ગુજરાત માધ્યમીક અને ઉચ્ચતર શિક્ષણ બોર્ડ દ્વારા આજે ધો.12 વિજ્ઞાન પ્રવાહની પ્રાયોગિક પરીક્ષાનો પ્રારંભ થયો છે. રાજકોટ શહેર જિલ્લામાં 7780 જેટલા વિદ્યાર્થીઓ આ પરીક્ષા આપશે. રાજકોટ શહેર જિલ્લામાં 29 જેટલા કેન્દ્રો પરથી આ પ્રાયોગિક પરીક્ષા લેવાઈ રહી છે.
જેમાં રાજકોટના 21, ધોરાજીના 4, ગોંડલના 2 અને જેતપુર-જસદણના 1-1 કેન્દ્રોની વ્યવસ્થા કરી છે. આ ઉપરાંત આ પરીક્ષા માટે 200 જેટલા શિક્ષકોના ઓર્ડરો પણ કાઢી તેઓને પ્રેક્ટીકલ પરીક્ષાની જવાબદારી સોંપવામાં આવેલ છે. આ પરીક્ષામાં વિદ્યાર્થીઓએ મેળવેલા માર્ક રોજેરોજ બોર્ડની વેબસાઇટ પર સબમીટ કરી દેવામાં આવશે.
ધો.12 વિજ્ઞાન પ્રવાહના વિદ્યાર્થીઓની શૈક્ષણિક કસોટી એવી આ પ્રેક્ટીલ પરીક્ષા તા.14 સુધી ચાલનાર છે. અહીં ઉલ્લેખનીય છે કે શિક્ષણ બોર્ડ દ્વારા ધો.10 અને 12ની પરીક્ષા આગામી તા.27થી આ વખતે શરુ થનાર છે. આ પરીક્ષાના પેપરો પણ તા.23ના રાજકોટ ખાતે આવી પહોંચનાર છે.
બોર્ડની આ પરીક્ષા સંદર્ભે આગામી ટૂંક સમયમાં જિલ્લા પરીક્ષા સમિતિની જિલ્લા કલેક્ટર પ્રભવ જોષીના અધ્યક્ષ સ્થાને યોજાયા બાદ શિક્ષણાધિકારી દ્વારા આ પરીક્ષાનો એક્શન પ્લાન પણ જાહેર કરી દેવામાં આવનાર છે. બોર્ડની પરીક્ષા આ વખતે પંદર દિવસ વહેલી લેવામાં આવનાર હોય તેના પરિણામ પરીક્ષા બાદ એપ્રિલ માસમાં આપવામાં આવનાર હોવાનું જાણવા મળ્યું છે.
