પાંચ કેચ છોડવા છતાંય સળંગ જીતનો ભારતે સિલસિલો જાળવ્યો
અમદાવાદના નરેન્દ્ર મોદી સ્ટેડિયમમાં રમાયેલી મેચમાં ભારતે નેધરલેન્ડ્સને હરાવ્યું. આ સાથે, ટીમ ઈન્ડિયાએ તેના ગ્રુપ સ્ટેજના ચારેય મેચ જીતી લીધી છે. ભારતે નેધરલેન્ડ્સને 17 રનથી હરાવ્યું હતું. મેચનો નિર્ણય મેચની અંતિમ ઓવરમાં થયો, જ્યાં નેધરલેન્ડ્સને 28 રનની જરૂૂર હતી. ભારત માટે શિવમ દુબેએ અંતિમ ઓવર ફેંકી અને તે સ્કોરનો બચાવ કરવામાં સફળ રહ્યો. એ પણ નોંધનીય છે કે ટીમ ઈન્ડિયાએ પાંચ કેચ છોડ્યા બાદ નેધરલેન્ડ્સ સામે મેચ જીતી હતી.
ભારતે નેધરલેન્ડ્સને જીતવા માટે 194 રનનો લક્ષ્યાંક આપ્યો હતો, અને તેઓએ 20 ઓવરમાં 7 વિકેટે 176 રન બનાવી લીધા હતા. ભારત તરફથી વરુણ ચક્રવર્તી અને શિવમ દુબે બે સૌથી સફળ બોલર રહ્યા. વરુણ ચક્રવર્તીએ ત્રણ વિકેટ લીધી, જ્યારે શિવમ દુબેએ બે વિકેટ લીધી. બુમરાહ અને હાર્દિકે એક-એક વિકેટ લીધી. નેધરલેન્ડ્સ સામે શિવમ દુબેએ બેટિંગ અને બોલિંગ બંનેમાં કૌશલ્ય બતાવ્યું હતું.
તે ટીમ ઈન્ડિયા માટે સૌથી સફળ બેટ્સમેન હતો. છ છગ્ગા સહિત તેના 66 રનથી ટીમ ઈન્ડિયાએ મેચમાં કુલ 193 રન બનાવ્યા હતા. શિવમ દુબેએ બોલિંગમાં પણ યોગદાન આપ્યું હતું અને બે વિકેટ લીધી હતી. આ જીત બાદ ટીમ ઈન્ડિયા હવે સુપર 8 માં રમશે. ટીમ ઈન્ડિયા ગ્રુપ સ્ટેજમાં એક પણ મેચ હારી નથી. ચાર મેચમાં આઠ પોઈન્ટ સાથે ગ્રુપ અ માં ટોપ પર રહ્યું હતું.
