15 દિવસમાં ત્રણ માસૂમનો ભોગ લેવાતા હાહાકાર

હળવદ તાલુકાના કીડી ગામમા કચ્છ જેવા ભેદી રોગચાળાએ ભરડો લીધો હોય તેમ છેલ્લા 15 દિવસમાં ત્રણ બાળકોના મોત થયા છે જ્યારે અન્ય સત્તર જેટલા બાળકો હાલ સારવારમાં હોવાની માહિતી મળી રહી છે.
મોરબી જિલ્લામાં પડેલા ભારે વરસાદના કારણે હળવદ શહેર અને ગ્રામ્ય વિસ્તારમાં રોગચાળાએ માથું ઉચક્યું હોય તેમ ખાનગી અને સરકારી હોસ્પિટલોમાં દર્દીઓની લાઈનો જોવા મળી રહી છે.

ત્યારે હળવદ તાલુકાના કીડી ગામે ભેદી રોગચાળાએ અજગર ભરડો લીધો હોય તેમ છેલ્લા 15 દિવસમાં ત્રણ બાળકોના બીમારીના કારણે મૃત્યુ થયા છે.જોકે આરોગ્ય વિભાગના જણાવ્યા મુજબ બે બાળકોનું અન્ય બીમારી તેમજ એક બાળકનું તાવના કારણે મૃત્યુ થયું હોવાનું જણાવી રહ્યા છે. જ્યારે હાલ ગામમાં 17 જેટલા બાળકો બીમાર હોય અને ઘરે જ સારવાર લઈ રહ્યા હોવાનું જાણવા મળી રહ્યું છે.

વધુમાં હળવદના કીડી ગામની વસ્તી 1700ની છે જેથી નાના એવા ગામમાં પંદર દિવસમાં ત્રણ બાળકોના મૃત્યુ થતાં ગામમાં પણ ફફરાટ ફેલાયો છે.ગત તારીખ 28/8 ના રોજ આશિષ (ઉં.વ.11)નું મૃત્યુ થયું હતું જ્યારે 10-9-2024 ના રોજ જેન્સી (ઉં.વ.2) અને 12/9/ 2024 ના રોજ ભાવેશ (ઉં.વ.10)નું મૃત્યુ થયું હોવાનું સામે આવ્યું છે.

મોરબીના જીવાપર પાસે ટેન્કર અડફેટે જીકિયારી ગામના બે યુવકનાં મોત નિપજતા કલેઇમ કેસ કરાયા’તા

મોરબી નજીક જીવાપર ગામ પાસે ટેન્કરે ડબલ સવારી બાઈકને હડફેટે લેતા જીકીયારી ગામનાં બે યુવાનનાં મૃત્યુનાં છ વર્ષ પહેલાના કેસમાં રાજકોટ ટ્રિબ્યુનલ દ્વારા વ્યાજ સહીત રૂૂા.50 લાખ વળતર બંનેના વારસદારોને ચૂકવવા વીમા કંપનીને હુકમ કર્યો છે.આ અંગેની હકીકત મુજબ, મોરબીના જીકીયારી ગામનાં યુવાન દિનેશભાઈ મોનજીભાઈ પીપળીયા તથા કેશુભાઈ હેમુભાઈ પીપળીયા બન્ને બાઇકમાં જતા હતા ત્યારે જીવાપર ગામ પાસે પહોંચતા જી.જે.- 12-ડબલ્યુ- 8470 નંબરના ટેન્કરે હડફેટે લેતાં બન્ને યુવાનોને ગંભીર ઈજાઓ થતાં બન્ને યુવાનોનાં મૃત્યુ થયા હતા. જે અંગે ગુજરનારોનાં વારસદારોએ બન્ને કલેઈમ કેસો રાજકોટ ટ્રિબ્યુનલમાં વકીલ રવીન્દ્ર ગોહેલ તથા સંદિપ એમ. રાઠોડ મારફત તા.06/12/2018નાં રોજ દાખલ કર્યા હતા.

આ અકસ્માતનાં મૃતકો પૈકી દિનેશભાઈ પીપળીયા અપરિણત અને તેમનાં કુટુંબમાં એકમાત્ર કમાવાવાળા વ્યકિત હતાં અને મૃતક કેશુભાઈ પીપળીયા પરિણીત હતાં અને તેમનાં ઘરમાં તેમનાં સિવાય પરિવારમાં તેમનાં પત્ની, તથા બે સગીર સંતાનો તથા માતાનું ભરણપોષણ કરતાં હતાં. તેથી બંને કેસમાં ગુજરનારોનાં વારસદારોને મહત્તમ વળતર મળે તથા ગુજરનારોની આવક મિનિમમ વેજીસ પ્રમાણે ગણવા તથા બન્ને ગુજરનારોની પ્રોસ્પેકટીવ આવક ધ્યાનમાં લેવા તેવી દલીલો ગુજરનારોનાં વકીલો દ્વારા કરવામાં આવી હતી.

તેમજ હાઈકોર્ટ તથા સુપ્રીમ કોર્ટનાં જજમેન્ટ રજુ કર્યા હતાં, તે તમામ ધ્યાનમાં રાખી રાજકોટ મોટર એકસીડન્ટ ક્લેઇમ ટ્રીબ્યુનલે ગુજ. દિનેશભાઈ મોનજીભાઈ પીપળીયા તથા કેશુભાઈ હેમુભાઈ પીપળીયાનાં બન્ને કલેઈમ કેસોમાં વ્યાજ સહીત રૂૂા.50 લાખ વળતર ચૂકવવા હુકમ કર્યો છે. આ કેસમાં અરજદારો વતી કલેઈમ કેસનાં નિષ્ણાંત વકીલ રવીન્દ્ર ડી. ગોહેલ, સંદિપ એમ. રાઠોડ, વિવેક વી. ભાંસળીયા (ગઢવી), આસિસ્ટન્ટ દિનેશ ડી. ગોહેલ તથા જતીન પી. ગોહેલ તથા જયેશ મકવાણા રોકાયા હતાં.

ગોંડલના વાવડીમાં વેલ્ડિંગ કરતી વખતે ટ્રકની ટાંકી ફાટતા યુવાન દાઝ્યો

મોરબીમાં કરિયાણાના વેપારીએ બીમારીથી કંટાળી પોતાની દુકાનમાં જ જાતે પેટ્રોલ છાંટી જાત જલાવી લીધી હતી. યુવકને તાત્કાલિક સારવાર માટે મોરબી બાદ રાજકોટ ખસેડવામાં આવ્યો હતો.

આ બનાવ અંગે પોલીસમાંથી જાણવા મળતી વિગત મુજબ મોરબીમાં જેતપર રોડ ઉપર આવેલી મારુતિ પાર્ક સોસાયટીમાં રહેતા લાલજીભાઈ મનસુખભાઈ પરમાર નામનો 30 વર્ષનો યુવાન પોતાના ઘર પાસે આવેલી પોતાની કરિયાણાની દુકાને હતો. ત્યારે પોતાની જાતે બપોરના બારેક વાગ્યાના અરસામાં પોતાની જાતે પેટ્રોલ છાંટી દિવાસળી ચાંપી દીધી હતી.

ગંભીર રીતે દાજી ગયેલા યુવાનને તાત્કાલિક સારવાર માટે મોરબી બાદ રાજકોટ ખાનગી હોસ્પિટલમાં દાખલ કરવામાં આવ્યો હતો. પ્રાથમિક પૂછપરછમાં લાલજીભાઈ પરમાર એકની એક બહેનનો એકનો એક ભાઈ છે અને અનાજ કરિયાણાની દુકાન ચલાવી પરિવારને આર્થિક મદદ કરે છે લાલજીભાઈ પરમારે માનસિક બીમારીથી કંટાળી પોતાની દુકાનમાં જાત જલાવી આપઘાતનો પ્રયાસ કર્યો હોવાનું જાણવા મળ્યું છે.

આ ઉપરાંત અન્ય બીજા બનાવમાં ગોંડલ તાલુકાના ચોરડી ગામે રહેતા અનિલ જેન્તીભાઈ સરવૈયા નામનો 35 વર્ષનો યુવાન વાવડી ગામે સાંજના પાંચેક વાગ્યાના અરસામાં ટ્રકની ટાંકીને વેલ્ડીંગ કરતો હતો ત્યારે અકસ્માતે ટાંકી ફાડતા આગ ભભૂકી ઉઠી હતી. જે આગમાં અનિલ સરવૈયા ગંભીર રીતે દાઝી ગયો હતો.

યુવકને તાત્કાલિક સારવાર માટે ગોંડલ બાદ રાજકોટ સિવિલ હોસ્પિટલમાં દાખલ કરવામાં આવ્યો હતો. ઉપરોક્ત બંને બનાવ અંગે પોલીસે નોંધ કરી વધુ તપાસ હાથ ધરી છે.