છેલ્લા કેટલાક દિવસોથી ખાડી દેશોની પરિસ્થિતિને ધ્યાનમાં રાખીને પોરબંદર જિલ્લાના ઈનચાર્જ જિલ્લા પુરવઠા અધિકારી નેહા સોજીત્રાએ પત્રકાર પરિષદ કરીને સ્પષ્ટતા કરી હતી. તેમણે જણાવ્યું હતું કે જિલ્લામાં ઘરેલું વપરાશ માટેના ગેસ સિલિન્ડરનો પૂરતો સ્ટોક ઉપલબ્ધ છે. ઓનલાઈન બુકિંગ સિસ્ટમમાં સર્વર ઓવરલોડને કારણે જે ટેકનિકલ સમસ્યા સર્જાઈ હતી, તેને કારણે બુકિંગમાં થોડો વિલંબ થયો હતો, પરંતુ હવે આ સિસ્ટમ પુન: કાર્યરત થઈ ગઈ છે.
તેમણે જણાવ્યું હતું કે, ગેસ એજન્સીઓ દ્વારા જાણીજોઈને બુકિંગ બંધ રાખવામાં આવ્યું નથી, તેથી નાગરિકોએ કોઈ પણ પ્રકારના ગભરાટ કે પેનિકમાં આવીને બિનજરૂૂરી સંગ્રહખોરી કરવી નહીં.
વધુમાં, જિલ્લા પુરવઠા અધિકારીએ જણાવ્યું હતું કે, ઘરેલું ગેસ સિલિન્ડરનો કોમર્શિયલ હેતુ માટે ગેરકાયદેસર વપરાશ રોકવા માટે તમામ તાલુકામાં મામલતદારઓને સઘન ચેકિંગ કરવા સૂચના આપી દેવામાં આવી છે. જો કોઈ તત્વો અછતની અફવા ફેલાવીને બ્લેક માર્કેટિંગ કરતા હોય અથવા નિયત કિંમત કરતા વધુ ભાવ વસૂલતા હોય, તો તેની જાણ તાત્કાલિક વહીવટી તંત્રને કરવા અપીલ કરવામાં આવી છે. સરકાર દ્વારા પુરવઠામાં કોઈ કાપ મૂકવામાં આવ્યો નથી અને ડેપો પરથી સતત સ્ટોક આવી રહ્યો હોવાથી દરેક ગ્રાહકને સમયસર ગેસ મળી રહેશે તેવી ખાતરી આપવામાં આવી છે.
