સોશિયલ મીડિયા પર સસ્તામાં મોબાઈલ ફોન વેચવાની જાહેરાત મુકી, ગ્રાહક પાસેથી ઓનલાઈન નાણાં ટ્રાન્સફર કરાવી, મોબાઈલ નહીં આપી, પોતાનો મોબાઈલ સ્વીચ ઓફ કરી, સીમ કાર્ડ તોડી નાખી, નવું સીમ કાર્ડ લઈ ફરીથી છેતરપિંડી કરવાની ટેવ ધરાવતાં રીઢા આરોપી જયેશ ઉર્ફે જયદિપ ઉર્ફે ડેવીડ વિઠ્ઠલ ઝાલા (ઉ.વ. 23, રહે. ચિત્રકૂટ મેઈન રોડ, ચિત્રકૂટ એપાર્ટમેન્ટ)ને ગાંધીગ્રામ-ર પોલીસે ઝડપી લીધો છે.
ક્રેડિટ કાર્ડ ફ્રોડને લગતી અરજીની ગાંધીગ્રામ-2ના એએસઆઈ સંજયભાઈ ઠાકર તપાસ કરતા હતા ત્યારે જયેશનું નામ ખુલતાં તેને ઝડપી લીધો હતો. તપાસ કરતાં તેના વિરૂૂધ્ધ સાયબર ફ્રોડ કરવા અંગે અત્યાર સુધીમાં રાજકોટ, સુરત, મોરબી, ગીરસોમનાથ, દેવભૂમિ દ્વારકા સહિતના વિસ્તારોમાં 11 ગુના નોંધાયાનું બહાર આવ્યું છે.
2021ની સાલમાં રાજકોટ પોલીસે તેની પાસા પણ કરી હતી.આ રીતે આટલા બધા ગુના નોંધાયા છતાં જયેશે છેતરપિંડી કરવાનું બંધ કર્યું ન હતું. ગાંધીગ્રામ-ર પોલીસે તપાસ આગળ ધપાવતાં સુરત, મોરબી, ગાંધીનગર, મહારાષ્ટ્ર,ગીર સોમનાથ અને રાજકોટમાં તેની આઠેક છેતરપિંડીમાં સંડોવણી ખુલી છે. જે રકમ રૂૂા. 4.28 લાખ છે. પોલીસે તેની પાસેથી રૂૂા. 20,000નો મોબાઈલ ફોન કબજે કર્યો છે. વધુ તપાસમાં એવું પણ ખુલ્યું છે કે સાયબર ફ્રોડ કરવા માટે તેણે પોતાના નામે 50થી વધુ સીમ કાર્ડ લઈ લીધા હતા. તે ફ્રોડની રકમ ઓનલાઈન ટેકસી ચલાવતાં ડ્રાઈવરોના ખાતામાં જમા કરાવી ઉપાડી લેતો હતો.
આ સ્થિતિમાં જયારે ગુના નોંધાતાં ત્યારે આવા ટેકસી ડ્રાઈવરોના ખાતા ફ્રિઝ થઈ જતાં હતા. તેનું નામ બહાર આવતું ન હતું.એક ગુનો કર્યા બાદ તે પોતાનું સીમ કાર્ડ તોડી નાખી,કંપનીમાં ફરિયાદ કરી નવું સીમ કાર્ડ ઈશ્યૂ કરાવી લેતો હતો. આ કામગીરી યુનીવર્સીટી પોલીસ મથકનાં પીઆઇ એચ. એન. પટેલની રાહબરીમા પીએસઆઇ વી.જી. ડોડીયા, એએસઆઇ સંજયભાઇ ઠાકર , જગમાલભાઇ ફટાણા, વિરદેવસિંહ જાડેજા, મહીપાલસિંહ જાડેજા અને ગોપાલસિંહ સહીતનાઓએ કરી હતી.
