આઈસીસી અંડર-19 વિશ્વ કપની પ્રથમ રોમાંચક સેમીફાઇનલમાં ઇંગ્લેન્ડે ઓસ્ટ્રેલિયાને 27 રનથી હરાવી દીધું છે. આ જીત સાથે ઇંગ્લેન્ડે ટૂર્નામેન્ટની ફાઇનલમાં પોતાની જગ્યા બનાવી લીધી છે. ફાઇનલમાં તેનો સામનો ભારત અને અફઘાનિસ્તાનની વચ્ચે થનારી બીજી સેમીફાઇનલની વિજેતા ટીમ સાથે થશે. પહેલી સેમીફાઇનલ મેચમાં ઇંગ્લેન્ડની ટીમે પહેલા બેટિંગ કરતા નિર્ધારિત 50 ઓવરની રમતમાં કપ્તાન થોમસ રેવની સદીવાળી ઇનિંગ્સના દમ પર 277 રનનો સ્કોર ઊભો કર્યો હતો.
ઇંગ્લેન્ડના સ્કોરના જવાબમાં ડિફેન્ડિંગ ચેમ્પિયન ઓસ્ટ્રેલિયાની ટીમે 47.3 ઓવરમાં 250 રન બનાવીને સમેટાઈ ગઈ. ટાર્ગેટનો પીછો કરતા ઓસ્ટ્રેલિયાના કપ્તાન ઓલિવર પીકે પોતાનું પૂરું જોર લગાવ્યું અને છેલ્લે સુધી કોશિશ કરી, પણ તે ટીમને જીત અપાવી શક્યો નહીં. ઓલિવર પીક પોતાની ટીમ માટે 88 બોલમાં 100 રનની ઇનિંગ્સ રમીને આઉટ થયો.
ઓસ્ટ્રેલિયા વિરુદ્ધ પહેલી સેમીફાઇનલમાં ઇંગ્લેન્ડની બોલિંગ શાનદાર રહી. ઇંગ્લેન્ડ તરફથી સૌથી વધારે સેબેસ્ટિયન મોર્ગન, જેમ્સ મિંટો, મેની લુમ્સડન અને રાલ્ફી અલ્બર્ટે 2-2 વિકેટ લીધી છે. આ ઉપરાંત એલેક્સ ફ્રેન્ચ અને ફરહાન અહમદને એક એક સફળતા મળી હતી. આ દરમ્યાન ઓસ્ટ્રેલિયા તરફથી બેટિંગમાં ઓલિવર પીક ઉપરાંત નિકેશ સૈમુઅલે 47 અને આર્યન શર્માએ 34 રનનું યોગદાન આપ્યું.
ઓસ્ટ્રેલિયા વિરુદ્ધ પહેલી સેમીફાઇનલ મેચમાં ઇંગ્લેન્ડના કપ્તાન થોમસ રેવે 110 રનની ઇનિંગ્સ રમી. પોતાની આ સદીવાળી ઇનિંગ્સમાં પણ તે દુર્ભાગ્યપૂર્ણ રીતે રન આઉટ થઈ ગયો. ઇંગ્લેન્ડ તરફથી બેટિંગમાં થોમસ ઉપરાંત ક્લેવ ફ્લેકનરે પણ 40 રનનું મહત્ત્વપૂર્ણ યોગદાન આપ્યું. જ્યારે ફરહાન અહમદે 28 અને જોસેફ મૂરીસે 25 રનની ઇનિંગ્સ રમી.
