દેશભરમાં શિયાળો ધીમે-ધીમે દસ્તક આપી રહ્યો છે, ત્યારે ગુજરાતમાં પણ શિયાળાની રાહ જોવાઈ રહી છે. મોડી રાતે અને સવારે હવામાં ગુલાબી ઠંડી અનુભવાય છે, જયારે દિવસે તડકાને લીધે લોકોએ ભારે ગરમીનો સામનો કરવો પડી રહ્યો છે. ત્યારે હવે જાણીતા હવામાન શાસ્ત્રી અંબાલાલ પટેલે ઠંડીને લઈને મોટી આગાહી કરી છે. અંબાલાલ પટેલની આગાહી પ્રમાણે, 17 થી 20 નવેમ્બર પશ્ચિમી વિક્ષેપ આવશે.
ઉત્તરીય પર્વતીય પ્રદેશમાં હિમ વર્ષાના કારણે રાજ્યમાં ગરમી ઘટશે. ઉત્તર ગુજરાતના ભાગોમાં તાપમાનમાં ઘટાડો થશે, ન્યૂનત્તમ તાપમાન 18 ડિગ્રી સેલ્સિયસ થઈ શકે છે. સાથે જ તેમણે જણાવ્યું કે હાલ ઘઉંના પાક માટે તાપમાન સાનુકૂળ નથી. હાલની વાવણી થાય તો જીરા, દિવેલામાં ગરમીનાં કારણે ઉત્પાદન ઘટી શકે છે. હાલની ગરમીને જોતા જો ઘઉંની વાવણી કરવામાં આવે છે તો પાકને તેની અસર થવાની શકયતા છે.
અંબાલાલ પટેલે જણાવ્યું કે 15 નવેમ્બર બાદ ગરમીથી કંઈક અંશે રાહત મળશે. જો કે અંબાલાલ પટેલે જણાવ્યું કે 23 નવેમ્બર બાદ મજબૂત પશ્ચિમી વિક્ષેપ આવતા ઉત્તર પર્વતીય પ્રદેશોમાં ભારે હિમવર્ષા થશે. ઉત્તર ભારતમાં હિમવર્ષા થવાને કારણે ગુજરાતમાં ઠંડીની લહેર આવી શકે છે. સાથે જ તેમણે જણાવ્યું કે બંગાળ ઉપસાગરમાં 20 થી 25 નવેમ્બર ડિપડિપ્રેશનના કારણે ચક્રવાત બનશે. સાથે જ અરબ સાગરમાં 19 થી 22 નવેમ્બર લો પ્રેશર સર્જાશે. લો પ્રેશર સોમાલીયા કે ઓમાન તરફ જશે તો વરસાદ નહીં આવે, પરંતુ જો ગુજરાત તરફ આવશે તો વરસાદ આવવાની સંભાવના છે. અરબ સાગરમાં સાયક્લોનિક સર્ક્યુલેશનના કારણે ચક્રવાત બને તેવી સંભાવના છે.
હવામાન નિષ્ણાંત અંબાલાલ પટેલે જણાવ્યું જે ગ્લોબલ વોર્મિંગને કારણે 74 વર્ષ બાદ ઓક્ટોબર માસમાં ગરમી પડી છે. ત્યારે તેમણે આ વર્ષે ગુજરાતમાં રેકોર્ડ બ્રેક ઠંડી અને માવઠાં થવા અંગે પણ આગાહી કરી છે. અંબાલાલ પટેલના જણાવ્યા અનુસાર, આ વર્ષે છેલ્લા 30 વર્ષની ઠંડીનો રેકોર્ડ તુટશે. સાથે જ તેમણે જણાવ્યું કે માર્ચ માસ સુધી હવામાનમાં પલ્ટા આવ્યા કરશે. માર્ચ એપ્રિલ સુધી માવઠા આવી શકે છે.
