જામનગર શહેરના ગોકુલનગર જકાતનાકા પાસે આવેલી આશાપુરા હોટલ નજીક મોડી રાત્રે બે જૂથો વચ્ચે થયેલા સશસ્ત્ર અને ધિંગાણાના બનાવનો વીડિયો સોશિયલ મીડિયામાં વાયરલ થતાં પોલીસ તંત્ર હરકતમાં આવ્યું હતું. તપાસ દરમિયાન બંને જૂથો વચ્ચે અથડામણ થઈ હોવાનું સામે આવતા પોલીસે બંને પક્ષની સામસામે ફરિયાદો નોંધી કુલ 10 શખ્સોને ઝડપી પાડ્યા છે.
તા. 17 જૂનના રોજ રાત્રે આશરે 11:30 વાગ્યે ગોકુલનગર જકાતનાકા પાસે મોટરસાયકલ અડી જવાની નજીવી બાબતે બોલાચાલી થઈ હતી. બાદમાં બંને પક્ષના લોકો એકત્ર થઈ જતાં મામલો ઉગ્ર બન્યો હતો, અને જાહેરમાં મારામારી સર્જાઈ હતી.
એક ફરિયાદમાં પરેશ અરવિંદભાઈ ધોકીયાએ નરેશ ડાંગર, રાહુલ ડાંગર, સાગર બેડીયાવદરા, અમિત આંબલીયા, રોહિત સોલંકી અને ચિની કોળી સામે ગેરકાયદેસર મંડળી રચી લાકડાના ધોકાથી હુમલો કરવો, ઈજાઓ પહોંચાડવી, જાનથી મારી નાખવાની ધમકી આપવી તેમજ રોકડ રકમ અને વાહનની ચાવી બળજબરીથી લઈ જવાના આક્ષેપો સાથે ગુનો નોંધાવ્યો છે.
જ્યારે સામા પક્ષે નરેશ રાજશીભાઈ ડાંગરે પરેશ ધોકીયા, હસનભાઈ સાતીર, પૃથ્વીરાજસિંહ ક્યોર, મનસુખભાઈ શીંગળ અને હરપાલસિંહ જાડેજા સામે મારામારી, ગાળો આપી હુમલો કરવા અને ઈજાઓ પહોંચાડવાની ફરિયાદ નોંધાવી છે.
બનાવના વીડિયો સોશિયલ મીડિયામાં વાયરલ થતાં નાયબ પોલીસ મહાનિરીક્ષક નિર્લિપ્ત રાય અને જિલ્લા પોલીસ અધિક્ષક ડો. રવિ મોહન સૈનીના માર્ગદર્શન હેઠળ સીટી સી ડિવિઝન પોલીસ દ્વારા તાત્કાલિક તપાસ હાથ ધરવામાં આવી હતી.
નાયબ પોલીસ અધિક્ષક જયવીરસિંહ ઝાલાના માર્ગદર્શન હેઠળ પોલીસ ઇન્સ્પેક્ટર એન.બી. ડાભી અને સર્વેલન્સ સ્ટાફે અલગ-અલગ ટીમો બનાવી ગણતરીના કલાકોમાં જ બનાવમાં સંડોવાયેલા તમામ 10 શખ્સોની ઓળખ કરી ઝડપી પાડ્યા હતા. પોલીસે બંને પક્ષો સામે ભારતીય ન્યાય સંહિતાની વિવિધ કલમો તેમજ જાહેરનામા ભંગ અંગે ગુનો નોંધી વધુ તપાસ હાથ ધરી છે. પોલીસે જાહેરમાં કાયદો હાથમાં લેનાર તત્વો સામે કડક કાર્યવાહી કરવાની પણ ચેતવણી આપી છે.