રવિન્દ્ર જાડેજા એક એવો ખેલાડી છે જે મેદાન પર શક્ય એટલી ઝડપથી પોતાની ઓવર પૂરી કરી લેવા માટે જાણીતો છે. પરંતુ તમને જાણીને નવાઈ લાગશે કે આ જ ફાસ્ટ બોલિંગ કરનાર સ્પિનરના નામે ટેસ્ટ ક્રિકેટમાં સૌથી વધુ ’નો-બોલ’ ફેંકવાનો અનોખો અને થોડો શરમજનક રેકોર્ડ નોંધાયેલો છે. તમને પણ સવાલ થતો હશે ને કે જે બોલર આટલી ઝડપથી ઓવર પૂરી કરી લેતો હોય, તે સૌથી વધુ નો-બોલ કઈ રીતે ફેંકી શકે? આ પાછળના આંકડા ખરેખર ખૂબ જ રસપ્રદ છે.
જો આપણે વર્ષ 2021 થી અત્યાર સુધીના આંકડાઓ પર નજર કરીએ તો, રવિન્દ્ર જાડેજાએ એક સ્પિનર તરીકે ટેસ્ટ ક્રિકેટમાં સૌથી વધુ નો-બોલ ફેંક્યા છે. આ લિસ્ટમાં આપણો આ ભારતીય સ્ટાર ખેલાડી 84 નો-બોલ સાથે સૌથી મોખરે છે. બીજા નંબરે પાકિસ્તાનનો સ્પિનર નૌમાન અલી આવે છે, જેના નામે 40 નો-બોલ નોંધાયેલા છે. તમે જોઈ શકો છો કે જાડેજા અને નૌમાન અલી વચ્ચેનો તફાવત બમણા કરતા પણ વધારે છે. આમ, જાડેજાના નામે સૌથી વધુ નો-બોલ ફેંકવાનો આ શરમજનક રેકોર્ડ નોંધાઈ ગયો છે.
રવિન્દ્ર જાડેજા ભારતીય ટીમનો ખૂબ જ અનુભવી ખેલાડી છે. તેણે વર્ષ 2012 માં પોતાનું ટેસ્ટ ડેબ્યૂ કર્યું હતું. તે એક એવો શાનદાર બેટ્સમેન અને ઓલરાઉન્ડર રહ્યો છે જેણે ભારત માટે ક્રિકેટના ત્રણેય ફોર્મેટમાં પોતાનું યોગદાન આપ્યું છે. જોકે, વર્ષ 2024 ના ટી-20 વર્લ્ડ કપમાં શાનદાર જીત બાદ જાડેજાએ ટી-20 ઇન્ટરનેશનલ ક્રિકેટમાંથી નિવૃત્તિ જાહેર કરી દીધી હતી. એટલે હવે તે ટીમ ઇન્ડિયા માટે ફક્ત ટેસ્ટ અને ODI (વનડે) ફોર્મેટમાં જ રમતો જોવા મળશે.
