બિલ્કિસ બાનો કેસમાં બે દોષિતોની આજીવન સજા સ્થગિત કરી જામીન આપતી સુપ્રીમ

સુપ્રીમ કોર્ટે સોમવારે બિલ્કિસ બાનો સામૂહિક દુષ્કર્મ અને હત્યા કેસમાં બે દોષિતોની આજીવન કેદની સજા સ્થગિત (સસ્પેન્ડ) કરીને તેમને જામીન પર મુક્ત કરવાનો આદેશ આપ્યો…

સુપ્રીમ કોર્ટે સોમવારે બિલ્કિસ બાનો સામૂહિક દુષ્કર્મ અને હત્યા કેસમાં બે દોષિતોની આજીવન કેદની સજા સ્થગિત (સસ્પેન્ડ) કરીને તેમને જામીન પર મુક્ત કરવાનો આદેશ આપ્યો છે. સર્વોચ્ચ અદાલતે આ નિર્ણય લેતી વખતે નોંધ્યું હતું કે બંને દોષિતો 17 વર્ષથી વધુ સમયથી જેલમાં કેદ છે.

અદાલતે પોતાના આદેશમાં સ્પષ્ટ કર્યું હતું કે, “તમામ પક્ષોની દલીલો સાંભળ્યા બાદ એ નોંધવું પૂરતું છે કે અરજદારો 17 વર્ષથી વધુ સમયથી જેલમાં છે, અને એ હકીકત પણ છે કે અરજદારોમાંથી એક ગંભીર શારીરિક દિવ્યાંગતા (severe handicap) ધરાવે છે. ચોક્કસપણે, અપીલમાં હકીકત અને કાયદા બંનેના મુદ્દાઓ પર નિર્ણય લેવાનો બાકી છે.” આ કારણોસર કોર્ટે બંને દોષિતોની સજા મોકૂફ રાખીને જામીન મંજૂર કર્યા છે.

અત્રે ઉલ્લેખનીય છે કે, આ બંને વ્યક્તિઓ તે 11 દોષિતોમાં સામેલ છે, જેમને ઓગસ્ટ 2022માં ગુજરાત સરકાર દ્વારા માફી નીતિ હેઠળ સમય પહેલા જેલમાંથી મુક્ત કરવામાં આવ્યા હતા. જોકે, બાદમાં જાન્યુઆરી 2024માં સુપ્રીમ કોર્ટે ગુજરાત સરકારના આ નિર્ણયને રદબાતલ ઠેરવ્યો હતો, જેના પગલે તમામ દોષિતોએ ફરીથી જેલમાં આત્મસમર્પણ કરવું પડ્યું હતું. નોંધનીય છે કે 2002ના ગુજરાત રમખાણો દરમિયાન બિલ્કિસ બાનો પર સામૂહિક દુષ્કર્મ ગુજારવા અને તેમના પરિવારના 14 સભ્યોની હત્યા કરવા બદલ આ 11 લોકોને દોષિત ઠેરવીને આજીવન કેદની સજા ફટકારવામાં આવી હતી.

Leave a Reply

Your email address will not be published. Required fields are marked *