં તાત્કાલિક ઘટનાસ્થળે ઉમટી પડ્યા હતા. લોકોની આંખોમાં આંસુ અને ચહેરા પર ઘેરો આઘાત સાફ જોઈ શકાતો હતો. ઘટના અંગે તાત્કાલિક જેતપુર તાલુકા પોલીસને જાણ કરવામાં આવી હતી, જેથી પોલીસ કાફલો પણ વગર વિલંબે ઘટનાસ્થળે દોડી ગયો હતો. સ્થાનિક તરવૈયાઓ અને વહીવટી તંત્રની મદદથી મહંત કરશનદાસ બાપુના મૃતદેહને કૂવામાંથી બહાર કાઢવામાં આવ્યો હતો અને તેને તાત્કાલિક પોસ્ટમોર્ટમ અર્થે હોસ્પિટલમાં ખસેડાયો હતો. પોલીસના જણાવ્યા અનુસાર, પોસ્ટમોર્ટમ રિપોર્ટ આવ્યા બાદ જ મહંતના મોતના અસલી અને ચોક્કસ કારણોનો સત્તાવાર ખુલાસો થઈ શકશે. હાલ પોલીસે આ સમગ્ર મામલે કાયદેસરની કાર્યવાહી હાથ ધરીને ઊંડાણપૂર્વક તપાસનો ધમધમાટ શરૂૂ કર્યો છે.

ઘટનાસ્થળેથી મહંત કરશનદાસ બાપુ દ્વારા લખાયેલી એક ભાવુક સુસાઇડ નોટ પણ મળી આવી છે, જેમાં તેમણે પોતાના આ આત્યંતિક પગલા પાછળનું કારણ સ્પષ્ટ કર્યું છે.બાપુએ પત્રમાં જણાવ્યું છે કે તેઓ છેલ્લા 10 વર્ષથી કેન્સર જેવા ગંભીર અને જીવલેણ દર્દથી પીડાતા હતા. અત્યાર સુધી તેઓ વિવિધ સેવાસ્તુ પ્રયોગો અને અમુક દવાઓના લીધે જ જીવતા રહ્યા હતા, પરંતુ હવે આ શારીરિક પીડા તેમની સહનશક્તિની બહાર થઈ ગઈ હોવાથી તેમણે મનથી આ પગલું ભર્યું છે.

મહંત કરશનદાસ બાપુએ પોતાની સુસાઇડ નોટમાં આશ્રમના 45 વર્ષના સેવાકાળ દરમિયાન સહકાર આપનાર તમામ ભક્તો અને વિવિધ સામાજિક-સરકારી સંસ્થાઓનો આભાર માન્યો છે. તેમણે પત્રમાં લખ્યું છે કે, “દરેકને વિચાર આવશે કે બાપુએ આવું પગલું કેમ ભર્યું, પણ કેન્સરની અસહ્ય પીડા હવે સહન થતી ન હોવાથી મેં આ પગલું ભર્યું છે.” તેમણે તમામ ભક્તોના પરિવારની સુખાકારીની પ્રભુ ચરણોમાં પ્રાર્થના કરી સર્વેને અંતિમ વિદાય આપતા ’જય સીતારામ’ લખ્યું છે.

આશ્રમની ભાવિ જવાબદારી રામદાસ બાપુને સોંપવા વિનંતિ કરી
મહંત કરશનદાસ બાપુએ પોતાની સુસાઇડ નોટમાં પોતાના પૂર્વાશ્રમ અને પરિવાર વિશે પણ મહત્વનો ઉલ્લેખ કર્યો છે. તેમણે જણાવ્યું કે છેલ્લા 47 વર્ષથી તેઓ પોતાના પરિવારને છોડી ચૂક્યા છે અને હાલ તેમના વિશે તેમને કોઈ ખાસ માહિતી નથી. તેમનો જન્મ વરિયા કુંભાર જ્ઞાતિમાં થયો હતો અને ટાટા મીઠાપુર પાસે સુરજ કરાડી ખાતે તેમનું મૂળ રહેઠાણ હતું, જ્યારે તેમના ભાઈઓ જામનગર શંકર ટેકરી ખાતે રહેતા હતા.પત્રના અંતે તેમણે આશ્રમની ભાવિ વ્યવસ્થા અંગે ઈચ્છા વ્યક્ત કરતા જણાવ્યું છે કે, જો શક્ય હોય તો બોરડી સમઢીયાળાના સરપંચ અને અન્ય કાર્યકર્તાઓએ નવા રણુંજા આશ્રમની જવાબદારી વડલા હનુમાન મંદિરે સેવા આપતા શ્રી રામદાસ બાપુને સોંપવી. આ પત્રમાં તેમણે પોલીસ તંત્ર, પીજીવીસીએલ, પાણી પુરવઠા વિભાગ અને ગૌશાળા સહિતની તમામ સંસ્થાઓનો પણ આભાર માનીને સર્વેને ’જય સીતારામ’ પાઠવ્યા છે.