પાકિસ્તાની ચાહકોને મોટો ઝટકો લાગ્યો છે. અહેવાલો દર્શાવે છે કે પાકિસ્તાનની ટીમ 3 ઓક્ટોબરથી યુએઈમાં શરૂૂ થનારી વર્લ્ડ ચેમ્પિયનશિપ ઓફ લિજેન્ડ્સ ટુર્નામેન્ટમાં ભાગ લઈ શકશે નહીં. પાકિસ્તાન લિજેન્ડ્સ ટીમને બાકાત રાખવામાં આવી છે.
ટુર્નામેન્ટના પ્રોમો અને પોસ્ટરમાં પાકિસ્તાની ખેલાડીઓને દર્શાવવામાં આવ્યા હતા, પરંતુ હવે પાકિસ્તાની મીડિયા દાવો કરે છે કે પાકિસ્તાની ટીમને ટુર્નામેન્ટમાં ભાગ લેવાથી પ્રતિબંધિત કરવામાં આવી છે. પાકિસ્તાની મીડિયા અનુસાર, ભારત અને પાકિસ્તાન વચ્ચે ચાલી રહેલા તણાવને કારણે પાકિસ્તાની ચેમ્પિયન ટીમને WCL 2026 માંથી બહાર કરવામાં આવી છે.
વર્લ્ડ ચેમ્પિયનશિપ ઓફ લિજેન્ડ્સ પહેલાના અહેવાલો અનુસાર, PCB એ ટીમને ટુર્નામેન્ટમાં પાકિસ્તાન નામનો ઉપયોગ કરવા પર પ્રતિબંધ મૂક્યો છે. જેથી ટીમ હવે ટુર્નામેન્ટમાં ભાગ જ નથી લઈ રહી. સત્તાવાર સમયપત્રક મુજબ, પાકિસ્તાન તેની પહેલી મેચ 3 ઓક્ટોબરે શારજાહમાં બાંગ્લાદેશ ચેમ્પિયન્સ સામે રમવાનું હતું, ત્યારબાદ 10 ઓક્ટોબરે દુબઈમાં ભારત સામે મેચ રમવાની હતી.
વર્લ્ડ ચેમ્પિયનશિપ ઓફ લિજેન્ડ્સમાં હવે ભારત, ઓસ્ટ્રેલિયા, બાંગ્લાદેશ, ઈંગ્લેન્ડ, દક્ષિણ આફ્રિકા અને વેસ્ટ ઈન્ડિઝની ટીમો ભાગ લેશે. આ ટીમોમાં નિવૃત્ત ભૂતપૂર્વ ક્રિકેટરોનો સમાવેશ થાય છે. પાકિસ્તાનને બાકાત રાખવાનું મુખ્ય કારણ ગયા વર્ષે ભારતીય ટીમનો નિર્ણય માનવામાં આવે છે. પહેલગામ આતંકવાદી હુમલા અને ત્યારબાદ થયેલા સંઘર્ષ બાદ, ભારતીય ટીમે પાકિસ્તાની ચેમ્પિયન સામે રમવાનો ઇનકાર કર્યો હતો. આમ છતાં, પાકિસ્તાન ફાઇનલમાં પહોંચ્યું અને ટુર્નામેન્ટ જીતી ગયું. હવે જ્યારે પાકિસ્તાન બહાર થઈ ગયું છે, ત્યારે ભારતીય ટીમ આ ટુર્નામેન્ટમાં ભાગ લેશે. પ્રથમ વખત, આ ટુર્નામેન્ટ ઇંગ્લેન્ડની બહાર યોજાશે.
