રાજકોટ જિલ્લાના ત્રંબા ગામ નજીક એક અત્યંત ગંભીર અને હૃદયકંપાવનારો અકસ્માત સર્જાયો છે. પોતાની દુકાન ખોલવા ગયેલા આધેડ દુકાનદારને એક પૂરઝડપે આવતી કારે અડફેટે લેતા તેમનું કરુણ મોત નીપજ્યું છે. આ અકસ્માત એટલો ભયાનક હતો કે સમગ્ર ઘટના દુકાનના સીસીટીવી કેમેરામાં કેદ થઈ ગઈ છે.આ ઘટના 7 જૂનના રોજ બપોરે આશરે 1:30 વાગ્યે બની હતી. કારચાલક યુવક અચાનક સ્ટિયરિંગ પરનો કાબૂ ગુમાવી બેઠો હતો. કાબૂ ગુમાવતા જ કાર પૂરઝડપે સીધી દુકાનમાં ઘૂસી ગઈ હતી.
દુકાનદાર હજુ તો પોતાની દુકાન ખોલી જ રહ્યા હતા, ત્યાં જ આ અકસ્માત નડ્યો હતો. અકસ્માત એટલો ભયંકર હતો કે દુકાનદાર કાર અને દુકાનની દીવાલ વચ્ચે ખરાબ રીતે દબાઈ ગયા હતા. ઘટના બનતા જ આસપાસના લોકો તાત્કાલિક ઘટનાસ્થળે દોડી આવ્યા હતા. તેમણે ભારે જહેમત બાદ ઇજાગ્રસ્તને બહાર કાઢી સારવાર માટે હોસ્પિટલ ખસેડ્યા હતા, પરંતુ ગંભીર ઇજાઓને કારણે તેમનું મૃત્યુ થયું હતું.
અકસ્માતનો ભોગ બનેલા પૂજા એગ્રો દુકાનના માલિક 52 વર્ષીય કનૈયાલાલ દામજીભાઈ બારસિયા પોતાના ઘરના મુખ્ય આધારસ્તંભ હતા. તેમના અચાનક અવસાનથી પરિવાર પર આભ તૂટી પડ્યું છે. મૃતક કનૈયાલાલભાઈ પોતાના પરિવારમાં વૃદ્ધ માતા, પત્ની, એક દીકરી અને એક દીકરો મૂકી ગયા છે.
અકસ્માત સર્જાયા બાદ ઘટનાસ્થળે મોટી સંખ્યામાં લોકો એકઠા થઈ ગયા હતા. જોકે, આ ઘટનામાં કારચાલકે ભાગવાનો પ્રયત્ન કર્યો ન હતો. અકસ્માત બાદ કારચાલક યુવક ઘટનાસ્થળેથી ફરાર થયો ન હતો. તેણે પોતાની ભૂલ સ્વીકારી લીધી છે અને પોલીસ કાર્યવાહીમાં સંપૂર્ણ સહયોગ આપવાની ખાતરી આપી છે. હાલમાં મૃતકના મૃતદેહને પોસ્ટમોર્ટમ અર્થે રાજકોટ સિવિલ હોસ્પિટલ ખાતે ખસેડવામાં આવ્યો છે. પોલીસે અકસ્માત અંગે ગુનો નોંધીને કાયદેસરની આગળની તપાસ હાથ ધરી છે.
