અમદાવાદ શહેરમાં તહેવારો સિવાયના સામાન્ય દિવસોમાં પણ આંગડિયા પેઢીના કર્મચારીઓ સ્થાનિક ગુનેગારોના નિશાના પર હોવાનો વધુ એક પુરાવો કૃષ્ણનગર વિસ્તારમાંથી મળ્યો છે. કૃષ્ણનગરના જાણીતા કોમર્શિયલ સેન્ટર મારુતિ પ્લાઝા નજીકથી ધોળા દિવસે કિલર સ્ટાઇલમાં 50 લાખ રૂૂપિયાની સશસ્ત્ર લૂંટ ચલાવવામાં આવતા સમગ્ર પોલીસ વિભાગ દોડતો થઈ ગયો છે.
પ્રાપ્ત પ્રાથમિક વિગતો અનુસાર, એક આંગડિયા પેઢીનો કર્મચારી રૂૂ. 50 લાખ ભરેલી બેગ લઈને પસાર થઈ રહ્યો હતો. તે આંગડિયા પેઢીની ઓફિસમાંથી બહાર નીકળ્યો ત્યારથી જ બે મોટરસાઇકલ પર સવાર ચાર અજાણ્યા શખ્સો તેની હિલચાલ પર નજર રાખીને પીછો કરી રહ્યા હતા. જેવો જ કર્મચારી મારુતિ પ્લાઝા પાસે પહોંચ્યો કે તુરંત જ બાઇક સવારોએ તેની ગાડી આંતરી લીધી હતી. કર્મચારી કંઈ સમજે તે પહેલાં જ લૂંટારુઓ પૈસા ભરેલી બેગ ઝૂંટવીને આંખના પલકારામાં બાઇક પર બેસી પલાયન થઈ ગયા હતા.
ધોળા દિવસે બજારની વચ્ચે થયેલી આ લૂંટની ઘટનાને પગલે આસપાસના વેપારીઓમાં ભારે ફફડાટ વ્યાપી ગયો છે. ઘટનાની જાણ થતાં જ કૃષ્ણનગર પોલીસ અને ક્રાઇમ બ્રાન્ચની ટીમો ડોગ સ્ક્વોડ અને ફિંગરપ્રિન્ટ એક્સપર્ટ સાથે ઘટનાસ્થળે પહોંચી ગઈ છે. પ્રાથમિક દ્રષ્ટિએ આ ઘટનામાં કોઈ જાણભેદુ હોવાની અથવા આંગડિયા પેઢીની બહારથી જ સચોટ ટીપ મળી હોવાની આશંકા સેવાઈ રહી છે. પોલીસે મારુતિ પ્લાઝા અને તેની આસપાસના તમામ રસ્તાઓ પર લાગેલા સીસીટીવી ફૂટેજ એકત્ર કરવાની કામગીરી હાથ ધરી છે જેથી બાઇકના નંબર અને આરોપીઓના ચહેરા ઓળખી શકાય.
