આંતરરાષ્ટ્રીય ક્રિકેટ પરિષદ (ICC)એ ચેતવણી અને અલ્ટીમેટમ આપ્યું હોવા છતાં બાંગ્લાદેશે ભારતમાં T20 વર્લ્ડ કપ રમવાનો ઇનકાર કરી દીધો છે. બાંગ્લાદેશે સ્પષ્ટ કર્યું છે કે જ્યાં સુધી મેચોનું સ્થળ ભારતથી શ્રીલંકામાં નહીં બદલાય ત્યાં સુધી ટીમ વર્લ્ડ કપમાં ભાગ લેશે નહીં.
ખેલાડીઓ સાથેની મહત્વપૂર્ણ બેઠક બાદ, બાંગ્લાદેશના રમત સલાહકાર આસિફ નઝરુલે ICC પર ગંભીર આરોપો લગાવ્યા. તેમણે કહ્યું કે ICC એ બાંગ્લાદેશ સાથે ન્યાય કર્યો નથી અને ખેલાડીઓની સલામતીની અવગણના કરવામાં આવી રહી છે. આસિફ નઝરુલે કહ્યું કે, સરકાર, ક્રિકેટ બોર્ડ અને ખેલાડીઓ એકમત છે કે કોઈપણ સંજોગોમાં સુરક્ષા સાથે સમાધાન કરવામાં આવશે નહીં.
આસિફ નઝરુલે સ્પષ્ટપણે કહ્યું, “અમે કોઈના દબાણ સામે ઝૂકીશું નહીં. જો બાંગ્લાદેશ વર્લ્ડ કપ નહીં રમે તો દુનિયાએ પણ તેના પરિણામો સમજવું જોઈએ. અમે અમારા ખેલાડીઓની સલામતી સાથે સમાધાન કરી શકીએ નહીં.”
બેઠક બાદ બાંગ્લાદેશ ક્રિકેટ બોર્ડે પોતાનો નિર્ણય પુનરાવર્તિત કર્યો. બોર્ડે જણાવ્યું હતું કે હાલના સંજોગોમાં ભારતમાં રમવું સલામત નથી, અને તેથી સ્થળ શ્રીલંકામાં બદલવું જોઈએ. જોકે, ICCએ પહેલાથી જ સ્પષ્ટ કરી દીધું છે કે ટુર્નામેન્ટની મેચો ભારતની બહાર ખસેડવામાં આવશે નહીં.
ICCની આ કડક ચેતવણી છતાં બાંગ્લાદેશે તેના નિર્ણયથી પાછળ હટવાનો ઇનકાર કર્યો છે. આ સમગ્ર વિવાદે T20 વર્લ્ડ કપ પર પડછાયો નાખ્યો છે. બધાની નજર હવે ICC ન આગામી પગલાં અને આ સંઘર્ષના ઉકેલ પર છે.
T20 વર્લ્ડ કપના સમયપત્રક મુજબ, બાંગ્લાદેશને શરૂઆતમાં ગ્રુપ C માં રાખવામાં આવ્યું હતું. તેની પ્રથમ ત્રણ મેચ કોલકાતામાં રમવાની હતી. ત્યારબાદ બાંગ્લાદેશ 17 ફેબ્રુઆરીએ મુંબઈમાં નેપાળ સામે તેની અંતિમ ગ્રુપ મેચ રમવાનું હતું.
તાજેતરમાં, બાંગ્લાદેશમાં લઘુમતી હિન્દુઓ પરના અત્યાચારોને પગલે ભારત અને બાંગ્લાદેશ વચ્ચેના સંબંધોમાં ખટાશ આવી છે. આ અસર ક્રિકેટમાં પણ જોવા મળી હતી. આ પછી, કોલકાતા નાઈટ રાઈડર્સ ફ્રેન્ચાઇઝ દ્વારા મુસ્તફિઝુર રહેમાનને બરતરફ કરવામાં આવ્યા હતા અને IPL 2026 માંથી બાકાત રાખવામાં આવ્યા હતા. બાંગ્લાદેશે ત્યારબાદ IPL પ્રસારણ પર પણ પ્રતિબંધ મૂક્યો હતો. બાદમાં, તેણે શ્રીલંકામાં તેની T20 વર્લ્ડ કપ મેચો યોજવાની માંગણીને વધુ તીવ્ર બનાવી, જે માંગ ICCએ સ્વીકારવાનો ઇનકાર કર્યો.
