ખંભાળિયા નજીકના દ્વારકામાં માર્ગ પર આજરોજ સવારે હિટ એન્ડ રનના બનેલા એક બનાવમાં પ્રાંતીય શ્રમિક પરિવારના 10 વર્ષના બાળકને અડફેટે લઈ અને હેરીયર મોટરકારનો ચાલક નાસી છૂટ્યો હોવાનું ખુલવા પામ્યું છે.

   આ સમગ્ર બનાવની વિગત એવી છે કે દાહોદ જિલ્લાના દેવગઢ બારીયા તાલુકાના સાગટાળા ગામના મૂળ રહીશ અને હાલ ખંભાળિયા તાલુકાના ધંધુસર ગામે એક આસામીની વાડીમાં રહી અને મજૂરી કામ કરતા કલસિંહ માનાભાઈ નાયક (ઉ.વ. 48) ના સાત સંતાનો પૈકીનો સૌથી નાનો પુત્ર અલ્પેશ (ઉ.વ. 10) આજરોજ સવારે આશરે 9:30 વાગ્યાના સમયે ખંભાળિયા - દ્વારકા હાઈ-વે પર અત્રેથી આશરે 21 કિલોમીટર દૂર સોનારડી ગામના પાટીયા પાસેથી રોડ ક્રોસ કરી અને શિવ શક્તિ હોટલમાં જતો હતો. તે દરમિયાન આ માર્ગ પર પુરઝડપે અને બેફીકરાઈપૂર્વક આવી રહેલી જી.જે. 03 એન.બી. 4448 નંબરની કાળા કલરની ટાટા હેરિયર મોટરકારના ચાલકે અલ્પેશને અડફટે લીધો હતો. જેથી તેને લોહી લુહાણ હાલતમાં ઈમરજન્સી 108 એમ્બ્યુલન્સ મારફતે વધુ સારવાર અર્થે અહીંની સરકારી હોસ્પિટલમાં લાવવામાં આવ્યો હતો. જ્યાં ફરજ પરના તબીબોએ તેને મૃત્યુ પામેલો જાહેર કર્યો હતો.

   અકસ્માત સર્જીને આરોપી કાર ચાલક પોતાનું વાહન લઈને નાસી છૂટ્યો હતો. અહીંની સિવિલ હોસ્પિટલમાં અલ્પેશના મૃતદેહનું પોસ્ટમોર્ટમ કરવામાં આવ્યું હતું. આ સમગ્ર બનાવ અંગે ખંભાળિયા પોલીસે મૃતકના પિતા કલસિંહ નાયકની ફરિયાદ પરથી ટાટા હેરીયર કારના ચાલક સામે જુદી જુદી કલમ હેઠળ ગુનો નોંધી, આગળની તપાસ હાથ ધરી છે. આ બનાવે મૃતક બાળકના પરિવારજનોમાં આક્રંદની લાગણી પ્રસરાવી હતી.

સાંસદે રજૂ કરેલું અનાજ કયાંથી આવ્યું?, રેશનિંગના વેપારીઓને ત્યાં ચેકિંગ, નમૂના લેવાનું શરૂ

રાજકોટ કલેકટર કચેરીમાં ગત શનિવારે રાજયસભાના સાંસદ રામભાઇ મોકરીયાએ સડેલા અનાજના નમુના રજુ કરતા જ પૂરવઠાતંત્ર ઉંઘમાંથી સફાળુ જાગ્યુ છે અને આજે ગાંધીનગરથી પૂરવઠા ખાતાની ટીમ રાજકોટ દોડી આવી છે અને સડેલુ અનાજ કયાંથી આવ્યુ તેની તપાસ આદરી છે. ગાંધીનગરથી દોડી આવેલ પૂરવઠા વિભાગની ટીમે જિલ્લા પૂરવઠા અધિકારી સાથે બેઠક યોજી હતી અને ત્યારબાદ શહેરની સસ્તા અનાજની દૂકાનોમાં ચેકિંગ શરૂ કર્યુ છે. જો કે, આ સડેલુ અનાજ ગોડાઉનમાંથી જ આવ્યુ હોવાનું માનવામાં આવે છે.

મળતી વિગતો અનુસાર આજે સવારે ગાંધીનગરથી પુરવઠા વિભાગના આસિસ્ટન્ટ ડાયરેક્ટર નિર્મલ પટેલ સહીતની અધિકારીની ટીમો રાજકોટમાં ધામા નાખ્યા હતા. રાજકોટ પુરવઠા અધિકારી સાથે બેઠક કર્યા બાદ રાજકોટ શહેરની 185 જેટલી દુકાનોની લિસ્ટ લઇ સ્થાનિક અધિકારીઓને સાથે રાખી શહેરની અલગ-અલગ સસ્તા અનાજની દુકાનોમાં દરોડાની કામગીરી હાથ ધરવામાં આવી હતી. શંકાસ્પદ દુકાનોમાંથી અનાજના નમુના પણ લેવામાં આવ્યા હતા.

રાજકોટ પુરવઠા અધિકારી રાજેશ્રી વાગવાણીએ જણાવ્યું હતું કે રાજ્ય સરકાર જથ્થો આવ્યા બાદ બાદ પહેલા ગાંધીનગર ખાતે લેબોટરીમાં ટેસ્ટ કરવામાં આવે છે. અને ત્યારબાદ જ ગોડાઉનમાં જથ્થો સ્ટોર કરવામાં આવે છે. ગોડાઉનમાં આવ્યા બાદ પણ સ્થાનિક તંત્ર દ્વારા જથ્થાની તપાસ હાથ ધરવામાં આવે છે. અને ત્યારબાદ જ દુકાનદારોને જથ્થાનું વિતરણ કરવામાં આવે છે. જથ્થો શંકાસ્પદ દેખાય તો ગાંધીનગરથી રિજકેટ કરવામાં આવે છે. પરંતુ નબળી ગુણવત્તાનો જથ્થો ક્યાંથી આવ્યો છે? તે તપાસમાં વિષય છે. અમારી ટીમ પણ તપાસ કરી રહી છે. આજે ગાંધીનગરથી ટીમ પણ આવી છે તે પણ અલગ અલગ દુકાનોની તપાસ કરશો અને નમૂના લેશે. સ્થાનિક અધિકારીઓનો રિપોર્ટ આવ્યા બાદ કલેક્ટરને સોંપવામાં આવશે.

રાજકોટ પુરવઠા વિભાગ દ્વારા છેલ્લા એક મહિનામાં દુકાનદારોની મનમાની, રેશનકાર્ડ ધારકોની ફરિયાદો, નબળી ગુણવત્તાનો અનાજ સહિતની ફરિયાદોને ધ્યાનમાં લઇ રાજકોટ શહેર અને જિલ્લા ના 40થી વધુ દુકાનદારોને નોટિસ પણ આપવામાં આવી છે. અને તેઓને બોલાવવામાં પણ આવ્યા છે. પુરવઠા વિભાગ દ્વારા સતત દુકાનોની તપાસો પણ હાથ ધરવામાં આવતી હોય છે.

સાંસદે રજૂ કરેલી દાળમાં કાળું?
તો બીજી બાજુ રાજ્યસભાના સાંસદ રામ મોકારિયા દ્વારા જે તુવેર દાળ આપવામાં આવી છે. તે દાળ તેલ વગરની દાળ હોવાનું સામે આવ્યું છે. પુરવઠા વિભાગ દ્વારા છેલ્લા કેટલાય સમયથી રાશનકાર્ડ ધારકોને તેલવાળી તુવેર દાળ આપવામાં આવે છે. ત્યારે તે પણ તપાસ વિષય બન્યો છે કે તેલ વગરની દાળ ક્યાંથી આવી છે અને કોણે આપી છે તે પણ એક તપાસનો વિષય બન્યો છે.

સીએનજી આધારિત ભઠ્ઠીના કામમાં કાચું કપાયું, સ્ટીલના બદલે લોખંડની પેટી બનાવી હોવાનો તજજ્ઞોનો અભિપ્રાય

દોઢ કલાકમાં અગ્નિદાહની વિધિ સંપન્ન થાય તેના બદલે સાત કલાકના સમય મુજબનું ઈન્ફાસ્ટ્રક્ચર ધાબડી દેવાયું

મહાનગરપાલિકાના અનુભવી અને બુદ્ધીશાળી અધિકારીઓ અન્ય શહેરોમાં ચાલતા પ્રોજેક્ટો જોઈને અથવા મનપાને નુક્શાની ઓછી થતી હોય તેવા પ્રોજેક્ટો વગર વિચારીએ તૈયાર કરી કામ શરૂ કરાવી દેતા હોય છે. જેના લીધે લોકોને મુસ્કેલીઓનો સામનો કરવો પડતો હોય છે. એવું હાલમાં ચાલતા ત્રણ સ્મશાનની ભઠ્ઠીના કામમાં બનવા પામ્યું છે.

સીએનજી આધારિત અગ્નિદાહ માટેની ભઠ્ઠી તૈયાર કરવાનું કામ ત્રણ સ્મશાન ખાતે ચાલી રહ્યું છે. પરંતુ આ ભઠ્ઠીમાં એક અગ્નિદાનમાં સાત કલાકનો સમય લાગતો હોય મોટી સમસ્યા ઉભી થયાની જાણ થતાં સ્ટેન્ડીંગ ચેરમેન જયમીનભાઈ ઠાકરે હાલ ત્રણેય સ્મશાનોનું ભઠ્ઠીનું કામ બંધ કરાવી પેમેન્ટ અટકાવી એજન્સીઓને આજે કોર્પોરેશન ખાતે બોલાવવામાં આવ્યા છે અને નિયમ મુજબ દોઢકલાકમાં અગ્નિદાહ ક્રિયા સંપન્ન થઈ જાય તે મુજબની ભઠ્ઠી બનાવવાની સૂચના અપાશે તેમ સ્ટેન્ડીંગ ચેરમેને જણાવ્યું હતું.

સ્ટેન્ડીંગ ચેરમેન જયમીનભાઈ ઠાકરે જણાવેલ કે, હાલ મોટા મૌવા, રામનાથપરા અને કોઠારિયા ખાતેના ત્રણ સ્મશાનોમાં સીએનજી આધારિત ભઠ્ઠીઓનું કામ ચાલુ કરવામાં આવ્યું છે.

સરકાર દ્વારા સીએનજી ગેસ ફ્રીમાં આપવામાં આવશે. જેના લીધે અગ્નિદાન સમયે થતી વિજળીની ખપતમાં ભારેબચત આથી શહેરના તમામ સ્મશાનો સીએનજી આધારિત કરવાનો નિર્ણય લઈ પ્રથમ ત્રણ સ્મશાનોની ભઠ્ઠી માટે બે એજન્સીને કામ સોંપવામાં આવ્યું છે. હાલ મોટામૌવા સ્મશાન ખાતે ભઠ્ઠીનું કામ પૂર્ણતાના આરે છે. પરંતુ તજજ્ઞોના જણાવ્યા મુજબ લોખંડના સ્ટ્રક્ચરની બનાવેલ આ ભઠ્ઠીમાં એક અગ્નિદાન માટે સાત કલાક જેટલો ભારે સમય લાગશે જેના લીધે લોકોને વધુ મુશ્કેલીનો સામનો કરવો પડશે. નિયમ મુજબ એક અગ્નિદાનમાં દોઢથી બે કલાકનો સમય લાગતો હોય છે.

જેની સામે ચારગણો સમય લાગવાનું કારણ શું જેની તપાસ કરતા માલુમ પડેલ કે, એજન્સી દ્વારા સુચવવામાં આવેલ લોખંડનું બોક્સ તેમજ લોખંડના ખાટલાને સીએનજી આધારીત ગરમ થતાં જ દોઢથી બે કલાકનો સમય લાગી રહ્યો છે. જેના લીધે અગ્નિદાનનો સમય સાત કલાક થઈ જાય છે. જેની સામે સ્ટીલનું ઈન્ફાસ્ટ્રક્ચર તૈયાર કરવામાં આવે તો રાબેતા મુજબ દોઢથી બે કલાકમાં અગ્નિદાનની ક્રિયા પૂર્ણ થઈ જાય તેમ છે. આથી સ્ટેન્ડીંગ ચેરમેન જયમીનભાઈ ઠાકરે બન્ને એજન્સીઓને આજે કોર્પોરેશન ખાતે બોલાવેલ છે.

સ્ટેન્ડીંગ ચેરમેને વધુમાં જણાવેલ કે, હાલમાં ફીટ થઈ રહેલ લોખંડના ઈન્ફાસ્ટ્રક્ચરના સ્થાને સ્ટીલનું ઈન્ફાસ્ટ્રકચર કરવામાં આવે તો એજન્સીને સસ્તામાં પરવડે તેમ છે. તેના માટે વધારાનો કોઈ ખર્ચ કરવો પડે તેમ નથી. આથી બન્ને એજન્સીઓને સમજાવીને હવે ત્રણેય સ્મશાન ખાતે લોખંડના બદલે સ્ટીલનું ઈન્ફાસ્ટ્રક્ચર તૈયાર કરવાની સૂચના આપવામાં આવશે. આ સીએનજી આધારીત સ્મશાનના ભઠ્ઠીના કામ માટે ટેન્ડર મંજુર કરવામાં આવેલ જેમાં અધિકારીઓના બિન અનુભવના કારણે કાચુ કપાયાની ચર્ચા પણ જાગેલ છતાં સ્ટેન્ડીંગ ચેરમેન દ્વારા આજે લોકોના હિત માટે એજન્સીઓનું કામ અટકાવી તેમજ તેમના બીલ અટકાવી નવેસરથી કામ કરવાનો નિર્ણય લીધો છે.

દેખાદેખીમાં વગર અનુભવે કરોડોનું આંધણ
મહાનગરપાલિકાના અધિકારીઓ અન્ય શહેરો તેમજ વિદેશોમાં જઈને નવી નવી ટેક્નિકો શીખી આવે છે. જેની અમલવારી રાજકોટના પ્રોજેક્ટમાં કરવામાં આવી રહી છે. અમુક પ્રોજેક્ટમાં પ્રજા અને તંત્રને ફાયદો થાય છે પરંતુ બિન અનુભવના કારણે અમુક પ્રોજેક્ટોનું બાળમરણ પણ થઈ રહ્યુ ંછે. આ પ્રકારના અનેક પ્રોજેક્ટો કે જે અન્ય જગ્યાએથી જોઈને તૈયાર કરવામાં આવ્યા હોય તેનું કામ તે વિષયના તજજ્ઞો અને કોન્ટ્રાક્ટરોને આપવામાં ન આવતા લોકોના કરોડો રૂપિયાનું આંધણ પણ ભવિષ્યમાં થયું છે. તેવી ચર્ચા આજના સ્મશાનના કામ ઉપરથી લોકોમાં ચર્ચાઈ રહી છે.