રાજકોટ જિલ્લાના મુખ્ય ઔદ્યોગિક હબ ગણાતા મેટોડા જીઆઈડીસી સ્થિત સુપ્રસિદ્ધ ’જ્યોતિ સીએનસી’ (ઉુંજ્ઞશિં ઈગઈ) કંપનીના પરિસરમાં સવારના સમયે અચાનક આગ લાગવાની ગંભીર ઘટના સામે આવી છે. કારખાનાના પરિસરમાંથી અચાનક જ કાળા ધુમાડાના વિશાળ ગોટેગોટા નીકળવાના શરૂૂ થતાં ફેક્ટરીમાં કામ કરી રહેલા કર્મચારીઓ તેમજ આસપાસના અન્ય ઔદ્યોગિક એકમોના લોકોમાં ભારે નાસભાગ અને અફરાતફરીનો માહોલ સર્જાયો હતો. આ ઘટનાને પગલે સમગ્ર મેટોડા ઔદ્યોગિક વિસ્તારમાં ઘડીભર માટે ચિંતા અને ભયનો વ્યાપ ફેલાઈ ગયો હતો.
આગની આ ઘટના કંપનીના અત્યંત મહત્વપૂર્ણ એવા મુખ્ય એસેમ્બલિંગ યુનિટમાં આકાર પામી હતી. બનાવ અંગેની તાત્કાલિક જાણ કરવામાં આવતાં જ ફાયર બ્રિગેડનો કાફલો ઘટનાસ્થળે દોડી આવ્યો હતો. ફાયર ફાઈટરો દ્વારા પરિસ્થિતિની ગંભીરતા સમજીને સતત પાણીનો મારો ચલાવવામાં આવ્યો હતો અને કલાકોની ભારે જહમત બાદ આખરે આગ પર સંપૂર્ણપણે કાબૂ મેળવી લેવામાં સફળતા મળી હતી. સમયસર હાથ ધરાયેલી આ કામગીરીને કારણે આગ ફેક્ટરીના અન્ય વિભાગો સુધી પ્રસરી શકી ન હતી, જેના પરિણામે એક બહુ મોટી દુર્ઘટના ટળી ગઈ હતી.
આગ લાગવાના મૂળ અને ચોક્કસ કારણો અંગે હજુ સુધી કોઈ સત્તાવાર સ્પષ્ટતા થઈ નથી, પરંતુ પ્રાથમિક તપાસ અને આશંકા મુજબ શોર્ટ સર્કિટના કારણે આ ઘટના ઘટી હોવાનું માનવામાં આવી રહ્યું છે. હાલના તબક્કે કંપની પ્રશાસન અને સત્તાવાળાઓ દ્વારા ઘટનાસ્થળે થયેલા નુકસાન અંગેનું આકલન અને સર્વે કરવાની કામગીરી હાથ ધરવામાં આવી છે, જે પૂર્ણ થયા બાદ જ થયેલી આર્થિક નુકસાનીનો સ્પષ્ટ આંકડો સામે આવશે. સદનસીબે, સમયસરના બચાવ કાર્યોને કારણે આ સમગ્ર બનાવમાં કોઈ જાનહાનિ થઈ નથી, જેથી સ્થાનિક તંત્ર અને ફેક્ટરી સંચાલકોએ રાહતનો શ્વાસ લીધો છે.
