રાજકોટ શહેરના પ્રદ્યુમનનગર પોલીસ સ્ટેશન વિસ્તારમાં પોલીસ દ્વારા હાથ ધરવામાં આવેલા પેટ્રોલિંગ દરમિયાન એક મહત્વની સફળતા મળી છે. તારીખ 08 મે, 2026ના રોજ રાત્રિના સમયે પોલીસ કોન્સ્ટેબલ વનરાજભાઈ બોરીચા અને તેમની ટીમ ખાનગી વાહનમાં પેટ્રોલિંગ કરી રહી હતી. આ દરમિયાન રેલનગર વિસ્તારમાં આવેલા સમર્પણ પાર્ક મેઈન રોડ પરના કોમન પ્લોટમાં કેટલાક ઈસમો શંકાસ્પદ હાલતમાં બેઠેલા જણાતા પોલીસે તપાસ હાથ ધરી હતી. સ્થળ પર પહોંચતા પોલીસને જાણવા મળ્યું હતું કે ચાર શખ્સો જાહેર સ્થળે ભેગા મળીને વિદેશી દારૂની મહેફિલ માણી રહ્યા હતા.
પોલીસે ઘટનાસ્થળેથી ચાર શખ્સોની અટકાયત કરી છે.જેમાં (1) ધર્મરાજસિંહ જીતેન્દ્રસિંહ ઝાલા (ઉંમર 30), (2) યશરાજસિંહ રઘુવીરસિંહ ઝાલા (ઉંમર 28), (3) યશરાજસિંહ વિક્રમસિંહ જાડેજા (ઉંમર 25) અને (4) ભૂમિરાજસિંહ ભરતસિંહ પરમાર (ઉંમર 32) નો સમાવેશ થાય છે. પોલીસના જણાવ્યા અનુસાર, આ ચારેય આરોપીઓ નશાની હાલતમાં હતા અને તેમની જીભ થોથરાતી હતી તેમજ આંખો લાલ જણાતી હતી.
જ્યારે પોલીસે તેમની પાસે દારૂ પીવા માટેના પાસ કે પરમિટની માંગણી કરી, ત્યારે તેમની પાસે કોઈ પણ પ્રકારનો કાયદેસરનો દસ્તાવેજ મળી આવ્યો ન હતો. આ શખ્સો સામે પ્રોહીબિશન એક્ટની વિવિધ કલમો હેઠળ ગુનો દાખલ કરવામાં આવ્યો છે. દરોડા દરમિયાન પોલીસને સ્થળ પરથી ભારતીય બનાવટના વિદેશી દારૂની ’રોયલ સ્ટેગ ક્લાસિક વ્હિસ્કી’ની 180 એમ.એલ.ની બે સીલબંધ બોટલો મળી આવી હતી, જેની કિંમત ₹500 આંકવામાં આવી છે. આ ઉપરાંત, એક અડધી ભરેલી બોટલ (કિંમત ₹80), બે ખાલી બોટલો, ચાર પ્લાસ્ટિકના ગ્લાસ અને ખાધ્ય પદાર્થો (વેફર, વટાણા વગેરે) મળી આવ્યા હતા. પોલીસે કુલ ₹580 નો મુદ્દામાલ જપ્ત કર્યો છે. આ સમગ્ર મામલે પીએસઆઇ જે.બી. રાણીંગા દ્વારા વધુ તપાસ હાથ ધરવામાં આવી રહી છે.
