દિલ્હીના પ્રશાંત વિહાર વિસ્તારમાં વિસ્ફોટ થયો છે. સ્થાનિક લોકોએ વિસ્ફોટનો અવાજ સાંભળ્યો હતો. જેની માહિતી પોલીસને આપવામાં આવી હતી. ફાયર બ્રિગેડ અને પોલીસની ટીમ ઘટના સ્થળે પહોંચી હતી. નેશનલ ઈન્વેસ્ટિગેશન એજન્સી (NIA) ઘટનાસ્થળે પહોંચી ગઈ છે. વિસ્ફોટ કયા કારણોસર થયો તેની માહિતી મેળવવામાં આવી રહી છે. બ્લાસ્ટમાં ઓટો ડ્રાઈવરને ઈજા થઈ છે. વિસ્ફોટ થતાં જ વિસ્તારમાં સફેદ ધુમાડાના વાદળો જોવા મળ્યા હતા. દિલ્હી ફાયર સર્વિસના જણાવ્યા અનુસાર, તેમને આજે સવારે 11:58 વાગ્યે વિસ્ફોટની માહિતી મળી હતી. ફાયર એન્જિનને ઘટનાસ્થળે મોકલવામાં આવ્યા છે. આ પહેલા 20 ઓક્ટોબરે પણ પ્રશાંત વિહાર વિસ્તારમાં બ્લાસ્ટ થયો હતો.
પ્રાપ્ત માહિતી અનુસાર, પ્રશાંત વિહાર વિસ્તારમાં સ્થિત બંસી સ્વીટ્સની સામે એક શેરી વિક્રેતા પાસે પાર્ક કરેલા સ્કૂટરમાં વિસ્ફોટ થયો હતો. સ્થળ પરથી સફેદ પાવડર જેવી વસ્તુ મળી આવી હતી. પોલીસ ટીમ ઘટનાસ્થળે હાજર છે. આ વિસ્ફોટ કયા કારણોસર થયો તેની તપાસ કરવામાં આવી રહી છે. 20 ઓક્ટોબરે પણ રોહિણી વિસ્તારમાં પ્રશાંત વિહાર સ્થિત CRPF સ્કૂલ પાસે વિસ્ફોટ થયો હતો. વિસ્ફોટથી શાળાની દિવાલ, નજીકની દુકાનો અને એક કારને નુકસાન થયું હતું.
ઘટનાની માહિતી મળતા જ દિલ્હી પોલીસ ઘટનાસ્થળે પહોંચી ગઈ હતી. ક્રાઈમ બ્રાન્ચની ટીમ પણ તપાસમાં લાગેલી છે. પોલીસે વિસ્તારને સીલ કરી દીધો છે. બ્લાસ્ટને કારણે કેટલાક વાહનોના કાચ તૂટી ગયા હતા. ઘાયલ ઓટો ડ્રાઈવરને હોસ્પિટલમાં દાખલ કરવામાં આવ્યો છે. પોલીસ ઘટનાસ્થળેથી પુરાવા એકત્ર કરી રહી છે. પોલીસે લોકોને શાંતિ જાળવવા અને અફવાઓ ન ફેલાવવાની અપીલ કરી છે. રોડ પરથી મળેલા સફેદ પાવડરની તપાસ માટે ફોરેન્સિક ટીમને સ્થળ પર બોલાવવામાં આવી છે.
