દક્ષિણ ગુજરાતના જગતના તાત માટે રાજ્ય સરકાર તરફથી એક ખૂબ જ મહત્વના અને રાહતભર્યા સમાચાર સામે આવ્યા છે. ચાલુ વર્ષે ચોમાસું લંબાતા અને વરસાદ ખેંચાવાના કારણે સમગ્ર પંથકના ખેડૂતોમાં પોતાના પાકને લઈને ભારે ચિંતાનો માહોલ જોવા મળી રહ્યો હતો. પૂરતા વરસાદના અભાવે ખેતી સુકાઈ જવાની ભીતિ વચ્ચે સરકારે વીજ પુરવઠામાં મોટો વધારો કરીને ધરતીપુત્રોને મોટી આશા આપી છે.
અગ્રણીની રજૂઆત અને સફળતાદક્ષિણ ગુજરાતના મુખ્ય પાક જેવા કે ડાંગર, શેરડી તેમજ અન્ય બાગાયતી પાકોને પૂરતું પાણી ન મળવાના કારણે મોટું નુકસાન થવાની સંભાવના સેવાઈ રહી હતી.
આ ગંભીર પરિસ્થિતિને ધ્યાનમાં રાખીને ખેડૂત અને સહકારી અગ્રણી દ્વારા રાજ્ય સરકાર સમક્ષ તાકીદે રજૂઆત કરવામાં આવી હતી. આ રજૂઆતને હકારાત્મક પ્રતિસાદ આપીને સરકારે ધરતીપુત્રોના વ્યાપક હિતમાં એક મોટો અને સંવેદનશીલ નિર્ણય લીધો છે.
8 ને બદલે 10 કલાક વીજળીરાજ્યમાં ચોમાસાની વર્તમાન પરિસ્થિતિને જોતા સરકારે કૃષિ વિષયક વીજ ફીડરોમાં અપાતા પાવર સપ્લાયના સમયમાં વધારો કરવાનો આદેશ કર્યો છે. અત્યાર સુધી ખેડૂતોને પોતાના પાકની સિંચાઈ માટે રોજના 8 કલાક વીજળી મળતી હતી, જેમાં હવે 2 કલાકનો વધારો કરીને તેને 10 કલાક કરી દેવામાં આવી છે. સરકારના આ નિર્ણયથી દક્ષિણ ગુજરાતના હજારો ખેડૂતો પોતાના પાકને બચાવી શકશે અને તેમના પરથી સંકટના વાદળો હળવા થશે.
