ભારતીય ક્રિકેટના ઈતિહાસમાં જ્યારે પણ લડાયક ખેલાડીઓની વાત આવે છે, ત્યારે Yuvraj singhનું નામ સૌથી ઉપર લેવાય છે. 2007નો T20 વર્લ્ડ કપ હોય કે 2011નો વનડે વર્લ્ડ કપ, યુવીએ ભારતને ચેમ્પિયન બનાવવામાં મહત્વની ભૂમિકા ભજવી હતી.
જોકે, મેદાનની બહાર યુવરાજ હંમેશા એક અલગ જ પડકારનો સામનો કરતો રહ્યો છે અને તે છે તેના પિતા યોગરાજ સિંહના વિવાદાસ્પદ નિવેદનો. તાજેતરમાં, યુવરાજ સિંહે એક મોટું કદમ ઉઠાવતા ભારતના બે દિગ્ગજ કેપ્ટનો, મહેન્દ્ર સિંહ ધોની અને કપિલ દેવની જાહેરમાં માફી માંગી છે. પિતા દ્વારા કરવામાં આવેલી વારંવારની ટીકાઓ અને પાયાવિહોણા આક્ષેપો બાદ યુવરાજે મૌન તોડ્યું છે. યોગરાજ સિંહ છેલ્લા ઘણા સમયથી એમએસ ધોની પર નિશાન સાધતા રહ્યા છે. તેમણે વારંવાર એવો દાવો કર્યો છે કે ધોનીના કારણે જ યુવરાજ સિંહનું કરિયર વહેલું ખતમ થઈ ગયું અને તેને ટીમમાંથી બહાર કરવામાં આવ્યો. માત્ર ધોની જ નહીં, પરંતુ ભારતના પ્રથમ વર્લ્ડ કપ વિજેતા કેપ્ટન કપિલ દેવ વિરુદ્ધ પણ યોગરાજ સિંહે ઘણી વખત અપમાનજનક ટિપ્પણીઓ કરી છે.
Yuvraj singh અત્યાર સુધી આ મામલે મૌન જાળવી રાખ્યું હતું, પરંતુ હવે તેણે સ્વીકાર્યું છે કે તેના પિતાના શબ્દોએ મહાન ખેલાડીઓનું અપમાન કર્યું છે. યુવરાજે કહ્યું, “હું કપિલ પાજી અને માહી (ધોની) પાસે મારા પિતાએ જે કંઈ પણ કહ્યું છે તે બદલ માફી માંગવા માંગુ છું. એક પુત્ર તરીકે મારે આ જવાબદારી સ્વીકારવી પડશે.” યોગરાજ સિંહના નિવેદનો જાણે કોઈ ’તૂટેલા રેકોર્ડ’ જેવા રહ્યા છે.
દરેક ઈન્ટરવ્યુમાં તેઓ ધોની પર આરોપ લગાવતા હતા કે ધોનીએ યુવરાજ સાથે પક્ષપાત કર્યો છે. તાજેતરમાં જ તેમણે ફરી એકવાર ધોની વિશે વિવાદાસ્પદ વાત કહી હતી, જેનાથી સોશિયલ મીડિયા પર ઘણો આક્રોશ જોવા મળ્યો હતો.
યુવરાજે સ્પષ્ટ કર્યું કે તે તેના પિતાના વિચારો સાથે સહમત નથી. તેણે કહ્યું કે, “મારા પિતાનો સ્વભાવ અલગ છે, પરંતુ જે લોકોએ દેશ માટે આટલું બધું કર્યું છે, તેમનું અપમાન કરવું યોગ્ય નથી.”
