યમનમાં હુતી બળવાખોરોએ પવિત્ર શહેર મક્કા પર હુમલો કરવાના આરોપો અંગે એક મહત્વપૂર્ણ નિવેદન આપ્યું છે. હુથી બળવાખોરોએ સાઉદી અરેબિયાના આરોપને ખોટો ગણાવ્યો છે અને સ્પષ્ટ કર્યું છે કે મક્કા વિરુદ્ધ કોઈ ડ્રોન હુમલો કરવામાં આવ્યો ન હતો. અનેક મુસ્લિમ સંગઠનોએ શહેર પર હુમલાના અહેવાલોની સખત નિંદા કરતા નિવેદનો જારી કર્યા છે. ઓર્ગેનાઈઝેશન ઓફ ઈસ્લામિક કોઓપરેશન (OIC) એ તેને ઘૃણાસ્પદ ગુનો ગણાવ્યો છે.
એએફપી (AFP)ના અહેવાલ મુજબ, બળવાખોરોએ જણાવ્યું હતું કે, “સાઉદીનો દાવો ખોટો છે. મક્કા વિરુદ્ધ કોઈપણ પ્રકારનો હુમલો કરવામાં આવ્યો ન હતો. સાઉદી અરેબિયા આરોપ લગાવી રહ્યું છે.” આ દરમિયાન OICએ કહ્યું, “અમે આ ઘૃણાસ્પદ હુમલાની સખત નિંદા કરીએ છીએ. પવિત્ર શહેર મક્કા અને મદીનાના વિસ્તારોને નિશાન બનાવતા આ હુમલાનો ઉદ્દેશ્ય નાગરિકોમાં ભય ફેલાવવાનો હતો. આ કૃત્ય વિશ્વભરના મુસ્લિમોની લાગણીઓને ઠેસ પહોંચાડે છે. પવિત્ર મસ્જિદ અને સામાન્ય લોકો પર હુમલો કરવો એ ઇસ્લામિક મૂલ્યોની વિરુદ્ધ છે. તે આંતરરાષ્ટ્રીય કાયદાનું પણ ઉલ્લંઘન છે.”
આજે સાઉદી અરેબિયાએ દાવો કર્યો હતો કે હુથી બળવાખોરોએ મક્કા પર ડ્રોન હુમલો કરવાનો પ્રયાસ કર્યો હતો, પરંતુ ડ્રોન લક્ષ્ય સુધી પહોંચે તે પહેલાં જ તેને તોડી પાડવામાં આવ્યું હતું. સાઉદી અરેબિયાના આ નિવેદન પર મુસ્લિમ સંગઠનોએ રોષ વ્યક્ત કર્યો હતો અને હુથી બળવાખોરોની આકરી ટીકા કરી હતી. મક્કા પર હુમલો કરવાનો પ્રયાસ થયો હોય તેવી આ પ્રથમ ઘટના નથી; હુથી બળવાખોરોએ 2017માં પણ હુમલાનો પ્રયાસ કર્યો હતો, જોકે તે સમયે મિસાઇલ હુમલો શહેરથી ઘણા દૂરના અંતરે થયો હતો.
દરમિયાન અન્ય એક મહત્વપૂર્ણ અહેવાલ સામે આવ્યો છે જેમાં દાવો કરવામાં આવ્યો છે કે સાઉદી અરેબિયાએ હુથી બળવાખોરો સામે ઇઝરાયેલ પાસેથી મદદ માંગી છે. અહેવાલો સૂચવે છે કે પાકિસ્તાને ‘મક્કા કરાર’ હેઠળ પોતાનું સમર્થન પાછું ખેંચી લીધું હતું, જેના કારણે સાઉદી અરેબિયાએ ઇઝરાયેલ તરફ વળવું પડ્યું. જોકે, આ બાબતે અત્યાર સુધી કોઈ સત્તાવાર નિવેદન બહાર પાડવામાં આવ્યું નથી.
