મોરબી પંથકમાં કાયદો અને વ્યવસ્થા સામે સવાલો ઊભા કરતી એક મોટી ઘટના સામે આવી છે. મોરબી જિલ્લાના હજનાળી ગામમાં આવેલા પ્રખ્યાત શક્તિ માતાજીના મંદિરમાં અજાણ્યા તસ્કરોએ ત્રાટકીને લાખો રૂૂપિયાની કિંમતના સોના-ચાંદીના આભૂષણોની ચોરી કરી લીધી છે. પવિત્ર ધાર્મિક સ્થળ પર થયેલી આ તસ્કરીથી સમગ્ર ગ્રામજનો અને આસપાસના વિસ્તારમાં ભારે ચકચાર તેમજ રોષની લાગણી ફેલાઈ ગઈ છે.
પ્રાપ્ત વિગતો અનુસાર, તસ્કરોએ રાત્રિના સમયે મંદિરને નિશાન બનાવીને ગર્ભગૃહ અને દાનપેટી કે અન્ય સ્થળોએ રહેલા કિંમતી સામાનને લૂંટ્યો હતો.
પ્રાથમિક અંદાજ મુજબ આ ચોરીમાં અંદાજે રૂૂપિયા 25 લાખ કે તેથી વધુ કિંમતના સોના અને ચાંદીના કિંમતી આભૂષણો ચોરાયા હોવાનું સામે આવ્યું છે. આ બનાવ અંગે મંદિરના ટ્રસ્ટીઓ અને ગ્રામજનો દ્વારા તપાસ કરતા મંદિર પરિસરમાં કે આસપાસના વિસ્તારમાં લગાવેલા સીસીટીવી ફૂટેજ હાથ લાગ્યા છે, જેમાં શંકાસ્પદ ઇસમોની હિલચાલ સ્પષ્ટપણે નજરે પડી રહી છે.
આ ગંભીર ઘટનાની જાણ થતાં જ મોરબી પોલીસનો કાફલો તાત્કાલિક ઘટનાસ્થળે દોડી આવ્યો હતો. પોલીસે સીસીટીવી ફૂટેજના આધારે તસ્કરોની ઓળખ મેળવવાના પ્રયાસો હાથ ધર્યા છે અને ડોગ સ્ક્વોડ તેમજ ફોરેન્સિક ટીમની મદદ લેવાની તજવીજ શરૂૂ કરી છે. પોલીસ દ્વારા ભોગ બનનારાઓની ફરિયાદ નોંધીને આ આખી ચોરીના રેકેટનો પર્દાફાશ કરવા અને ફરાર આરોપીઓને ઝડપી પાડવા માટે ચક્રો ગતિમાન કરવામાં આવ્યા છે.
