નાઇજીરિયામાં મોટી હોનારત સર્જાઈ હતી. દેશની વાયુસેનાએ આતંકીઓને નિશાન બનાવવા માટે એક હવાઈ હુમલો કર્યો હતો, પરંતુ બોમ્બ એક બજાર પર પડ્યો હતો, જ્યાં સામાન્ય લોકો ખરીદી કરી રહ્યા હતા. આ હુમલામાં આશરે 200 લોકોના મોતની આશંકા છે. જાણવા મળી રહ્યું છે કે, નાઇજીરિયાની વાયુસેના બોકો હરામના આતંકીઓનો પીછો કરી રહી હતી. ઉત્તર-પૂર્વના જિલ્લી વિસ્તારમાં તેમને આતંકીઓ દેખાયા અને તેમણે હવાઈ હુમલો કર્યો હતો, પરંતુ આ હુમલો એ સમયે અને એ જગ્યાએ થયો જ્યાં સેંકડો સામાન્ય લોકો બજારમાં હાજર હતા.
જિલ્લી માર્કેટ નાઇજીરિયાના યોબે રાજ્યમાં છે. આ જગ્યા બોર્નો રાજ્યની સરહદ પાસે છે. આ એ જ વિસ્તાર છે જ્યાં બોકો હરામની સૌથી વધુ અસર છે. લોકો ત્યાં પોતાની રોજિંદી વસ્તુઓ ખરીદવા-વેચવા આવ્યા હતા. યોબેના ગેઇદામ જિલ્લાના ફુચિમેરામ વોર્ડના કાઉન્સિલર લાવાન જાના નૂર ગેઇદામ દ્વારા સમાચાર એજન્સી રોઇટર્સ સાથે વાત કરતા જણાવ્યું કે, આ હુમલામાં 200થી વધુ લોકો માર્યા ગયા છે. તેમણે આ ઘટનાને અત્યંત દર્દનાક ગણાવી હતી. ત્રણ અન્ય સ્થાનિક લોકો અને એક આંતરરાષ્ટ્રીય રાહત સંસ્થાના અધિકારીએ પણ આ હુમલા અને મોતના આંકડાની પુષ્ટિ કરી છે.
નાઇજીરિયાના ઉત્તર-પૂર્વમાં બોકો હરામ નામનું એક ખતરનાક આતંકી સંગઠન લાંબા સમયથી સક્રિય છે. આ સંગઠને છેલ્લા કેટલાક વર્ષોમાં હજારો લોકોને માર્યા છે અને લાખો લોકોને તેમના ઘર છોડવા માટે મજબૂર કર્યા છે. નાઇજીરિયાની સેના આ આતંકીઓ સામે સતત અભિયાન ચલાવી રહી છે. હુમલામાં જે લોકો ઘાયલ થયા છે તેમને યોબે અને બોર્નો રાજ્યની હોસ્પિટલોમાં ખસેડવામાં આવી રહ્યા છે. યોબે રાજ્યની આપત્તિ વ્યવસ્થાપન એજન્સી જઊખઅ એ જણાવ્યું કે, તેમને આ ઘટનાના પ્રારંભિક અહેવાલો મળ્યા છે અને રાહત કામગીરી શરૂૂ કરી દેવામાં આવી છે.
