જો હાડકા ભાંગે તો પતિને પંદર દિવસની જેલની સજા
અફઘાનિસ્તાનમાં તાલિબાન સરકાર ક્યારે કેવો નિર્ણય લેશે તે કહેવું મુશ્કેલ છે. નવીનતમ માહિતી અનુસાર, તાલિબાને કહ્યું છે કે ઘરેલુ હિંસા વાજબી છે. પતિ ઘરમાં તેની પત્નીને માર મારી શકે છે. તાલિબાને એમ પણ કહ્યું છે કે પત્નીને માર મારવાથી તેના હાડકાં ભાંગવા જોઈએ નહીં.માનવ અધિકાર સંગઠનો દ્વારા તાલિબાનની આ નીતિની સખત નિંદા કરવામાં આવી છે.
તાલિબાનના નિયમો અનુસાર, પતિ ઘરનો માલિક છે. તે સજા તરીકે તેની પત્નીને માર મારી શકે છે. તાલિબાને શરિયા કાયદા પર આધારિત બંધારણ બનાવ્યું છે. આ બંધારણમાં જયાં જયાં સ્ત્રીઓનો ઉલ્લેખ આવે છે તેમાં માત્ર સ્ત્રીનું અપમાન અને તેના પ્રત્યેની હીનતા તથા તેની હિંસા કરવાના અધિકારો દર્શાવાયા છે.
તાલિબાનના નવા બંધારણમાં 10 પ્રકરણો અને 119 કલમો છે. આ બંધારણમાં ઘરેલુ હિંસાને કાયદેસર જાહેર કરવામાં આવી છે. ધ ઇન્ડિપેન્ડન્ટે આ નવા તાલિબાન બંધારણ પર એક અહેવાલ પ્રકાશિત કર્યો છે. આ અહેવાલ મુજબ, તાલિબાનની કલમ 90 હેઠળ ઘરેલુ હિંસાને કાયદેસર બનાવવામાં આવી છે. જો કોઈ પતિ તેની પત્નીને માર મારે છે અને તેના હાડકાં તોડે છે, તો પત્ની ફરિયાદ નોંધાવી શકે છે. આ માટે, પત્નીએ ન્યાયાધીશ સમક્ષ હાજર થવું પડશે અને ન્યાયાધીશને તેના ઈજાઓ બતાવવી પડશે. ત્યારબાદ પતિને 15 દિવસ સુધીની જેલની સજા થઈ શકે છે.
તાલિબાન બંધારણમાં એમ પણ કહેવામાં આવ્યું છે કે જો કોઈ પત્ની તેના પતિના સંબંધીઓને તેની પરવાનગી વિના મળે છે, તો તેને ત્રણ મહિના સુધીની જેલ થઈ શકે છે. આ તાલિબાન બંધારણનો ઘણા પક્ષો વિરોધ કરી રહ્યા છે, જેઓ કહે છે કે તેમાં દમનકારી જોગવાઈઓ છે. તેથી, ભવિષ્યમાં શું થાય છે તે જોવું મહત્વપૂર્ણ રહેશે.
