ICC ODI વર્લ્ડ કપ 2027 માટે ક્રિકેટ જગતમાં અત્યારથી જ ચર્ચાઓ શરૂૂ થઈ ગઈ છે. ભારત, ઓસ્ટ્રેલિયા અને દક્ષિણ આફ્રિકા જેવી દિગ્ગજ ટીમો ખિતાબની મુખ્ય દાવેદાર માનવામાં આવે છે, પરંતુ આ દરમિયાન બાંગ્લાદેશ પણ ધીમે-ધીમે પોતાની મજબૂત દાવેદારી રજૂ કરી રહી છે. વર્ષો સુધી એવરેજ પ્રદર્શન અને ICC ટૂર્નામેન્ટોમાં નિરાશાજનક દેખાવ માટે ટીકાનો સામનો કરનારી આ ટીમ હવે સંપૂર્ણપણે બદલાયેલી નજરે પડી રહી છે.
તાજેતરમાં બાંગ્લાદેશે પાકિસ્તાન સામે તેની ધરતી પર વનડે શ્રેણી જીતી હતી. ત્યારબાદ ટીમે ઘરઆંગણે ન્યૂઝીલેન્ડ અને ઓસ્ટ્રેલિયાને પણ હરાવ્યા હતા. ભલે બંને ટીમો પોતાના કેટલાક સ્ટાર ખેલાડીઓ વિના રમતી હતી, પરંતુ બાંગ્લાદેશે જે રીતે મેચો પર પ્રભુત્વ જમાવ્યું તે ક્રિકેટ નિષ્ણાતોનું ધ્યાન ખેંચવા માટે પૂરતું હતું. આ જીતોએ સાબિત કર્યું છે કે ટીમ હવે માત્ર ઘરેલુ પરિસ્થિતિઓનો લાભ લઈને જ નહીં, પરંતુ પોતાની ક્ષમતાના આધારે પણ સફળતા મેળવી રહી છે.
અત્યાર સુધી બાંગ્લાદેશ પર સ્પિન-ફ્રેન્ડલી પિચો તૈયાર કરીને જીત મેળવવાના આરોપ લાગતા રહ્યા હતા. પરંતુ આ વખતે ચિત્ર સંપૂર્ણપણે અલગ રહ્યું છે. ટીમે પેસરોને અનુકૂળ પિચો પર વિરોધી ટીમોને હરાવી છે. ખાસ કરીને પાકિસ્તાન અને ઓસ્ટ્રેલિયા જેવી મજબૂત ઝડપી બોલિંગ ધરાવતી ટીમો સામે તેમની જીતે દર્શાવ્યું છે કે બાંગ્લાદેશ હવે નવી ઓળખ બનાવી રહ્યું છે. આ પરિવર્તન પાછળ ત્રણ ઝડપી બોલરોનું સૌથી મોટું યોગદાન છે.
તસ્કિન અહેમદ, મુસ્તફિઝુર રહેમાન અને નાહિદ રાણાની ત્રિપુટી હાલમાં બાંગ્લાદેશની સૌથી મોટી તાકાત બની ગઈ છે. 23 વર્ષીય નાહિદ રાણા પોતાની 150 કિલોમીટર પ્રતિ કલાકની ઝડપ અને વધારાના બાઉન્સથી બેટ્સમેનો માટે મોટો પડકાર બની રહ્યો છે. બીજી તરફ તસ્કિન નવા બોલ સાથે સ્વિંગ અને ઝડપનું ઘાતક કોમ્બિનેશન આપે છે, જ્યારે મુસ્તફિઝુર પોતાની કટર અને સ્લોઅર ડિલિવરીથી સતત વિકેટ મેળવવામાં સફળ રહ્યો છે.
