ઉત્તર નાઇજીરીયાના કાનો રાજ્યમાં એક ભયાનક માર્ગ અકસ્માત થયો છે. આ અકસ્માતમાં 30 લોકોના મોત થયા છે. અધિકારીઓએ જણાવ્યું હતું કે મુસાફરોને લઈ જતી એક ટ્રકે બેદરકારીપૂર્વક વાહન ચલાવવાને કારણે કાબુ ગુમાવ્યો અને હાઇવે પર અકસ્માત સર્જાયો હતો, જેમાં ઘણા લોકો ગંભીર રીતે ઘાયલ થયા છે. આ દુર્ઘટના કાનોના ગેઝાવા લોકલ ગવર્મેન્ટ એરિયાના કવાનર બર્ડે શહેરમાં થઈ હતી.
કાનોના ગવર્નર ઓફિસના એક નિવેદન મુજબ ટ્રક મુસાફરો અને માલસામાન લઈને કાનોના ગુજુંગુ શહેર તરફ જઈ રહી હતી. વાહન હાઇવે પર ખૂબ જ સ્પીડમાં જઈ રહ્યું હતું, ત્યારબાદ ડ્રાઇવરે કાબુ ગુમાવ્યો અને ટ્રક અકસ્માતનો ભોગ બન્યો હતો. સ્થાનિક મીડિયા અને સરકારે આ ઘટના માટે બેદરકારીપૂર્વક વાહન ચલાવવાને જવાબદાર ગણાવ્યું છે.
કાનો રાજ્યના ગવર્નર અબ્બા કબીર યુસુફના પ્રવક્તા સુનુસી બાતુરે દાવાકિન તોફાએ એક નિવેદનમાં ઘટનાની પુષ્ટિ કરી છે. નિવેદનમાં જણાવાયું છે કે મૃત્યુઆંક 30 થી વધુ છે, જેમાં નોંધપાત્ર સંખ્યામાં ઘાયલ થયા છે. ઘાયલોમાંથી ઘણાની હાલત ગંભીર છે અને તેમને કાનોની વિવિધ હોસ્પિટલોમાં દાખલ કરવામાં આવ્યા છે. રાજ્યપાલે ઘાયલોને તાત્કાલિક સારવાર આપવાનો આદેશ આપ્યો છે.