યુક્રેનનું યુધ્ધ સમેટવાના પ્રયાસોના અંતિમ તબક્કામાં અમેરિકી રાષ્ટ્રપ્રમુખ ડોનાલ્ડ ટ્રમ્પે મોસ્કો મોકલેલા પોતાના વિશેષ પ્રતિનિધિ મંડળમાં પોતાના જમાઈને પણ શા માટે મોકલ્યા તે અંગેની ચર્ચાએ અમેરિકન કોર્પોરેટ જગતમાં ચર્ચા જગાવી છે. ડોનાલ્ડ ટ્રમ્પ ખુદ મોટા ગજાના કોર્પોરેટ જાયન્ટ હોવાથી યુધ્ધના સમાધાન સાથે કાંઈક મોટો વેપારી સોદો પણ રશિયા સાથે પાર પાડવાની ગુપ્ત યોજના ધરાવતાં હોવાની ગંધ આ ઘટનાથી ફેલાઈ છે.
આ દિવસોમાં વૈશ્વિક રાજકારણમાં ભારે ઉથલપાથલ ચાલી રહી છે. એક તરફ ડોનાલ્ડ ટ્રમ્પે દાવોસમાં બોર્ડ ઓફ પીસની રચનાની જાહેરાત કરી, તો બીજી તરફ રશિયાની રાજધાની મોસ્કોમાં આખી રાત મંત્રણા ચાલુ રહી. લાંબા સમય પછી, યુએસ એમ્બેસેડર સ્ટીવ વિટકોફ અને ડોનાલ્ડ ટ્રમ્પના જમાઈ જેરેડ કુશનર રશિયાના રાષ્ટ્રપતિ સાથે ક્રેમલિનમાં ગંભીર ચર્ચાઓમાં રોકાયા આ ઘટનાએ વૈશ્ર્વિક રાજકારણમાં નવા તરંગો વહેતા કર્યા છે.
આ દરમિયાન વ્લાદિમીર પુતિન પણ હાજર હતા અને તેમણે સ્પષ્ટ કર્યું કે આ કરાર ત્યારે જ શક્ય છે જ્યારે તેના કબજા હેઠળના વિસ્તારોને માન્યતા આપવામાં આવે અને યુક્રેન ત્યાંથી હટી જાય. જો કે, યુક્રેન માટે આ સ્વીકારવું સરળ રહેશે નહીં. યુક્રેનના રાષ્ટ્રપતિ વોલોડિમિર ઝેલેન્સકીએ ઘણી વખત કહ્યું છે કે અમે અમારા પ્રદેશો છોડીશું નહીં. આ બેઠક એવા સમયે થઈ છે જ્યારે વોલોડિમિર ઝેલેન્સકીએ ગુરુવારે કહ્યું હતું કે રશિયાના હુમલાના જવાબમાં અમને યુરોપ કે અમેરિકા તરફથી મદદ મળી રહી નથી. તેમણે કહ્યું કે સ્થિતિ એવી છે કે અમને વ્લાદિમીર પુતિનની દયા પર છોડી દેવામાં આવ્યા છે. ક્રેમલિનના વિદેશ મામલાના સલાહકાર યુરી ઉશાકોવે કહ્યું કે અમે બેઠકમાં સ્પષ્ટ કર્યું છે કે જે વિસ્તારો રશિયાના નિયંત્રણમાં છે તેને માન્યતા આપવામાં આવે. યુક્રેનને આની સામે સખત વાંધો છે. ઝેલેન્સકીનું કહેવું છે કે રશિયાએ પૂર્વ યુક્રેનના વિસ્તારો પર ગેરકાયદેસર કબજો જમાવ્યો છે અને અમે તેને સ્વીકારતા નથી.
ઝેલેન્સકીએ ગુરુવારે દાવોસમાં ડોનાલ્ડ ટ્રમ્પ સાથેની મુલાકાત દરમિયાન કહ્યું કે રશિયાએ પૂર્વી યુક્રેનના મોટા ભાગ પર કબજો જમાવી લીધો છે. આ મુદ્દો હજુ ઉકેલાયો નથી અને શાંતિ પ્રસ્તાવ લગભગ તૈયાર છે. દરમિયાન શુક્રવારે સંયુક્ત આરબ અમીરાતમાં બેઠક યોજાવાની છે. તેમાં રશિયા, યુક્રેન અને અમેરિકાના પ્રતિનિધિઓને સામેલ કરવામાં આવશે. આ બેઠકમાં ગાઝાને લઈને બનેલા શાંતિ બોર્ડની પણ ચર્ચા થઈ હતી. વ્લાદિમીર પુતિને કહ્યું કે અમે આ માટે તૈયાર છીએ અને એક અબજ ડોલરની રકમ પણ આપીશું. તેમણે કહ્યું કે આ રકમ તે સંપત્તિઓમાંથી લેવી જોઈએ જે રશિયાની છે અને અમેરિકા દ્વારા જપ્ત કરવામાં આવી છે.
તમને જણાવી દઈએ કે 2014માં રશિયા અને યુક્રેન વચ્ચે યુદ્ધ થયું હતું. ત્યારબાદ 2022માં ફરી સંઘર્ષ શરૂૂ થયો હતો. બંને પ્રસંગોને જોડીને રશિયાએ યુક્રેનના લગભગ 20 ટકા હિસ્સા પર કબજો કરી લીધો છે. પરંતુ યુક્રેન સાથેની 1,000 કિલોમીટર લાંબી સરહદે સુરક્ષા જાળવવી એ પણ રશિયા માટે એક પડકાર છે. ખાસ કરીને જ્યારે તેની અર્થવ્યવસ્થા બરબાદ થઈ ગઈ હોય. સાથે જ યુક્રેનની હાલત પણ ખરાબ છે. તેની પાસે શસ્ત્રો તૈયાર કરવા માટે પૈસા નથી અને યુરોપ અને અમેરિકાની મદદ પણ મર્યાદિત થઈ ગઈ છે. આવી સ્થિતિ માટે ઝેલેન્સકી યુરોપ પર ગુસ્સે છે. તેમણે કહ્યું કે યુરોપિયન યુનિયનના તમામ 27 દેશો અમને મદદ કરી રહ્યા નથી. આ સિવાય ઘણા દેશો રશિયાની સાથે જતા હોય તેવું લાગી રહ્યું છે.
