અમેરિકા-ઈરાન વચ્ચે વધેલી તંગદિલી અને ટ્રમ્પના આક્રમક વલણની અસર ભારતીય બજાર પર જોવા મળી છે. આજે ભારતીય શેરબજાર ખુલતાની સાથે જ ધરાશાયી થયું હતું, જેમાં સેન્સેક્સ 700 પોઈન્ટથી વધુ અને નિફ્ટી 250 પોઈન્ટથી વધુ ગાબડા સાથે રેડ ઝોનમાં બતાવી રહ્યા હતા.બંને દેશો વચ્ચે રાતોરાત થયેલા હુમલાઓએ વૈશ્વિક આર્થિક બજારોને હચમચાવી નાખ્યા છે.
ડોનાલ્ડ ટ્રમ્પના નેતૃત્વમાં યુએસ વહીવટીતંત્રે પુષ્ટિ આપી કે તેણે રાતોરાત ઈરાનમાં લશ્કરી લક્ષ્યો પર અનેક હવાઈ હુમલા કર્યા છે. ઈરાને જવાબમાં જવાબી કાર્યવાહી કરી. આ હુમલાઓએ વિશ્વભરના નાણાકીય બજારોને અસર કરી; વૈશ્વિક આશંકાના પરિણામે રોકાણકારોનો વિશ્વાસ તૂટી ગયો, જેના કારણે એશિયન બજારોમાં પણ ઘટાડો જોવા મળ્યો.
બુધવારે ભારતીય શેરબજારમાં રોકાણકારો માટે શરૂઆત ખૂબ જ ખરાબ રહી હતી.બીએસઈ સેન્સેક્સ અગાઉના બંધ 76,944 ની સરખામણીએ ઘટીને 76,471 પર ખુલ્યો હતો અને જોતજોતામાં 700 અંકથી વધુ તૂટીને 76,135 ની સપાટીએ પહોંચી ગયો હતો. એનએસઈ નિફ્ટી અગાઉના બંધ 24,055 સામે રેડ ઝોનમાં 23,858 પર ખુલ્યા બાદ વધુ ઘટીને 23,786 ના સ્તરે કારોબાર કરતો જોવા મળ્યો હતો.બજારમાં અચાનક આવેલી આ મંદીમાં લાર્જકેપ, મિડકેપ અને સ્મોલકેપ એમ ત્રણેય કેટેગરીના શેર્સની હાલત કફોડી થઈ હતી:
યુદ્ધ જેવી પરિસ્થિતિનો સૌથી મોટો માર ઉર્જા બજારે ભોગવ્યો છે. બ્રેન્ટ ક્રૂડ ઓઈલના ભાવમાં રાતોરાત 2 ટકાનો નોંધપાત્ર ઉછાળો જોવા મળ્યો. તેની કિંમત વધીને $96.6 પ્રતિ બેરલ થઈ ગઈ છે, જે છ અઠવાડિયામાં સૌથી વધુ છે. મધ્ય પૂર્વમાં વધતા તણાવને કારણે વૈશ્વિક ઉર્જા પુરવઠામાં સંભવિત વિક્ષેપો અંગે ચિંતા વધી છે. વિશ્લેષકો માને છે કે જો સંઘર્ષ ચાલુ રહેશે, તો તેલના ભાવ લાંબા સમય સુધી ઊંચા સ્તરે રહી શકે છે.
શેરબજારમાં કડાકાનું મુખ્ય કારણ અમેરિકન પ્રમુખ ડોનાલ્ડ ટ્રમ્પનું નિવેદન છે. તેમણે દાવો કર્યો હતો કે વ્યૂહાત્મક રીતે અતિ મહત્વપૂર્ણ એવા ‘સ્ટ્રેટ ઓફ હોર્મુઝ’ પર હવે અમેરિકાનું લગભગ સંપૂર્ણ નિયંત્રણ છે અને ઈરાનની અર્થવ્યવસ્થા ધ્વસ્ત થઈ રહી છે. આ ઉપરાંત અમેરિકા દ્વારા ઈરાનના લશ્કરી ઠિકાણાઓ પર એરસ્ટ્રાઈક પણ કરવામાં આવી છે.
