મુંબઈમાં બોલિવૂડ અભિનેતા ટાઈગર શ્રોફને નિશાન બનાવીને કરવામાં આવેલા ફાયરીંગના કેસમાં એક મોટો ખુલાસો થયો છે. તપાસમાં જાણવા મળ્યું છે કે ફાયરીંગ કરનારાઓનું અસલી નિશાન ટાઈગર શ્રોફ નહીં, પરંતુ અન્ય ચાર જાણીતા બોલિવૂડ સ્ટાર્સ હતા. આરોપીઓએ અમિતાભ બચ્ચન, સલમાન ખાન, આમિર ખાન અને અક્ષય કુમારની રેકી કરી હતી. પરંતુ સુરક્ષા વધુ હોવાને કારણે યોજના બદલી દીધી હતી.
ત્યારબાદ, તેમણે ટાઈગર શ્રોફને નિશાન બનાવ્યા—જેના માટે છેલ્લા બે મહિનાથી તૈયારીઓ ચાલી રહી હતી.
તપાસમાં બહાર આવ્યું છે કે લોરેન્સ બિશ્નોઈ ગેંગ સાથે સંકળાયેલા ગેંગસ્ટર અનિલ પંડિતે આ બોલિવૂડ સ્ટાર્સને નિશાન બનાવવાનો આદેશ આપ્યો હતો. હુમલાખોરોએ ચારેય અભિનેતાઓના ઘરો પર નજર રાખી હતી અને તેના વીડિયો અનિલ પંડિતને મોકલ્યા હતા. સુરક્ષા વ્યવસ્થા ખૂબ જ કડક હોવાથી આરોપીઓએ પોતાની રણનીતિ બદલવી પડી હતી. ગોળીબારની ઘટનાને અંજામ આપતા પહેલા તેમણે લગભગ સાત દિવસ સુધી રેકી કરી હતી.
દરમિયાન, દિલ્હી પોલીસના સ્પેશિયલ સેલ અને મુંબઈ ક્રાઈમ બ્રાન્ચે આ કેસ સાથે જોડાયેલા હથિયારોના સપ્લાય નેટવર્કનો પર્દાફાશ કર્યો છે. આ મામલે વધુ ચાર શંકાસ્પદ વ્યક્તિઓની ધરપકડ કરવામાં આવી છે: હરિયાણાના સોનીપતથી કુણાલ (૨૧) અને સુમિત (૧૯), તેમજ ઉત્તર પ્રદેશના સીતાપુરથી રાધા અને આઝમગઢથી બબીતાની ધરપકડ કરવામાં આવી છે.
તપાસ મુજબ, કુણાલે અમૃતસરથી એક પિસ્તોલ અને ૨૦ કારતૂસ મેળવ્યા હતા. ત્યારબાદ આ હથિયારો રાધા અને બબીતા મારફતે મુંબઈમાં રહેલા હુમલાખોરો સુધી પહોંચાડવામાં આવ્યા હતા. આ બંને મહિલાઓ ૧૭ ઓક્ટોબરે દિલ્હીથી મુંબઈ આવી હતી અને હુમલાખોરોને હથિયાર સોંપ્યા હતાં. આ ચારેય વ્યક્તિઓને કોર્ટમાં રજૂ કરવામાં આવ્યા હતા અને ત્યારબાદ ટ્રાન્ઝિટ રિમાન્ડ પર મુંબઈ પોલીસને સોંપવામાં આવ્યા હતા.
આ પહેલાં ઘટનાના ૧૫ કલાકની અંદર જ, સોમવારે કોટા રેલવે સ્ટેશન પરથી પોલીસે ત્રણ મુખ્ય શંકાસ્પદ વ્યક્તિઓની ધરપકડ કરી હતી. આ લોકોમાં બિહારના બેગુસરાયનો હૃતિક અને હરિયાણાના સોનીપતનો રેહાન તથા ફૂલ સિંહનો સમાવેશ થાય છે. હુમલા બાદ આ ત્રણેય નેપાળ ભાગી જવાની ફિરાકમાં હતા. તેમને કોટાથી મુંબઈ લાવવામાં આવ્યા છે અને જીટી હોસ્પિટલમાં તેમનું તબીબી પરીક્ષણ કરવામાં આવ્યું છે.
મુંબઈ પોલીસ આજે અભિનેતા ટાઈગર શ્રોફના નિવાસસ્થાને થયેલા ગોળીબારના કેસમાં ધરપકડ કરાયેલા આ ત્રણ વ્યક્તિઓને કોર્ટમાં રજૂ કરશે. ત્રણ આરોપીઓને મુંબઈની કિલ્લા કોર્ટમાં રજૂ કરવામાં આવનાર છે. હાલમાં તેઓ મુંબઈ પોલીસના ‘એન્ટી-એક્સ્ટોર્શન સેલ’ (વસૂલાત વિરોધી શાખા)ની કસ્ટડીમાં છે, જ્યાં તેમની આ કેસના સંદર્ભમાં પૂછપરછ કરવામાં આવી રહી છે. કોર્ટમાં રજૂ કરતી વખતે, પોલીસ તેમની કસ્ટડી લંબાવવાની માંગ કરી શકે છે.
