વડોદરામાં ’ઝેપ્સ હેલ્થ કેર’ કંપનીના માલિક આરતીબેન સોનીએ મોટા દીકરા નીલકંઠ અને દીકરી જેની સાથે 27 ઓક્ટોબરના રોજ સામૂહિક આપઘાત કરી લીધો હતો. 50 વર્ષીય માતાએ બે પેજ અને પુત્રીએ એક પેજ એમ ત્રણ પાનાની સુસાઇડ નોટ લખી સોની પરિવારે પંખે ગળાફાંસો ખાઈ જીવન ટૂંકાવ્યું હતું.
સુસાઇડ નોટ પરથી પતિ, માતા-પિતા અને ભાઈનું મોત તેમજ આર્થિક સંકડામણમાં પગલું ભર્યું હોવાનો સામે આવ્યું છે. 33થી 35 લાખ બાકી લોનના પૈસા ભરવા મકાન વેચ્યું હતું જેનો દસ્તાવેજ પણ થવાનો હતો. આ ઉપરાંત હોસ્પિટલ વ્યવસ્થિત ચાલે તે માટે બાધા રાખી હોવાનો પણ ઉલ્લેખ કર્યો હતો.
સામૂહિક આપઘાત મામલે ACP જી.બી. બાંભણીયાએ જણાવ્યું હતું કે, મૃતક પરિવારના ઘરમાંથી ત્રણ પાનાની સુસાઇડ નોટ મળી આવી છે. પોસ્ટમોર્ટમ રિપોર્ટમાં તમામ સભ્યોના ગળે ફાંસો ખાવાથી મોત થયો હોવાની પુષ્ટિ થઈ છે. પ્રાથમિક તપાસમાં આર્થિક ભીંસ અને ડિપ્રેશનના કારણે પરિવારે આ પગલું ભર્યું હોવાનું સામે આવ્યું છે. ત્રણ પાનાની સુસાઇડ નોટમાંથી એક પાનું પુત્રી અને બે પાના માતા આરતીબેને લખ્યા હતા.
ACP એ વધુમાં જણાવ્યું હતું કે, પરિવારમાં પતિ, માતા-પિતા અને ભાઈના અગાઉ થયેલા અવસાન તથા આર્થિક તંગીના કારણે પરિજનો ઊંડા ડિપ્રેશનમાં સરી પડ્યા હોવાનું જણાઈ આવે છે. લોનના પૈસા ચૂકવવા માટે પરિવારે પોતાનું મકાન પણ વેચી દીધું હતું અને તેનો દસ્તાવેજ પણ થવાનો બાકી હતો. સુસાઇડ નોટમાં આ મકાન શૈલેષ પટેલને સોંપી દેવાનો પણ ઉલ્લેખ કર્યો છે. સોની પરિવારે હોસ્પિટલ વ્યવસ્થિત ચાલે તે માટે ખાટુશ્યામ ભગવાનની બાધા રાખી હતી અને પુત્રી જેનીએ એક લાખ વખત ભગવાન રામનું નામ લખ્યું હતું. આ ઉપરાંત ઘરમાં કામ કરતી મહિલા નિર્દોષ હોવાથી તેને પોલીસ કે અન્ય કોઈ દ્વારા હેરાન કર કરવાની ખાસ વિનંતી પણ કરી છે. ઘટનાસ્થળેથી પોલીસે ત્રણ મોબાઈલ ફોન અને સુસાઈડ નોટ સહિતના મહત્વના પુરાવાઓ કબજે કર્યા છે.
પોલીસે આ મામલે કાયદેસરની આગળની તપાસ તેજ કરી છે. હાલમાં સોની પરિવારના ત્રણે સભ્યોના મૃતદેહનું પેનલ પોસ્ટમોર્ટમ કર્યા બાદ તમના મૃતદેહને અંતિમવિધિ માટે પરિવારને આપી દેવામાં આવ્યા છે. સમાજના આગેવાન શશિકાંત પાટડીયાએ ઘટના અંગે પ્રતિક્રિયા આપતા જણાવ્યું કે, આયુર્વેદિક હોસ્પિટલ ચલાવતા એક મહિલા, કેનેડાથી અભ્યાસ કરીને પરત ફરેલો યુવાન અને હોશિયાર દીકરી સહિત એક જ પરિવારના ત્રણ સુશિક્ષિત સભ્યોની એકસાથે થયેલી વિદાય સમાજ માટે અત્યંત પીડાદાયક અને ગંભીર ચિંતાનો વિષય છે.
વધુમાં તેમણે ઉમેર્યું કે, આ પરિવારની સારી પ્રતિષ્ઠા હોવા છતાં આવી ઘટના કેમ બની તે અંગે સૌ કોઈ ચિંતામાં મુકાયા છે. તેઓ સમાજમાં ખૂબ જ સક્રિય તેમજ પ્રવૃત્તિમય જીવન જીવતા હતા, જેના કારણે સમગ્ર સમાજને આવા પ્રતિષ્ઠિત પરિવાર હોવા પર ગૌરવ અનુભવાતો હતો.સ્થાનિક રહેવાસી અને સંબંધી હિતેશ સોનીએ જણાવ્યું હતું કે, સાંજે સાડા પાંચથી પોણા છ વાગ્યાના અરસામાં તેમને આ આઘાતજનક સમાચાર મળ્યા હતા. આ દુર્ઘટનામાં એક જ પરિવારના સભ્યોએ પોતાના જીવ ગુમાવ્યા છે. આ પરિવાર ખૂબ જ સધ્ધર અને પ્રતિષ્ઠિત હતો, તેમજ તેમના સગા-સંબંધીઓ પણ હંમેશાં તેમની સાથે અને સહકારમાં ઊભા રહેતા હતા.
