સમગ્ર દેશની મેડિકલ કોલેજોને યુજી ઈન્ટર્ન, પીજી રેસિડેન્ટ અને સિનિયર રિસિડેન્ટને ચૂકવવામાં આવતા સ્ટાઈપેન્ડની વિગતો દર મહિનાની 5મી તારીખ સુધીમાં મેઈલ કરવા માટે સૂચના આપવામાં આવેલી છે. પરંતુ રાજ્યની 10 જેટલી કોલેજોએ સૂચનાનું ઉલ્લંઘન કરતા નેશનલ મેડિકલ કમિશન દ્વારા નોટિસ ફટકારવામાં આવી છે. આ ઉપરાંત કોલેજો સામે કાર્યવાહી કરવા માટેની પણ ચીમકી ઉચ્ચારવામાં આવી છે. પ્રાપ્ત માહિતી અનુસાર, નેશનલ મેડિકલ કમિશન (NMC) દ્વારા દેશની 115 સરકારી અને 83 ખાનગી મેડિકલ કોલેજોને યુજી ઈન્ટર્ન, પીજી રેસિડેન્ટ અને સિનિયર રેસિડેન્ટને ચૂકવાયેલ સ્ટાઈપેન્ડની વિગતો સબમિટ ન કરવા બાબતે નોટિસ ફટકારી છે. જેમાં ગુજરાતની 10 કોલેજનો પણ સમાવેશ થાય છે. NMCએ કોલેજોને આપેલી નોટિસમાં જણાવ્યું છે કે, સુપ્રીમ કોર્ટના હુકમ અંતર્ગત દેશની તમામ મેડિકલ કોલેજોને સૂચના આપવામાં આવી હતી કે, તમારી મેડિકલ કોલજોમાં યુજી ઈન્ટર્ન, પીજી રેસિડેન્ટ અને સિનિયર રિસિડેન્ટને ચૂકવવામાં આવતા સ્ટાઈપેન્ડની વિગતો સબમિટ કરવાની રહેશે.
દેશની તમામ મેડિકલ કોલેજોને સ્પષ્ટ આદેશ અપાયો હતો કે, દરેક મહિનાની 5 તારીખ સુધીમાં NMCની ઈ-મેઈલ આઈડી પર મેઈલ કરી વિગતો મોકલી દેવાની રહેશે. તેમ છતાં કેટલીક મેડિકલ કોલેજો દ્વારા વિગતો મોકલવામાં આવી ન હોવાનું જણાતા કારણદર્શક નોટિસ આપી ખુલાસો પૂછવામાં આવ્યો છે. જે કોલેજોને નોટિસ મળી છે તેમાં 3 સરકારી મેડિકલ કોલેજ અને 7 ખાનગી મેડિકલ કોલેજનો સમાવેશ થાય છે. સરકારી મેડિકલ કોલેજમાં સુરત મ્યુનિ. ઈન્સ્ટિટ્યૂટ ઓફ મેડિકલ કોલેજ એન્ડ રિસર્ચ, ગોધરાની ગવર્મેન્ટ મેડિકલ કોલેજ તથા પોરબંદરની ગવર્મેન્ટ મેડિકલ કોલેજનો સમાવેશ થાય છે.
આ ઉપરાંત જે ખાનગી મેડિકલ કોલેજોને નોટિસ મળી છે, તેમાં સુરતની કિરણ મેડિકલ કોલેજ, અમદાવાદની સાલ ઈન્સ્ટિટ્યૂટ ઓફ મેડિકલ સાયન્સ, કલોલની સ્વામિનારાણય ઈન્સ્ટિટ્યૂટ ઓફ મેડિકલ સાયન્સ એન્ડ રિસર્ચ, ભરૂૂચની ડો.કિરણ સી.પટેલ મેડિકલ કોલેજ એન્ડ રિસર્ચ એન્ડ ઈન્સ્ટિટ્યૂટ, અમદાવાદની ડો.એમ.કે.શાહ મેડિકલ કોલેજ એન્ડ રિસર્ચ સેન્ટર, હિંમતનગરની GMERS મેડિકલ કોલેજ તથા ધારપુરની GMERS મેડિકલ કોલેજનો સમાવેશ થાય છે.
