પૂર્ણ વિશ્ર્વયુદ્ધનો ખતરો ટાળવા મુખ્ય શત્રુદેશોનો પ્રયાસ: પુતિનના ગંભીર સૂચનો
અમેરિકા, ઈઝરાયલ અને ઈરાન વચ્ચે ચાલી રહેલા યુદ્ધના કારણે વિશ્વના અનેક દેશોનું ટેન્શન વધ્યું છે. મિડલ ઈસ્ટના દેશોમાંથી ઓઈલ અને ગેસની સપ્લાય લગભગ ઠપ પડી ગઈ છે. એવામાં અમેરિકાના પ્રમુખ ડોનાલ્ડ ટ્રમ્પ અને રશિયાના પ્રમુખ વ્લાદિમીર પુતિન વચ્ચે એક કલાક સુધી ટેલિફોનિક વાતચીત થઈ છે. જે રીતે ટ્રમ્પ ઇઝરાયલના ગોડફાધર ગણાય છે તે રીતે હજુ સુધી ખુલ્લંખુલ્લા મેદાનમાં ન આવ્યા હોવા છતાં પુતિનને ઇરાનના ગોડફાધર માનવામાં આવે છે.
સોમવારે ટ્રમ્પ અને પુતિન વચ્ચે એક કલાક સુધી ઈરાન અને યુક્રેન મુદ્દે ટેલિફોનિક વાતચીત થઈ. રશિયાના વિદેશ નીતિના સલાહકાર યુરી ઉષાકોવના જણાવ્યા અનુસાર, પુતિને ટ્રમ્પ સાથેની વાતચીત દરમિયાન ઈરાન યુદ્ધ રોકવાનો ખાસ પ્લાન શેર કર્યો હતો. રશિયાનો દાવો છે કે આ વાતચીતની પહેલ અમેરિકાએ કરી હતી.
આ સાથે જ પુતિને યુક્રેન મામલે ટ્રમ્પ દ્વારા કરવામાં આવી રહેલી મધ્યસ્થીના પણ વખાણ કર્યા. તેમણે ઈરાન અને યુક્રેન ઉપરાંત, બંને નેતાઓએ વેનેઝુએલાની સ્થિતિ પર પણ ચર્ચા કરી હતી. ઈરાન રશિયાનું મિત્ર રાષ્ટ્ર રહ્યું છે, જ્યારે અમેરિકા ઈઝરાયલની પડખે છે. આ સંજોગોમાં ટ્રમ્પ અને પુતિન વચ્ચેનો આ સંવાદ સીઝફાયર તરફનો પ્રથમ મોટો સંકેત હોઈ શકે છે.
