અમેરિકાએ ધ રેઝિસ્ટન્સ ફ્રન્ટ (TRF)ને વિદેશી આતંકવાદી સંગઠન જાહેર કર્યું છે. અમેરિકાના વિદેશ મંત્રી માર્કો રુબિયોએ આ માહિતી આપી હતી. TRFએ આ વર્ષે 22 એપ્રિલે પહલગામની બૈસરન ખીણમાં થયેલા આતંકવાદી હુમલાની જવાબદારી લીધી હતી, જેમાં પાકિસ્તાન સમર્થિત આતંકવાદીઓ દ્વારા 26 પ્રવાસીઓની ગોળી મારીને હત્યા કરવામાં આવી હતી. યુએસ સેક્રેટરી ઓફ સ્ટેટ માર્કો રુબિયોએ આતંકવાદી જૂથને લશ્કર-એ-તૈયબાનો મોરચો ગણાવ્યો,જેનું મુખ્ય મથક પાકિસ્તાનમાં સ્થિત યુએન દ્વારા નિયુક્ત આતંકવાદી જૂથ છે.
એક નિવેદનમાં રુબિયોએ જણાવ્યું હતું કે TRFને આતંકવાદી સંગઠન તરીકે નિયુક્ત કરવું એ ટ્રમ્પ વહીવટીતંત્રની આપણા રાષ્ટ્રીય સુરક્ષા હિતોનું રક્ષણ કરવા, આતંકવાદ સામે લડવા અને પહેલગામ હુમલા માટે ન્યાય મેળવવાની પ્રતિબદ્ધતાને પ્રતિબિંબિત કરે છે.
વિદેશ મંત્રી એસ. જયશંકરે આ અંગે પ્રતિક્રિયા આપી છે. તેમણે અમેરિકાનો આભાર વ્યક્ત કર્યો છે અને કહ્યું છે કે આ નિર્ણયથી સાબિત થયું છે કે ભારત અને અમેરિકા આતંકવાદ સામે એક સાથે ઉભા છે. જયશંકરે શુક્રવારે X પર એક પોસ્ટ શેર કરીને યુએસ સેક્રેટરી ઓફ સ્ટેટ માર્કો રુબિયોની પણ પ્રશંસા કરી હતી.
એસ. જયશંકરે X પોસ્ટમાં લખ્યું છે કે, “ભારત અને અમેરિકા આતંકવાદ સામે એક સાથે ઉભા છે તેની મજબૂત પુષ્ટિ થઈ છે. માર્કો રુબિયો અને અમેરિકાનો આભાર, જેમણે લશ્કર-એ-તૈયબા (LeT)ના પ્રતિનિધિ સંગઠન TRFને વિદેશી આતંકવાદી સંગઠન (FTO) અને ખાસ નિયુક્ત વૈશ્વિક આતંકવાદી (SDGT) જાહેર કર્યું. તેણે 22 એપ્રિલના રોજ પહેલગામ હુમલાની જવાબદારી લીધી. “TRF એ ઘણી આતંકવાદી ઘટનાઓને અંજામ આપ્યો છે.
TRFએ પાકિસ્તાનથી કાર્યરત આતંકવાદી સંગઠન લશ્કર-એ-તૈયબાનો મોરચો છે, જેણે અત્યાર સુધીમાં ઘણી આતંકવાદી ઘટનાઓને અંજામ આપ્યો છે. TRFએ પહેલગામમાં થયેલા હુમલાની જવાબદારી પણ લીધી હતી. આમાં 26 પ્રવાસીઓએ જીવ ગુમાવ્યા હતા. અમેરિકાનો આ મોટો નિર્ણય પાકિસ્તાન માટે મોટો ફટકો હશે. પાકિસ્તાન દરરોજ ભારત વિરુદ્ધ કાવતરું ઘડતું રહે છે. TRFને આતંકવાદી સંગઠન જાહેર કર્યા પછી, તેની મુશ્કેલીઓ વધશે.
